ކަލަކުވޭ ބިރުވެތިވޭ: ކިޔައިދެއްވީ ﷲއަށް ބިރުވެތިވުމެއް ނެތުމުން ހަލާކުވެދިޔަ ގައުމުތަކުގެ ވާހަކަ، ގޮވައިލެއްވީ އިބުރަތް ލިބިގަތުމަށް!

ރޭގައި ބޭއްވި ކަލަކުވޭ ބިރުވެތިވޭގެ ދަރުސްގައި، މާތް ﷲ އާއި އެކަލާނގެ ރަސޫލުންގެ ބަސްފުޅުތަކަށް ފުރަގަސްދީ، ފާފަތަކަށް އަރައިގަންނަމުންދިޔަ ގައުމުތަކުގެ މީހުން ނެތި ކުރެއްވި ގޮތުގެ ވާހަކަތައް ކިޔައި ދެއްވައި، އެކަންކަމުން އިބުރަތް ހާސިލު ކުރުމަށް ދީނީ ޢިލްމުވެރިޔާ ޝެއިޚް ޑރ. އާދަމް ޝަމީމް ގޮވާލައްވައިފިއެވެ.

ރޭ ހުޅުމާލޭ ރުއްގަނޑު ސަރަހައްދުގައި ބޭއްވުނު "ކަލަކުވޭ ބިރުވެތިވޭ" ދަރުސްގައި ޑރ. ޝަމީމް ވިދާޅުވީ، މާތް ﷲ ބާއްވާލެއްވި ތަކެތި ދޮގުކުރާ މީހާ، އެކަން ކުރަނީ އޭނާގެ މޮޅުކަމާއި ޢިލްމުގެ ގިނަކަމުންނޫން ކަމަށެވެ. އެގޮތުން ރަސޫލާ ﷺ ގެ ބަސްފުޅު، މުޝްރިކުން ދޮގުކުރިކަން ފާހަގަކުރައްވައި، އޭގެ ކުރިން ފޮނުއްވުނު ރަސޫލުބޭކަލުންގެ ބަސްފުޅުވެސް އެ ބޭކަލުންގެ ގައުމުގެ މީހުން ދޮގުކުރިކަން ކީރިތި ގުރުއާނުގެ އަލީގައި ހާމަކޮށްދެއްވިއެވެ.

ޝެއިޚް ޑރ. އާދަމް ޝަމީމް ވަނީ ޙައްޖު ސޫރަތުގެ 42 ވަނަ އާޔަތުން ފެށިގެން 46 ވަނަ އާޔަތާއި އެއާޔަތްތަކުގެ މާނައަށް އަލިއަޅުވާލައްވައި، މާތް ﷲ އަށް އުރެދުމުން ހަލާކުކުރެވުނު ގައުމުތަކުގެ ވާހަކަ ތަފްސީލުކޮށް ކިޔައިދެއްވާފައެވެ. އޭގެ ތެރޭގައި ޢާދު ބާގައިގެ މީހުންނާއި ޘަމޫދު ބާގައިގެ މީހުންގެ ވާހަކަ ހިމެނެއެވެ.

ޝެއިޚް ޑރ. އާދަމް ޝަމީމް ވިދާޅުވީ، މިހާރު ދިވެހީންގެ ތެރޭގައިވެސް މާތް ﷲ އާއި އެކަލާނގެ ރަސޫލާގެ ނަޞޭހަތް އަޑުނާހާ މީހުން ގިނަވެފައިވާކަން ހިތާމައާއެކު ފާހަގަކުރައްވާފައެވެ. އަދި މާތް ﷲ ގެ ނަސޭހަތަށް އިންކާރުކުރާ މީހުން، ނުވަތަ ފުރަގަސްޖަހާމީހުން، އެއީ އެއްގޮތަކަށްވެސް އެމީހުންގެ މޮޅު ކަމަކުން ނޫންކަމަށާއި، ހަމައެކަނި ޖާހިލުކަމާއި ކިބުރުވެރިކަމުގެ ސަބަބުން އިންކާރު ކުރަނީ ކަމަށް ވިދާޅުވިއެވެ.

ޝެއިޚް ޑރ. އާދަމް ޝަމީމް އިތުރަށް ވިދާޅުވީ، ލޫތުގެފާނުގެ ގައުމުގެ މީހުން އަރައިގަތް ނުބައި ޢަމަލުތަކުގެ ވާހަކައާއި، އެލްޖީބީޓީކިޔޫ ފަދަ ނަންތަކުން މިފަދަ ކަންކަން ދުނިޔޭގައި ފަތުރަމުންދާކަމާއި، މިކަމަށް މާތް ﷲ ޣާފިލުވެވޮޑިގެން ނުވާކަމެވެ. އަދި މާތް ﷲ ގެ ހިއްޕެވުން އަންނައިރު، ފިސާރި ހަރުކަށި ހިއްޕެވުމަކުން އެކަލާނގެ ހިއްޕަވާނެކަމަށް ވިދާޅުވިއެވެ.

