މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު، އަހުމަދު ޝިޔާމު ވިދާޅުވެފައިވަނީ ފަރުމަހުގެ މަސްވެރިކަމުގައި އުޅޭ ފަރާތްތަކުން ކުރަމުން އަންނަ ވިޔަފާރި އިތުރަށް ފުޅާ ކުރުމަށް މި ސަރުކާރުން 37 ފަރާތަކަށް ލޯނު ފައިސާ ދޫކޮށްފައިވާ ކަމަށެވެ.
މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ޝިޔާމު ވިދާޅުވީ ފަރުމަސްވެރިކަމަކީ ވަރަށް ބޮޑު ސިނާއަތެއް ކަމަށާއި، ވަރަށް ގިނަ އާއިލާތަކުން ފަރުމަސްވެރިކަމުން ލިބޭ އާމްދަނީން ދިރިއުޅުމުގެ ކަންކަން ފަރުޖައްސަމުން އަންނަ ކަމަށެވެ. އަދި މިއީ ވަރަށް ބޮޑު މާކެޓެއް ވެސް އޮތް ސިނާއަތެއް ކަމަށް ވަޒީރު ފާހަގަކުރެއްވިއެވެ.
ވަޒީރު ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން ފަރުމަސްވެރިކަން ކުރާ ފަރާތްތަކަށް ލުއިލޯނެއް ފޯރުކޮށްދިނުމުގެ ސިޔާސަތެއް ގެންގުޅުއްވި ކަމަށާއި، އެކަމަށް އެދި ހުށަހެޅުމުގެ ފުރުސަތު ވެސް ހުޅުވާލެވުނު ކަމަށެވެ. މިގޮތުން މިދިޔަ ފެބްރުއަރީ މަހުގެ 16 ވަނަ ދުވަހު ފަރުމަހުގެ މަސްވެރިކަން ކުރާ ފަރާތްތައް އިތުރު ކުރުމުގެ ގޮތުން 30 މިލިއަން ރުފިޔާގެ ލޯނު ފުރުސަތެއް ހުޅުވާލެވުނެވެ.
ވަޒީރު ޝިޔާމް ވިދާޅުވީ މި ލޯނަކީ އެއްވެސް ރަހުނަކާ ނުލައި، 10 އަހަރަށް ބަހާލައިގެން ދެއްކޭ ގޮތަށް ދޫކުރާ ލޯނެއް ކަމަށެވެ. އަދި މި ފުރުސަތު ހުޅުވާލެވުނީ ފަރުމަހުގެ މަސްވެރިކަން ކުރަން ޝައުގުވެރިކަން ހުންނަ ފަރާތްތަކަށް އެ ސިނާއަތުގައި ބޭނުންވާ ތަކެތި ހޯދައި، އެމަސައްކަތް ފެށުމުގެ ގޮތުން ކަމަށް ވެސް ވަޒީރު ފާހަގަކުރެއްވިއެވެ.
ވަޒީރު ވިދާޅުވި ގޮތުގައި ލޯނަށް ހުޅުވާލެވުނު ވަގުތު 121 އެޕްލިކޭޝަނެއް ލިބުނެވެ. އޭގެ ތެރެއިން 62 ފަރާތެއްގެ ލޯނު އެޕްރޫވްކޮށް، މިހާތަނަށް 37 ފަރާތަކަށް ފައިސާ ދޫކުރެވިފައިވާ ކަމަށް ވަޒީރު ވަނީ ވިދާޅުވެފައެވެ.
“މިއީ އަޅުގަނޑު ދެކޭ ގޮތުގައި ހަގީގަތުގައި ފަރުމަސްވެރިކަން ކުރާ ފަރާތްތަކަށް ހަމަ ކުރިން ދެންނެވިހެން ސަރުކާރަކުން މިހާތަނަށް ހުޅުވާލި އެންމެ ފަހި ފުރުސަތު.” ވަޒީރު ޝިޔާމު ވިދާޅުވިއެވެ.