ރާއްޖޭގެ ނަސްރުގެ ދުވަހުގެ މުނާސަބަތުގައި، ދިވެހި ގައުމީ ދިފާއީ ބާރު (އެމްއެންޑީއެފް) އިން އިންތިޒާމުކޮށްގެން ބޭއްވި ހާއްސަ އަސްކަރީ ހުށަހެޅުމުގެ ހަރަކާތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި އެމަނިކުފާނުގެ އަނބިކަނބަލުން މެޑަމް ސާޖިދާ މުހައްމަދު މިއަދު ހަވީރު ބައްލަވާލައްވައިފިއެވެ.
މާލޭގެ ޖުމްހޫރީ މައިދާނުގައި ބޭއްވުނު މި ހަރަކާތަށް ރައީސުލްޖުމްހޫރިއްޔާގެ ދެކަނބަލުން ވަޑައިގަތުމުން، އިސްތިގުބާލު ކުރެއްވީ ޑިފެންސް މިނިސްޓަރު މުޙައްމަދު ޣައްސާން މައުމޫނާއި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީއެވެ.
ހަރަކާތް ފެށުމުގެ ކުރިން، ދިވެހި ސިފައިން ވަނީ ރައީސް ޑރ މުއިއްޒަށް އަސްކަރީ ކުރުނީޝެއް އަރުވާފައެވެ. އޭގެ ފަހުން، ސިފައިންގެ އެހާރާއި މިހާރުގެ ހާލަތު ދައްކުވައިދޭ ވީޑިއޯ ޕްރެޒެންޓޭޝަނެއް ދެއްކިއެވެ.
މި ރަސްމިއްޔާތުގައި، އެމްއެންޑީއެފްގެ އެކި ޔުނިޓްތަކުން ތަފާތު އަސްކަރީ ހުނަރުތައް ދައްކުވައިދިނެވެ. މީގެ ތެރޭގައި ސްޕެޝަލް ބޯޓް ސްކޮޑްރަންގެ ހަރަކާތްތަކާއި، އަންޑަވޯޓަރ ޑިމޮލިޝަން، ސްޕެޝަލް ފޯސަސްގެ ހަރަކާތްތައް، ރެޕެލިންގ އަދި ކައުންޓަރ އެޓޭކް ހަރަކާތްތައް ހިމެނެއެވެ. މީގެ އިތުރުން، އެއަރ ފޯސް، މެރިޓައިމް އަދި ލޭންޑް ފޯސްގެ ޤާބިލިއްޔަތު ދައްކުވައިދޭ އަސްކަރީ އަދި ހެވިކަމުގެ ހަރަކާތްތަކެއްވެސް ކުރިއަށް ގެންދެވުނެވެ.