ޝެއިޚް ޑރ. އާދަމް ޝަމީމް ދަރުސް ނިންމަވާލެއްވީ މުއުމިނުންނާއި މުސްލިމުން މާތް ﷲ ވޮޑިގެންވާކަން ދަނެ، އެކަލާނގެއަށް ބިރުވެތިވުމަށް ގޮވާލައްވަމުންނެވެ.

"ލޮބުވެތި މުސްލިމުންނާއި އުޚުތުން، ﷲ ވޮޑިގެންވޭ. އެކަލާނގެއަށް ބިރުވެތިވޭ!" ޝެއިޚް ޑރ. އާދަމް ޝަމީމް ވިދާޅުވިއެވެ.

މާތް ﷲ އަށް އުރެދުމުގެ ސަބަބުން ހަލާކުކުރެވުނު ޤައުމުތައް

1. ޢާދު ބާގައިގެ މީހުން:

{މިއީ މާތް ﷲ އާދަޔާ ޚިލާފު ބާރެއް ދެއްވާފައިވާ ބައެކެވެ. ނަމަވެސް އެމީހުން ކިބުރުވެރިވެ، މާތް ﷲ ގެ އާޔަތްތަކަށް ގޮންޖެހުމުގެ ސަބަބުން ހަލާކުކުރެވުނެވެ.}

ޝެއިޚް ޑރ. އާދަމް ޝަމީމް ވިދާޅުވެފައިވަނީ، ނޫޙުގެފާނުގެ ޤައުމާއި، ޢާދު އަދި ޘަމޫދު ޤައުމުގެ މީހުންގެ ވާހަކައަކީ އިބްރަތްތެރި ވާހަކަތަކެއް ކަމަށެވެ. އެ މީހުން ދިރިއުޅުނު ތަންތަން މިއަދުވެސް ފެންނަން ހުރިކަން ފާހަގަކުރައްވާފައިވެއެވެ.

އެ ޤައުމުތަކުގެ މީހުންނަށް ދިމާވި ކަންތައްތައް ކީރިތި ޤުރްއާނުގައި ބަޔާންވެގެންވާއިރު، ޤުރްއާނުގެ އާޔަތްތަކުގެ އަލީގައި ޝެއިޚް ޑރ. އާދަމް ޝަމީމް ވަނީ އެކަމުގެ ތަފްޞީލު ބަޔާންކޮށްދެއްވާފައެވެ.

އެގޮތުން ޢާދު ޤައުމުގެ މީހުންނަކީ، މާތް ﷲ އާދަޔާ ޚިލާފު ބާރެއް ދެއްވާފައިވާ ބައެއްކަމަށާއި، މިއަދުގެ ޒަމާނުގެ ސައިންސްވެރިންނަށްވެސް، އެ ޤައުމުގެ މީހުންގެ އަތުގައި ހުރި ބާރާއި އެމީހުން ބޭނުންކުރި ތަކެއްޗަކީ ކޮބައިކަން އަދިވެސް ދެނެގަނެވިފައި ނުވާކަން ޝެއިޚް ޑރ. އާދަމް ޝަމީމް ފާހަގަކުރައްވާފައިވެއެވެ.

އެފަދަ ބާރެއް ލިބުމުން، ޢާދު ޤައުމުގެ މީހުން، އެއްވެސް ޙައްޤަކާ ނުލައި މި ބިމުގައި ކިބުރުވެރިވެ، "އަހަރެމެންނަށްވުރެ ގަދައީ ކާކުހެއްޔެވެ؟ ކޮން ފަރާތެއްހެއްޔެވެ؟" ބުނެ ބޮޑާވެ ކިބުރުވެރިވެ، މާތް ﷲ ގެ އާޔަތްތަކަށް އެމީހުން ގޮންޖެހިކަން ޝެއިޚް ޑރ. އާދަމް ޝަމީމް ހަނދުމަ ކޮށްދެއްވާފައިވެއެވެ.

