މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް 2023 ވަނަ އަހަރު އާމްދަނީގެ ގޮތުގައި 2،009 މިލިއަން ރުފިޔާ ލިބިފައިވާކަމަށް އެ ކުންފުނިން އާންމުކުރި އަހަރީ ރިޕޯޓުގައި ހާމަކޮށްފިއެވެ.
މިފްކޯގެ ރިޕޯޓުގައިވާ ގޮތުން، މިދިޔަ އަހަރު ރާއްޖެއިން ބޭރަށް މަސް އެކްސްޕޯޓްކޮށްގެން 1،731 މިލިއަން ރުފިޔާގެ އާމްދަނީއެއް ލިބިފައިވެއެވެ. މިއީ ޖުމްލަ 62،352 މެޓްރިކް ޓަނުގެ މަހެވެ. 2022 ވަނަ އަހަރާ އަޅާބަލާއިރު މިއީ 297 މިލިއަން ރުފިޔާގެ ކުރިއެރުމެކެވެ. 2022 ވަނަ އަހަރު 55،989 މެޓްރިކް ޓަނުގެ މަސް އެކްސްޕޯޓްކޮށްގެން ލިބިފައިވަނީ 1ައިވަނީ 1،434 މިލިއަން ރުފިޔާއެވެ.
މިފްކޯއިން ބުނެފައިވާ ގޮތުގައި، މިދިޔަ އަހަރުގެ އާމްދަނީ އިތުރުވެފައިވަނީ މަސް އެކްސްޕޯޓް ކުރުމުގައި އަގު ބޮޑުކޮށް ވިއްކާލެވުމުގެ ސަބަބުންނެވެ. އެންމެ ބޮޑު އެކްސްޕޯޓެއް ކޮށްފައިވަނީ ވިއެޓްނާމް އަދި މޮރިޝަސް ފަދަ އައު މާކެޓުތަކަށެވެ. ވިއެޓްނާމަށް 62،352 މެޓްރިކް ޓަނުގެ މަސް އެކްސްޕޯޓްކޮށްގެން 2 ޕަސެންޓުގެ އާމްދަނީއެއް ލިބިފައިވާއިރު، މޮރިޝަސްއަށް 2،177 މެޓްރިކް ޓަނުގެ މަސް އެކްސްޕޯޓްކޮށްގެން 4 ޕަސެންޓުގެ އާމްދަނީއެއް ލިބިފައިވެއެވެ.
އެންމެ ބޮޑު އާމްދަނީއެއް ލިބިފައިވަނީ ތައިލެންޑުގެ މާކެޓުންނެވެ. މިދިޔަ އަހަރު ތައިލެންޑަށް 59،142 މެޓްރިކް ޓަނުގެ މަސް އެކްސްޕޯޓްކޮށްގެން 84 ޕަސެންޓުގެ އާމްދަނީއެއް މިފްކޯއަށް ލިބިފައިވެއެވެ.
މީގެ އިތުރުން، 2023 ވަނަ އަހަރު 227،910 ކޭސް މަސްދަޅު އެކްސްޕޯޓްކޮށްގެން 149 މިލިއަން ރުފިޔާގެ އާމްދަނީއެއް ލިބިފައިވެއެވެ. މިއީ 2022 ވަނަ އަހަރާ އަޅާބަލާއިރު 5 މިލިއަން ރުފިޔާގެ ކުރިއެރުމެކެވެ. އަދި މަހުގެ އެހެނިހެން ބާވަތްތައް އެކްސްޕޯޓްކޮށްގެން 28 މިލިއަން ރުފިޔާ ލިބިފައިވެއެވެ.
ލޯކަލް ވެލިއު އެޑެޑް ސާވިސްއަށް ބަލާއިރު، 2022 ވަނަ އަހަރު 258 މިލިއަން ރުފިޔާ ލިބިފައިވާއިރު، 2023 ވަނަ އަހަރު މި އަދަދު 322 މިލިއަނަށް އިތުރުވެފައިވެއެވެ. އަދި ރާއްޖޭގެ މާކެޓުން މަހުގެ ބާވަތްތަކާއި މަސްދަޅުތަކަށް މިފްކޯއަށް 287 މިލިއަން ރުފިޔާ ލިބިފައިވާކަމަށް ރިޕޯޓުގައި ބަޔާންކޮށްފައިވެއެވެ.