ދިވެހިރާއްޖޭގެ ގައުމީ ތަރައްގީގެ 20 އަހަރުގެ މާސްޓަރޕްލޭންގެ މަސައްކަތް ފެށުމާ ގުޅިގެން، ރާއްޖޭގެ ފުރަތަމަ ޕްލޭނިންގ މިނިސްޓަރު ހަމްދޫން ޙަމީދު، ރައީސް ޑރ. މުޙައްމަދު މުޢިއްޒަށް ތައުރީފުކުރައްވައި، ޝުކުރު އަދާކުރައްވައިފިއެވެ.
ރައީސް ޑރ. މުޢިއްޒު، ގައުމީ ތަރައްގީގެ 20 އަަހަރުގެ މާސްޓަރޕްލޭންގެ މަޝްވަރާތައް އިފްތިތާހުކޮށްދެއްވާފައިވަނީ އެކަމަށްޓަކައި މިއަދު ހެނދުނު ބޭއްވި ރަސްމިއްޔާތެއްގައެެވެ.
މި ރަސްމިއްޔާތުގައި ވަނީ މާސްޓަރޕްލޭންގެ މަޝްވަރާ ބައްދަލުވުމުގެ ޕެނަލް ޑިސްކަޝަން ފަށާފައެވެ. މި ޕެނަލް ޑިސްކަޝަންގައި ބެލެނިވެރިންނާއި، މުދައްރިސުންނާއި، ދަރިވަރުންނާއި، މުއައްސަސާތަކާއި، ސިވިލް ސޮސައިޓީއާއި، ޚާއްސައެހީއަށް ބޭނުންވާ ފަރާތްތަކާއި، އަދި އެކި ދާއިރާތަކުގެ ޕްރޮފެޝަނަލުން ބައިވެރިވިއެވެ.
ޕެނަލް ޑިސްކަޝަންގައި ޚިޔާލު ފާޅުކުރައްވަމުން ހަމްދޫން ވިދާޅުވީ ކޮންމެ ސިޔާސަތެއް އޮތަސް، ކޮންމެ މަޖިލީހެއް އޮތަސް، ކޮންމެ ސަރުކާރެއް އޮތަސް، ނުވަތަ ކޮންމެ ޕާޓީއެއް ވެރިކަމަށް އަޔަސް ގައުމީ ތަރައްގީގެ ހުރިހާ މަރުހަލާއެއްގައި އަދި ހުރިހާ ދާއިރާއެއްގައި ވެސް ވަކި އުސޫލުތަކެއް ދަމަހައްޓަންޖެހޭ ކަމަށެވެ.
ދެމެހެއްޓެނިވި ގައުމީ ތަރައްގީއަކަށް ވިސްނާއިރު އަޅުގަނޑު ވަރަށް އުފާކުރަން އިއްޒަތްތެރި ރައީސްގެ ވާހަކަފުޅުގަ އަޅުގަނޑު ދަންނަވަން ބޭނުން ބައެއް ނުކުތާތައް ފާހަގަކުރެއްވިކަން. އެއްގޮތް ޚިޔާލުތަކެއް އޭގައި ހުރިކަން.
ހުރިހާ މަސައްކަތެއްގެ ތެރޭގައި ވެސް ގައުމުގެ ސިޔާދަތާއި އިސްތިގުލާލަށް ވަރަށް ބޮޑަށް ވިސްނަންޖެހޭނެ ކަމަށާއި،
އަންހެނުންގެ ބައިވެރިވުމާއި، ބާރުވެރިކުރުން ހުރިހާ މަރުހަލާއެއްގައި ހުރިހާ ދާއިރާއެއްގައި ހިމަނަންޖެހޭ ކަމަށް ހަމްދޫން ވިދާޅުވިއެވެ.
ގުދުރަތީ ގޮތުން ރާއްޖެ އުފެދިފައި އޮންނަ ގޮތަށް ބަލާއިރު، ރަށްރަށުގެ ތިމާވެށްޓަށް ވަރަށް ވިސްނަންޖެހޭ ކަމަށާއި މީ ހުރިހާ މަޝްރޫއުއެއްގެތެރޭގައި ވެސް ހިމަނަންޖެހޭ ބޮޑު ކަމެއް ކަމަށް ވެސް ހަމްދޫން ވިދާޅުވިއެވެ.
އެންމެ މުހިންމު އެއްކަމެއްގެ ގޮތުގަ އަޅުގަނޑު ފާހަގަކޮށްލަން ބޭނުންވަނީ ރާއްޖޭގެ ހާލަތު ހުރި ގޮތުން ރާއްޖޭގެ އާބާދީގެ ފެތުރުމާއި އެކި ފަންތީގަ މީހުން ތިބި ގޮތާއި އަދި އާބާދީގެ އުމުރުފުރާތައް މިހާރު ބަދަލުވަމުން އަންނަ ގޮތަށް ބަލާފަ އެއަށް ރިއާޔަތްކޮށްފަ ހުރިހާ މަޝްރޫއުއެއްގަ ވިސްނުން ގެންގުޅެން އެބަޖެހޭ. އާބާދީގެ ތަރައްގީގެ އެއްފަސްކުރުވާ ވާހަކަ ރައީސް މެންޝަން ކުރައްވައިފި އަޅުގަނޑު ވަރަށް އުފާކުރަން. އަދި އެއާ ގުޅިގެން ސަރަހައްދީ ތަރައްގީ ގެންނަން އެބަޖެހޭ. އަދި އުމްރާނީ ތަރައްގީ އަންނަންވީ ހަމައެކަނި މާލެ ސަރަހައްދަކަށް ނޫން. އުމްރާނީ ތަރައްގީ އެބަ އަންނަންޖެހޭ ސަރަހައްދުތަކަށް ވެސް.
ހަމްދޫންގެ ވާހަކަފުޅު ނިންމަވައިލައްވަމުން ވަނީ ސިޔާސީ ވާދަވެރިކަމެއްގެ ތެރޭގައި ގައުމީ ތަރައްގީ ހިސޯރުވެގެންދިޔަ ނުދިނުމަށް ވެސް ރައީސްގެ އަރިހުގައި އެދިވަޑައިގަންނަވާފައެވެ.
އަދި މިފަދަ ބޮޑު ގައުމީ ތަރައްގީގެ މަސައްކަތެއް ފަށްޓަވައިދެއްވި ކަމަށްޓަކައި ހަމްދޫން ވަނީ ރައީސަށް ޝުކުރު ދަންނަވައިފައެވެ.