"އަދި ޘަމޫދު ޤައުމުގެ މީހުން ދަންނާށެވެ! ފަހެ، ތިމަން ރަސްކަލާނގެ އެބައިމީހުންނަށް ތެދުމަގު ދެއްކެވީމެވެ. ނަމަވެސް، އެބައިމީހުން ތެދުމަގު ލިބުމުގެ ބަދަލުގައި، މަގުފުރެދުން އިޚްތިޔާރުކުރިއެވެ. އެބައިމީހުން ކުރަމުންދިޔަ ޢަމަލުތަކުގެ ސަބަބުން، ނިކަމެތިކުރަނިވި ޢަޛާބުގެ ކޯފާ އެބައިމީހުންނަށް ޖެހުނެވެ." ޝެއިޚް ޑރ. އާދަމް ޝަމީމް، ކަލަކުވޭ ބިރުވެތިވޭ ދަރުސް

މީގެއިތުރުން ޝައިޚް ވަނީ ހަލާކުކުރެވުނު ޤައުމުތަކުގެ މީހުން، މާތް ﷲ އާއި އެކަލާނގެ ރަސޫލުންގެ ނަޞޭޙަތް ޤަބޫލުނުކުރުމުގެ ސަބަބުން އެބައިމީހުން ހަލާކުވެގެން ދިޔައިރު، މިހާރު ދިވެހިންގެ ތެރޭގައިވެސް މާތް ﷲ އާއި އެކަލާނގެ ރަސޫލާގެ ނަޞޭޙަތް އަޑުނާހާ މީހުން ގިނަވެފައިވާކަން ހިތާމައާއެކު ފާހަގަކުރައްވާފައެވެ.

"މާތް ﷲ ގެ ނަޞޭޙަތަށް އިންކާރުކުރާ މީހުން، ނުވަތަ ފުރަގަސްދޭ މީހުން، އެކަން ކުރަނީ އެމީހުންގެ މޮޅުކަމަކުން ނޫނެވެ. އެކަމަށް ހަމައެކަނި އޮތް ސަބަބަކީ ޖާހިލުކަން ނުވަތަ ކިބުރުވެރިކަމެވެ. އޭގެ ސަބަބުން އެބައިމީހުން އިންކާރުކުރަނީއެވެ. ލޮބުވެތި މުސްލިމުންނާއި އުޚްތުންނޭވެ، ﷲ ވޮޑިގެންވާކަން ދަންނާށެވެ! އެކަލާނގެއަށް ބިރުވެތިވާށެވެ!"

ޝެއިޚް ޑރ އާދަމް ޝަމީމް، ކަލަކުވޭ ބިރުވެތިވޭ ދަރުސްގެ ކުރިން ދަރުސްގައި ބައިވެރިވުމަށް ދައުވަތު ދެއްވަނިކޮށް،…………..އެފްބީ ރީލްސްއަކުން

2- ޘަމޫދު ބާގައިގެ މީހުން:

[މިބައިމީހުންނަށް މާތް ﷲ ތެދުމަގު ދެއްކެވި ނަމަވެސް، އެމީހުން މަގުފުރެދުން އިޚްތިޔާރުކުރުމުގެ ސަބަބުން ހަލާކުކުރެވުނެވެ.]

ލޫޠުގެފާނުގެ ޤައުމުގެ މީހުން، އޭގެ ކުރީގެ ޤައުމުތަކުގެ މީހުން އަރައިނުގަންނަފަދަ ނުބައި ޢަމަލަކަށް އަރައިގަތްކަމަށާއި، އެބައިމީހުން، އެބައިމީހުންގެ ޙަލާލު އަނބިން ދޫކޮށް، ޝަހުވަތާއެކު ފިރިހެނުންގެ ގާތަށް ދިޔަކަމަށް ޝައިޚް ވިދާޅުވެފައިވެއެވެ. އަދި ލޫޠުގެފާނު އެބައިމީހުންނަށް ތެދުމަގަށް ރުޖޫޢަވުމަށް ގޮވާލެއްވުމުން އެބައިމީހުން ފުރަގަސްދިނުމުން މާތް ﷲ، އެ ޤައުމު އެފުށްމިފުށަށް ޖައްސަވައި، ހިލައިގެ ވާރޭ ވެއްސެވިކަން ހަނދުމަކޮށްދެއްވާފައިވެއެވެ.

މި މުޑުދާރު ހަޑިހުތުރު ޢަމަލު، އެލްޖީބީޓީކިޔު، ރީތި ނަންތަކާއި، ރީތި ކުލަތައް ބޭނުންކޮށްގެން ދުނިޔޭގައި ފަތުރަމުން އިބްލީސްއާއި އޭނާގެ އެހީތެރިން ކުރަމުންދާ މަސައްކަތްތަކަށް މާތް ﷲ ޣާފިލުވެވޮޑިގެން ނުވާކަމަށް ޝައިޚް ވިދާޅުވެފައިވެއެވެ. މާތް ﷲ ގެ ހިއްޕެވުން އަންނައިރު، ވަރަށް ހަރުކަށި ގޮތަކަށް އެކަލާނގެ ހިއްޕަވާނެކަމަށް ވިދާޅުވެފައިވެއެވެ. އެހެންކަމުން މުއުމިނުން، މުސްލިމުން، އަޅުގަނޑުމެން ޖެހޭ ސަމާލުވާން ކަމަށާއި، އަޅުގަނޑުމެން ޖެހޭ މާތް ﷲ ވޮޑިގެންވާކަން ދަންނަން ކަމަށާއި، އެކަލާނގެއަށް ބިރުވެތިވާން ކަމަށް ޝައިޚް ވިދާޅުވެފައިވެއެވެ.

