ރައީސް ޑރ. މުޙައްމަދު މުޢިއްޒުގެ މެނިފެސްޓޯގައިވާ އިސްލާމީ ޔުނިވާސިޓީއާ ގުޅޭ ތަސައްވުރުގައި އަންނަ އަހަރު އަމަލީ ސިފަތައް ޖެހޭތަން ފެންނާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ރޭ ވިދާޅުވެއްޖެއެވެ.
ވަޒީރު މިހެން ވިދާޅުވީ އިސްލާމީ ޔުނިވާސިޓީގެ ކުއްލިއްޔާ އޮފް ޤުރްއާން އެންޑް ސުންނާގެ ފަރާތުން އިންތިޒާމުކޮށްގެން ބާއްވާ “މަޙްފަލުލް ޤުރްއާނިލް ކަރީމް 1446” ގެ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ޑރ. ޝަހީމް ވިދާޅުވީ ރައީސް ޑރ. މުޢިއްޒުގެ މެނިފެސްޓޯގައި އިސްލާމީ ޔުނިވާސިޓީއާއި ގުޅޭ ވަރަށް ރަނގަޅު ތަސައްވުރެއް އެކުލަވާލެވިފައިވާ ކަމަށެވެ. އަދި މި ތަސައްވުރު ހަގީގަތަކަށް ހެއްދެވުމަށްޓަކައި ރައީސް މަސައްކަތްޕުޅު ކުރައްވަމުން ގެންދަވާ ކަމަށާއި، އަންނަ އަހަރު މިކަމުގައި އަމަލީ ސިފަތައް ޖެހޭތަން ފެންނާނެ ކަމަށެވެ.
ރައީސް ޑރ. މުޢިއްޒުގެ އަމާޒަކީ ދިވެހިރާއްޖޭގެ އިސްލާމީ ޔުނިވާސިޓީއަކީ ރާއްޖޭގެ ދަރިވަރުންގެ އިތުރުން ރާއްޖޭން ބޭރުން ވެސް ދަރިވަރުން ތައުލީމު ހާސިލުކުރުމަށް އަންނާނެ ޔުނިވާސިޓީއަކަށް ހެއްދެވުން ކަމަށް ވަޒީރު ވިދާޅުވިއެވެ.
ވަޒީރު ވިދާޅުވި ގޮތުގައި އަންނަ އަހަރުވެގެންދާނީ އިސްލާމީ ޔުނިވާސިޓީއަށް ފާގަތި އަހަރަކަށެވެ.