ކުރިއަށް އޮތް 20 އަހަރު ދުވަހަށް ދިވެހިރާއްޖޭގެ ގައުމީ ތަރައްގީގެ ޕްލޭން އެކުލަވައިލުމުގެ މަސައްކަތުގައި ހުރިހާ ސިޔާސީ ޕާޓީތަކުންނާއި، ހުރިހާ ރައްޔިތުން ވެސް ބައިވެރިވުމަށް ރައީސް ޑރ. މުޙައްމަދު މުޢިއްޒު އެދިވަޑައިގެންފިއެވެ.
ދިވެހިރާއްޖޭގެ 20 އަހަރު ދުވަހުގެ ގައުމީ ތަރައްގީގެ ޕްލޭން އެކުލަވައިލުމުގެ މަސައްކަތް އިފުތިތާހު ކުރުމަށް މިއަދު ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ރައީސް ޑރ. މުޢިއްޒު ވިދާޅުވީ ރިޔާސީ އިންތިޚާބުގެ ކެމްޕޭންތެރޭގައި އެމަނިކުފާނު ވެވަޑައިގެންނެވި އެންމެ މުހިންމު އެއް ވައުދުފުޅަކީ ދެމެހެއްޓެނިވި ތަރައްގީއެއްގެ ވިސްނުމުން ރާއްޖޭގެ ހުރިހާ ރައްޔިތުން ޝާމިލްވެގެން 20 އަހަރު ދުވަހު ތަރައްގީގެ ޕްލޭނެއް އެކުލަވައިލަން ކަމަށެވެ.
ރައީސް ވިދާޅުވީ ގައުމުގެ ތަރައްގީގެ ޕްލޭންގެ މަަސައްކަތަކީ ވަރަށް ވަރަށް މުހިންމު ކަމެއްދީގެން ކުރަންޖެހޭ ކަމެއް ކަމަށާއި،
ސިޔާސީ އޮއިވަރުގައި ޖެހިގެން އެއިރެއްގައި އޮންނަ ސަރުކާރެއްގެ ވިސްނުމާ އެއްގޮތަށް އަބަދު އަބަދު ބަދަލުތަކެއް އަންނަ ގޮތަށް ގައުމުގެ ތަރައްގީގެ ކަންކަން ގެންދަންވެއްޖިއްޔާ ރައްޔިތުންނަށް އެންމެ ހެޔޮ ގޮތެއް ނުލިބޭނެ ކަމަށެވެ.
އޭގެ ބަދަލުގައި ރައްޔިތުން ކަނޑައަޅާފައި އޮންނަ މަގަކުން ދާން ބޭނުންވާ މިސްރާބަށް ދެވޭ ގޮތަށް ކަންކަން ބައްޓަންވެއްޖެނަމަ އެންމެ ފުރިހަމަ ގޮތުގައި ރައްޔިތުންނަށް ފައިދާވާނެކަން ރައީސް ފާހަގަކުރެއްވިއެވެ.
އެހެންވެ އަޅުގަނޑު ނިންމީ މިކަން މިގޮތަށް ކުރަން. ގާނޫނެއް ވެސް މިކަމަށް ޚާއްސަ ގޮތަކަށް ފަރުމާކުރެވިގެން މިކަމަށް ޚާއްސަ ގާނޫނެއް، ގައުމީ ތަަރައްގީއާބެހޭ ގާނޫނެއް ވެސް ތައާރަފުކޮށްގެން މިކަން ކުރިއަށްގެންދަން.
ރައީސް ވިދާޅުވީ 2040 ވަނަ އަހަރު އަންނައިރު ރާއްޖޭގެ ޖީޑީޕީގެ މިންގަނޑާއި އަދި ޖުމްލަކޮށް ހިއުމަން ޑިވެލޮޕްމަންޓް އިންޑެކްސްގައާއި ހުރިހާ ގޮތަކުން ދިވެހިރާއްޖެއަކީ ޑިވެލޮޕް ނޭޝަނެއްގެ ސްޓޭޓަސް ލިބޭ ގައުމަކަށް ހަދަން ބޭނުންވެވަޑައިގަންނަވާ ކަމަށް ޔޫއެންގައި ވާހަކަފުޅު ދައްކަވަމުން ވިދާޅުވެފައިވާނެ ކަމަށެވެ. އެ ހިސާބަށް ދެވޭނީ ވަރަށް ގިނަ ކަންތައްތަކެއް ކޮށްގެން ކަމަށާއި، އަޒުމަކާއެކީގައި، އެކުވެރިކަމާއެކީގައި، ގައުމީ ވިސްނުމެއްގައި މަސައްކަތްކޮށްފިނަމަ ހާސިލުވާނެ ކަމަށް ރައީސް ވިދާޅުވިއެވެ.
މިއަދު މި ފެށޭ މަސައްކަތް ރާއްޖޭގެ ހުރިހާ ރަށެއްގައި ކުރިއަށްގެންދާނެކަން ފާހަގަކުރައްވަމުން ރައީސް ވިދާޅުވީ ހުރިހާ ރަށެއްގެ ރައްޔިތުން ވެސް މި ޕްލޭނަށް ޚިޔާލު ދޭންޖެހޭ ކަމަށާއި، އަދި ހުރިހާ ދާއިރާތަކުގެ ބޭފުޅުންނާއި، ސިޔާސީ ޕާޓީތަކުންނާއި ޖަމްއިއްޔާތަކުން ވެސް މިކަމުގައި ބައިވެރިވުމަކީ އެމަނިކުފާނު އެދިވަޑައިގަންނަވާ ކަމެއް ކަމަށެވެ.
”އަޅުގަނޑު އެދެން ހުރިހާ ސިޔާސީ ޕާޓީތަކުން ވެސް ސިޔާސީ ވިސްނުން ދޫކޮށްލާފަ މީ ގައުމީ މަސައްކަތެއްގެ ގޮތުގަ ދެކިގެން [ބައިވެރިވާން]. ގައުމީ ތަރައްގީގެ ވާހަކަ މި ދައްކަނީ.” ރައީސް ވިދާޅުވިއެވެ.