ރާއްޖޭގެ މިނިވަންކަން ވަރުގަދަކޮށް، ދަމަހައްޓަން ރައީސް ޑރ.މުޢިއްޒު ގެންގުޅުއްވަނީ ހަރުދަނާ ސިޔާސަތެއް ކަމަށް ވިދާޅުވެ ކުރީގެ ރައީސް މައުމޫން ޢަބްދުލްޤައްޔޫމް ތައުރީފުކުރައްވައިފިއެވެ.
ކުރީގެ ރައީސް މައުމޫން މިހެން ވިދާޅުވީ މި އަހަރުގެ ނަސްރުގެ ދުވަހުގެ މުނާސަބަތުގައި ދަރުބާރުގޭގައި މިހާރު ބާއްވަމުންދާ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
މައުމޫން ވިިދާޅުވީ މިފަދަ ޖަލްސާގައި ބައިވެރިވެވަޑައިގަތުމަކީި ލިބިވަޑައިގަންނަވާ އުފަލެއް ކަމަށާއި، ދައުވަތު ދެއްވި ކަމަށްޓަކައި ރައީސް ޑރ. މުޙައްމަދު މުޢިއްޒަށް ޝުކުރު އަދާކުރައްވާ ކަމަށެވެ.
އެއަށްފަހު އެމަނިކުފާނު ވިދާޅުވީ ދިވެހިރާއްޖޭގެ މިނިވަންކަމާއި، ސިޔާދަތު ވަރުގަދަކޮށް، ދެމެހެއްޓުމަށްޓަކައި ރައީސް ޑރ. މުޢިއްޒު ގެންގުޅުއްވަނީ ހަރުދަނާ ސިޔާސަތެއްކަން ފާހަގަކުރައްވައި އެކަމަށް ތައުރީފުކުރައްވައި ޝުކުރު އަދާކުރައްވައިފައެވެ.
ދިވެހިރާއްޖޭގެ މިނިވަންކަމާއި ސިޔާދަތު ވަރުގަދަ ކުރައްވައި ދެމެހެއްޓެވުމަށްޓަކައި އިއްޒަތްތެރި ރައީސުލްޖުމްހޫރިއްޔާ ގެންގުޅުއްވާ ހަރުދަނާ ސިޔާސަތަށް ތާއީދުކޮށް ޝުކުރާ ސާބަސް ދަންނަވަން.
މީގެއިތުރުން 1988 ނޮވެމްބަރު 3 ގެ އުދުވާނީ ހަމަލާއަށް އަލިއަޅުވައިލައްވައި މައުމޫން ވަނީ އެ ދުވަހުގައި ޝަހީދުވި ސިފައިންނާއި، އާންމުންނަށް ސުވަރުގެ ދެއްވައި ހެޔޮ ރަހުމަތްލެއްވުމަށް އެދި ދުއާ ދަންނަވައިފައެވެ.