ހއ. ތަކަންދޫގައި ކުރިއަށް ގެންދިޔަ ފެނާއި ނަރުދަމާ ނިޒާމު ގާއިމްކުރުމުގެ މަސައްކަތްތައް ނިންމައި، ކޮމިޝަންކޮށްފިއެވެ. މި މަޝްރޫޢުގެ ދަށުން ރަށުގައި ފެނާއި ނަރުދަމާގެ ޚިދުމަތް ފޯރުކޮށްދިނުމަށް ބޭނުންވާ އެންމެހައި ވަސީލަތްތައް ގާއިމުކޮށް ނިމިފައިވާކަމަށް މަޢުލޫމާތު ލިބިފައިވެއެވެ.
މި މަޝްރޫޢުގެ ދަށުން ތަކަންދޫގައި ފެނުގެ ނިޒާމް ގާއިމްކުރުމަށްޓަކައި ފެން ޕްލާންޓް ބެހެއްޓުމަށް ހާއްސަ އިމާރާތެއް ކޮށްފައިވެއެވެ. މީގެ އިތުރުން ފެން ހޮޅީގެ މައި ނެޓްވޯކް އަޅައި، ގޭގެއަށް ފެނުގެ ކަނެކްޝަން ގުޅައިދީފައިވާކަމަށް މަޢުލޫމާތު ލިބެއެވެ. އަދި ފެން އުފެއްދުމަށް ބޯހޯލް ތޮރުފައި، ރިޖެކްޓް ލައިން އަޅައި، ފެން ރައްކާކުރުމަށް ފެން ތާނގީ ބަހައްޓާފައިވެއެވެ.
ނަރުދަމާ ނިޒާމުގެ މަސައްކަތުގެ ތެރޭގައި ނަރުދަމާގެ މައި ނެޓްވޯކް އާއި ޕަމްޕިން ލައިން އަޅައި، ޕަމްޕިން ސްޓޭޝަން ގާއިމްކޮށް، ސީ އައުޓްފޯލް އަޅާފައިވެއެވެ. އަދި ގޭގޭގައި ޖަންކްޝަން ބަހައްޓައި، ނަރުދަމާގެ ކަނެކްޝަން ގުޅައިދީފައިވާކަމަށްވެސް މަޢުލޫމާތު ލިބިފައިވެއެވެ.
މި މަޝްރޫޢުގެ ދަށުން ފެން ތަހުލީލު ކުރުމަށް ބޭނުންވާ ސާމާނާއި ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ވެހިކަލް ފޯރުކޮށްދެވޭނެކަމަށް ބުނެފައިވެއެވެ. މިއީ ރަށުގެ ފެނާއި ނަރުދަމާގެ ޚިދުމަތް ދެމެހެއްޓެނިވި ގޮތެއްގައި ފޯރުކޮށްދިނުމަށް އެޅޭ މުހިންމު ފިޔަވަޅެކެވެ.
ކޮންސްޓްރަކްޝަން މިނިސްޓްރީން މި މަޝްރޫޢު އެމްޑަބްލިއުއެސްސީއާ ހަވާލުކޮށްފައިވަނީ 72 މިލިއަން ރުފިޔާއަށެވެ.