ފެނާއި ނަރުދަމާގެ ދާއިރާއަށް ތައްޔާރުކުރާ އެމަރޖެންސީ ރެސްޕޯންސް ޕްލޭން ތައްޔާރުކުރުމަށް އެކުލަވާލާ ގައިޑްބުކް އަދި ޓެމްޕްލޭޓް ވެލިޑޭޝަން ވޯކްޝޮޕް ބާއްވައިފިއެވެ.
ފެނާއި ނަރުދަމާގެ ދާއިރާއަށް އެމަރޖެންސީ ރެސްޕޯންސް ޕްލޭން ތައްޔާރުކުރުމަށް އެކުލަވާލާ ގައިޑްބުކް އަދި ޓެމްޕްލޭޓް ފައިނަލް ކުރުމަށް ވެލިޑޭޝަން ވޯކްޝޮޕެއް މިއަދު ބޭއްވިއްޖެއެވެ. މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގައި ބޭއްވުނު މި ވޯކްޝޮޕްގައި ކަމާގުޅޭ 15 މުއައްސަސާއަކުން 31 ފަންނީ ބޭފުޅުން ބައިވެރިވިއެވެ.
މި ވޯކްޝޮޕްގެ މަޤްޞަދަކީ ރަށްރަށުގައި ޤާއިމްކޮށްފައިވާ ފެނާއި ނަރުދަމާގެ ނިޒާމުތަކާއި، އެ ނިޒާމުތައް ހިންގައި ބެލެހެއްޓުމުގައި ހަރަކާތްތެރިވާ މުވައްޒަފުންނާއި ތަކެތީގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ދިމާވެދާނެ ކުއްލި ކާރިސާއަކާ ގުޅިގެން ނުވަތަ ނުރައްކާތެރި ހާލަތްތަކުގައި އަމަލު ކުރާނެ އެމަރޖެންސީ ރެސްޕޯންސް ޕްލޭނެއް އެކުލަވާލުމަށް އެހީތެރިވުމެވެ.
ވޯކްޝޮޕް ފައްޓަވައިދެއްވި މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އޮނަރަބަލް ޠާރިޤު އިބްރާހީމް ވިދާޅުވީ، ރައްޔިތުންނަށް ރައްކާތެރި އަދި ދެމެހެއްޓެނިވި ފެނާއި ނަރުދަމާގެ ޚިދުމަތްތައް ފޯރުކޮށްދިނުމަކީ ސަރުކާރުން އިސްކަންދޭ ކަމެއް ކަމަށެވެ. އަދި މިއީ ފެނާއި ނަރުދަމާގެ ދާއިރާއަށް ޚާއްޞަކޮށްގެން އެމަރޖެންސީ ރެސްޕޯންސް ޕްލޭނެއް އެކުލަވާލުމަށް މަސައްކަތްކުރެވޭ ފުރަތަމަ ފަހަރު ކަމަށްވެސް ވިދާޅުވިއެވެ.
މި ގައިޑްބުކްގައި ފެނާއި ނަރުދަމާގެ ޚިދުމަތް ފޯރުކޮށްދިނުމުގައި ކުރިމަތިވެދާނެ ކުއްލި ހާލަތްތަކަށް ތައްޔާރުވުމަށް އެޅިދާނެ ފިޔަވަޅުތަކާއި، ހިރާސްތައް ވަޒަންކުރުމާއި، އިސްލާހީ ފިޔަވަޅުތައް ދެނެގަތުން ހިމެނޭނެއެވެ. މީގެ އިތުރުން، ކުއްލި ހާލަތްތަކުގައި އަމަލުކުރާނެ ގޮތުގެ ޕްލޭނެއްވެސް ހިމެނޭނެއެވެ.
މި ގައިޑްބުކާ އެކު، ފެނާއި ނަރުދަމާގެ ޚިދުމަތްދޭ ކޮންމެ ރަށެއްގައި އެމަރޖެންސީ ރެސްޕޯންސް ޕްލޭނެއް އެކުލަވާލުމުގެ މަސައްކަތް ފެށިގެންދާނެއެވެ. މި ޕްލޭންގައި ފެނުގެ ކުއަލިޓީއާ ގުޅޭ މައްސަލަތަކާއި، ނަޖިސްފެން ލީކުވުމާއި، އުދައެރުން، ފެންބޮޑުވުން ފަދަ ކާރިސާތަކުގެ ސަބަބުން ފެނާއި ނަރުދަމާގެ ނިޒާމުތަކަށް ލިބިދާނެ ގެއްލުންތަކަށް އަލިއަޅުވާލެވޭނެއެވެ.