ދައުލަތުގެ ޚަޒާނާއިން ލޯ ލާރިފޮއްޗެއް ވެސް ނުބައި ގޮތެއްގައި ގެއްލިގެންދާކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިނުގަންނަވާ ކަމުގައި ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމެންޓްރީ ގުުރޫޕްގެ ލީޑަރުކަން ކުރައްވާ އިނގުރައިދޫ ދާއިރާގެ މެންބަރު އިބްރާހިމް ފަލާހް މިއަދު ވިދާޅުވެއްޖެއެވެ.
ފަލާހް މިފަދައިން ވިދާޅުވީ ރައްޔިތުންގެ މަޖިލީހުގެ ޖަލްސާގައި، ދިވެހިރާއްޖޭގެ ގާނޫނުލްއުގޫބާތަށް އިސްލަާހު ގެނައުމުގެ ބިލަށް ބަހުސްކުރައްވައި ދެއްކެވި ވާހަކަފުޅުގައެވެ.
ފަލާހް ވިދާޅުވީ މީގެކުރިން މި ގާނޫނުގައި ނުހައްގުން މުއްސަނދިކަން ހޯދައި ލިބިގަތުމުގެ ކުށް ކަނޑައަޅާފައިވާ ގޮތުން ގާނޫނު މާނަކުރުމުގައި އޮޅުންއަރާތީ، 515 ވަނަ މާއްދާ ސާފުވާނޭ ގޮތަށް މިހާރު މިވަނީ ސަރުކާރުގެ ފަރާތުން އިސްލާހު ހުށަހަޅާފައި ކަމަށެވެ.
ނުހައްގު މުއްސަނދިކަމަކީ ހަގީގަތުގައި ވެސް
ވަރަށް ނުރައްކާތެރި، ވަރަށް ގެއްލުން ބޮޑު ކަމެއްކަން ފާހަގަކުރައްވަމުން، ފަލާހް ވިދާޅުވީ މިކަމުގެ ސަބަބުން އެ ގައުމެއްގެ ދައުލަތާއި، ރައްޔިތުންނަށް ވަރަށް ބޮޑެތި، ވަރަށް ނުރައްކާތެރި ގެއްލުންތައް ލިބޭނެ ކަމަށެވެ. އަދި ނުހައްގު މުއްސަނދިކަމަކީ މާތްވެގެންވާ އިސްލާމްދީނުގައި ވަރަށް ބޮޑަށް ނަހީކުރައްވައި މަނާކުރައްވައިފައިވާ ނުބައި އަމަލެއްކަން ވެސް ފަލާހްގެ ވާހަކައިގައި ފާހަގަކުރެއްވިއެވެ.
ހަގީގަތުގައި އަޅުގަނޑު ދަންނަވާނީ މި ފަދަ ބިލެއް މިއަދުގެ ސަރުކާރުން ގައިމު ވެސް އިއްޒަތްތެރި މި މަޖިލީހަށް ހުށަހަޅައި، މި އިސްލާހުތައް ގެނެސް މި ބިލު ފުރިހަމަކުރަން މަސައްކަތް ކުރާނީ މިއަދުގެ ރައީސުލްޖުމްހޫރިއްޔާގެ ހިތްޕުޅުގައި މި ގައުމާ ދޭތެރޭގައި އޮތް އިޚުލާސްތެރި ލޯތްބާއި، މި ގައުމުގެ ހުރި ހަރު މުދަލާއި، މި ގައުމަށް ލިބޭ އާމްދަނީއާއި، މި ގައުމުގެ ޚަޒާނާއިން އެންމެ ލޯ ލާރިފޮއްޗެއް ވެސް ނުބައި ގޮތެއްގައި ގެއްލިގެންދިޔުމަށް އެ މަނިކުފާނު ނޭދޭތީކަން ޔަގީން މިފަދަ ބިލެއް، މި ފަދަ އިސްލާހެއް ގާނޫނަށް ހުށަހަޅުއްވާނީ.