މީގެއިތުރުން ޝައިޚްވަނީ ރާއްޖޭގައިވެސް އަންހެނުންގެ ހެދުން އަޅައިގެން އުޅޭ ފިރިހެނުން ގިނަވަމުންދާކަމާއި، އިޖުތިމާޢީ މީޑިއާގެ އެކި މަންޞަތަކުގައި އެބައިމީހުންގެ ހަށިގަނޑު ފާޅުކުރަމުންދާކަން ފާހަގަކުރައްވައި، އެފަދަ މީހުން މާތް ﷲ އައްސަވާ އަދި ބައްލަވާވޮޑިގެންވާކޮޑިގެންވާކަން ދަނެ، އެކަލާނގެއަށް ބިރުވެތިވުމަށް ގޮވާލައްވާފައިވެއެވެ.

3. މަދުޔަނުގެ އަހުލުވެރިން:

[މިބައިމީހުން މިނެކިރުމުގައި އަދުލުވެރިކަމާއި އިންސާފު ގެންގުޅުމަށް ޝުޢައިބުގެފާނު ނަސޭހަތްތެރިވެވަޑައިގަތް ނަމަވެސް، އެކަމަށް އިޖާބަ ނުދިނުމުގެ ސަބަބުން ހަލާކުކުރެވުނެވެ.]

ލޫޠުގެފާނުގެ ޤައުމުގެ މީހުންގެ ވާހަކައަށްފަހު، ޝެއިޚް ޑރ. އާދަމް ޝަމީމް ވަނީ މަދްޔަނުގެ އަހުލުވެރިންނަށް ވެގެން ދިޔަގޮތުގެ މައްޗަށް އަލިއަޅުވާލައްވާފައެވެ. އެގޮތުން، އެބައިމީހުން، މިނެ ކިރާއިރު އެއްވެސް ޢަދުލުވެރިކަމެއް އިންޞާފެއްނެތި ކިރަމުން ދިޔަކަމަށާއި، އެފަދައިން އެކަން ނުކުރުމަށް ޝުޢައިބުގެފާނު އެބައިމީހުންނަށް ނަޞޭޙަތްތެރިވެވަޑައިގެންނެވިކަން ފާހަގަކުރައްވާފައިވެއެވެ. އަދި މީހުންގެ މުދަލުން އުނިކޮށްގެން ނުދިނުމަށާއި، ގަނޑުބަނޑުކޮށްގެން ބިމުގައި ފަސާދަކޮށް ކޮރަޕްޝަން ނުހިންގުމަށް ޝުޢައިބުގެފާނު އެބައިމީހުންނަށް ނަޞޭޙަތްތެރިވެވަޑައިގެންނެވިކަމަށް ވިދާޅުވެފައިވެއެވެ.

ނަމަވެސް އެބައިމީހުންވެސް ޝުޢައިބުގެފާނުގެ ނަޞޭޙަތް ޤަބޫލު ނުކުރިކަމަށާއި އޭގެ ސަބަބުން އެ ޤައުމުވެސް ހަލާކުކޮށްލެވުނު ކަމަށް ޝައިޚް ޑރ އާދަމް ޝަމީމު ވިދާޅުވެފައިވެއެވެ.

މިއާއެކު ޝައިޚް ޑރ އާދަމް ޝަމީމު ވަނީ މިހާރުވެސް އަވަހަށް މުއްސަނދިވެ މިލިޔަނަރަކަށް ވުމަށްޓަކައި ޙަރާމެއް ޙަލާލެއް ބެލުމެއްނެތި، ތިމާގެ މަޤާމާއި ބާރުގެ ބޭނުންކޮށްގެން، އަދި އެނޫންވެސް ނުބައި މަގުތައް ޚިޔާރުކޮށް މުއްސަނދިވާން މަސައްކަތްކުރަމުންދާކަން ފާހަގަކުރައްވާފައެވެ. ކަންމިހެން ހުރި ނަމަވެސް، މާތް ﷲ އަޅުގަނޑުމެންނަށް ޙަލާލު ގޮތުގައި ދެއްވާފައިވާ ތަކެތި މާ ހެޔޮކަން ބޮޑުކަން ޤުރްއާނުން އެނގޭކަމަށް ޝައިޚް ވިދާޅުވެފައިވެއެވެ.