8000 ރުފިޔާއަށް ލިބޭ އިންޖެކްޝަނެއް އާސަންދައަށް ބިލްކުރާއިރު 23000 ރުފިޔާ ކަމަށް ޖަހައި ބޮޑު އަދަދުން ފައިދާ ނަގަމުންދިޔަކަން ހާމަވެއްޖެއެވެ.
އެންސްޕާގެ ސީއީއޯ ހީނާ ވަލީދު މީސްމީޑިއާގައި ކުރެއްވި ޕޯސްޓެއްގައި ހާމަކުރެއްވި ގޮތުގައި، މިކަން ހާމަވެފައިވަނީ އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، އެންމެ ޚަރަދު ބޮޑު އެއް ބޭސްކަމުގައިވާ “ލުސެންޓިސް އިންޖެކްޝަން” ގެ އަގު ޗެކްކުރުމުގެ ގޮތުން، ލޮލުގެ ފަރުވާގެ ޚިދުމަތް ދޭ ފަރާތަކުން ބޭސް ގަންނަ އަގު ހޯދުމަށް އެދުމުން ފޮނުވި އިންވޮއިސްތަކުންނެވެ.
ހީނާ ވިދާޅުވި ގޮތުގައި، މި އިންޖެކްޝަން 500 ޑޮލަރަށް ގެނެސް 23000 ރުފިޔާއަށް އާސަންދައަށް ބިލްކޮށްފައިވެއެވެ. މިއީ އަށާރަ ރުފިޔާގެ ރޭޓުން ޑޮލަރު ބެލިކަމުގައިވިޔަސް، އެންމެ އިންޖެކްޝަނަކުން 14000 ރުފިޔާގެ ފައިދާއެއް ނަގާފައިވާ ކަމެކެވެ.
“މިގޮތުން 500 ޑޮލަރަށް މި ބޭސް ގެނެސް 23000 (ތޭވީސްހާސް) ރުފިޔާ އަށް އާސަންދަ އަށް ބިލު ކޮށްފައިވޭ. މިއީ އަށާރަ ރުފިޔާގެ ރޭޓުން ޑޮލަރު ބެލިކަމުގައިވިޔަސް، އެންމެ އިންޖިކްޝަނަކުން 14،000 (ސާދަހާސް) ރުފިޔާގެ ފައިދާއެއް،” އެންސްޕާގެ ސީއީއޯ، ހީނާ ވަލީދު
އިތުރަށް ބެލިބެލުމުން، މި ބޭސް އެތެރެކުރަން ރަޖިސްޓަރކޮށްފައިވަނީ މުޅިން އެހެން ކުންފުންޏަކުންކަން އެނގުނު ކަމަށާއި، ނަމަވެސް އެ ފަރާތުން އެއްވެސް ވަރަކަށް މި ބޭސް އެތެރެކޮށްފައި ނުވާކަން ހީނާ ވަނީ ފާހަގަކުރައްވާފައެވެ. އަދި ލޮލުގެ ފަރުވާގެ ހިދުމަތްދޭ މި ފަރާތުން ބޭސް ވިއްކާފައިވަނީ ބޭސް އެތެރެ ކުރުމަށް ރަޖިސްޓަރީނުކޮށް، ހަމައެކަނި ޕްރިސްކްރިޕްޝަނަށް (ބޭސްސިޓީއަށް) ކަމަށް ވާއިރު އާސަންދަ، ސްކީމްގެ ތެރެއިން މި އިންޖެކްޝަނަށް އެންމެ ގިނައިން ބިލު ކޮށްފައިވަނީ އެ ފަރާތުން ކަމަށް ހީނާ ވިދާޅުވުއެވެ.
ހަމައެހެންމެ، މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައި ނުވާ އިންޖެކްޝަނަކަށް ބިލު ކޮށްފައިވުމާއި، އަގުގެ ބޮޑު ތަފާތަކުން ބޮޑު ފައިދާއެއް ނަގަމު ންދިޔައިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީއަށް އަންގާފައި ނުވާކަންވެސް ފާހަގަ ކުރެވުނު ކަމަށް ހީނާ ވިދާޅުވިއެވެ.
މި މައްސަލަ ހުއްޓުވުމަށް ފިޔަވަޅު އަޅައި، އެންސްޕާގެ ވެލްފެއާ އެހީގެ ދަށުން މިހާރުވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ދެވެމުންދާ ކަމަށާއި، މިކަން އިތުރަށް ފުރިހަމަ ކުރުމުގެ މަސައްކަތްވެސް ކުރިއަށްދާ ކަމަށް ހީނާ ވިދާޅުވިއެވެ.
ހީނާ ވިދާޅުވީ، އެކި އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއް ކަމަށާއި މިހެން ދިމާވަނީ ޒަމާނުއްސުރެ މިނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުން ކަމަށެވެ. އަދި ރައީސް ޑރ މުހައްމަދު މުއިއްޒުގެ ލަފާފުޅުގެ ދަށުން، މި މައްސަލަތައް އިސްލާޙު ކުރުމަށް މަސައްކަތް ކުރާނެ ކަމަށްވެސް ވިދާޅުވިއެވެ.
“ރައީސްގެ ލަފާފުޅުގެ ދަށުން، الله ގެ އިރާދަފުޅާއެކު އަޅުގަނޑުމެން އެކަން ބަދަލުކޮށް އިސްލާޙު ކުރާނަން،” އެންސްޕާގެ ސީއީއޯ، ހީނާ ވަލީދު