ރާއްޖެއަށް އަންނަ ޕްރައިވެޓް ޖެޓުތަކަށް ހިދުމަތް ފޯރުކޮށްދިނުމުން ލިބޭ މަންފާ 100 އިންސައްތަ ދިވެހިން ހިއްސާވާ ކުންފުނިތަކަށް ވަންނަކަން ކަށަވަރުކުރުމަށް ފިޔަވަޅުތައް އަޅުއްވާނެ ކަމަށް ދަތުރުފަތުރާއި މަދަނީ އުދުހުންތަކާބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވުނު ނޭއްވުނު ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އަމީން ވިދާޅުވީ، ރާއްޖެއަށް ގިނަ އަދަދެއްގެ ޖެޓުތައް އަންނައިރު، ޖެޓް ހޭންޑްލިންގއަކީ ބޮޑު ވިޔަފާރިއެއް ކަމަށެވެ. ނަމަވެސް މި ވިޔަފާރީގެ ބޮޑު ބައެއް މިހާރު ހިންގަނީ ދިވެއްސެއްގެ ނަމުގައި އުފައްދައިގެން، ބޭރު ބަޔަކަށް މަންފާ ލިބޭ ގޮތަށް އޮންނަ ކުންފުނިތަކަކުން ކަމަށް ވަޒީރު ފާހަގަކުރެއްވިއެވެ.
"ރައީސް ޑރ. މުހައްމަދު މުއިއްޒުގެ ވިސްނުންފުޅަކީ ދިވެހި ފަސްގަނޑުން ލިބޭ މަންފާއަކީ ދިވެހި ރައްޔިތުންނަށް ނުވަތަ ކުންފުނިތަކަށް އޭގެ ފުރިހަމަ ގޮތުގައި ލިބޭ އެއްޗަކަށް ހެދުން. ސަރުކާރުން ބޭނުންވަނީ މިކަމުން މަންފާ ލިބޭ ކުންފުނިތަކަކީ 100 ޕަސެންޓް ދިވެހި ކުންފުނިތަކަށްވުން،" ވަޒީރު ވިދާޅުވިއެވެ.
މި މަގުސަދު ހާސިލުކުރުމަށްޓަކައި، އާ އަހަރު ފެށޭއިރަށް ހަރުދަނާ ބަދަލުތަކެއް ގެނެސް، ގަވާއިދުތަކަށް ވެސް ބަދަލު ގެންނާނެ ކަމަށް ވަޒީރު އަމީން ހާމަކުރެއްވިއެވެ. އަދި މި ދާއިރާގައި ހަރަކާތްތެރިވާ ދިވެހީން، އޭގެ މަންފާ ބޭރުގެ ފަރާތްތަކަށް ލިބޭ ގޮތަށް އިންތިޒާމުތައް ނުބެހެއްޓުމަށް އިލްތިމާސްކުރެއްވިއެވެ.
"އަޅުގަނޑުމެން ސަރުކާރުން މިހާރު ބަލާނަން އެ ކަންތައްތައް. އޮޑިޓް ވެސް ކުރާނަން. އެގޮތަށް ދިވެހި ކުންފުންޏެއް ހަދާފައި ބޭރު ކުންފުނިތަކަށް މަންފާ ލިބޭ ގޮތަށް އިންތިޒާމު ވެގެން ކުރާ ވިޔަފާރިއަށް ބަދަލު ގެންނާނަން،" ވަޒީރު އަމީން ވިދާޅުވިއެވެ.
މި ބަދަލުތަކާ އެކު، ޖެޓުތަކަށް ދޭ ހިދުމަތްތަކުން މަންފާ ލިބެނީ ދިވެހީންނާއި ދިވެހި ކުންފުނިތަކަށްކަން ޔަގީން ކުރެވޭނެ ކަމަށް ވެސް ވަޒީރު ވަނީ ވިދާޅުވެފައެވެ.
އަހަރުގެ ފަހުކޮޅު ލިބޭ ޗުއްޓީގައި ރާއްޖެއަށް އާންމު ގޮތެއްގައި ޖެޓުތައް އަންނައިރު، މިދިޔަ އަހަރުގެ ޑިސެމްބަރު މަހު ވެސް ވެލާނާ އިންޓަނޭޝަނަލް އެއަރޕޯޓަށް ރިކޯޑު އަދަދަކަށް ވަނީ ޖެޓު ޖައްސާފައެވެ. މި އަހަރުގެ ޑިސެމްބަރ މަހުގައި ވެސް މިފަދަ ރިކޯޑެއް އައު ވުމަކީ އެކަށީގެންވާ ކަމެކެވެ.
މި ބަދަލުތަކަކީ ހަމައެކަނި ޖެޓް ހޭންޑްލިންގ ދާއިރާއަށް އަމާޒުކޮށްގެން ގެންނަ ބަދަލުތަކެއް ނޫނެވެ. ރާއްޖޭގެ ފަތުރުވެރިކަމުގެ ދާއިރާއިން ލިބޭ މަންފާ ދިވެހިންނަށް އިތުރުކުރުމަށް ސަރުކާރުން ގެންގުޅޭ ފުޅާ ވިސްނުމުގެ ބައެކެވެ.