ހުޅުމާލެ ފަޅުތެރޭގައި، ވެމްކޯ ޖެޓީ ސަރަހައްދުގައި އޮތް “ބުލޫވޭގާ” ނަމަކަށް ކިޔާ ސަފާރީއެއްގައި ރޯވި އަލިފާންގަނޑު ނިއްވައިފިއެވެ. މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފައިވާ ގޮތުގައި، އަލިފާނުގެ ހާދިސާގެ މައުލޫމާތު ލިބުމާއެކު ވަގުތުން އަލިފާން ނިއްވާ މީހުން ސީންއަށް ދިޔައެވެ.
އެ ހާދިސާ ހިނގިއިރު ސަފާރީގައި 12 ފަޅުވެރިން ތިބި ކަމަށާއި، އޭގެ ތެރޭގައި 7 ދިވެހިންނާއި ސްރީލަންކާ، ބަންގްލަދޭޝް އަދި އިންޑިއާއަށް ނިސްބަތްވާ 5 ބިދޭސީން ހިމެނޭ ކަމަށް އެމްއެންޑީއެފްއިން މައުލޫމާތު ދީފައިވެއެވެ. ނަމަވެސް، އެ މީހުން ކައިރީގައި އޮތް ޑައިވިންގ ދޯންޏަކަށް އަރުވާ ސަލާމަތްކުރެވުނު ކަމަށާއި އެއްވެސް މީހަކަށް އަނިޔާއެއް ލިބިފައި ނުވާ ކަމަށްވެސް އެމްއެންޑީއެފްއިން ބުނެފައިވެއެވެ.
ސަފާރީގެ ކެޕްޓަންއާ ހަވާލާދީ އެމްއެންޑީއެފްއިން ބުނެފައިވާ ގޮތުގައި، އަލިފާން ރޯވި އިރު ސަފާރީގައި ހުރީ ޑައިވިންގ ކުރުމަށް ބޭނުންކުރާ ސާމާނެވެ. ނަމަވެސް އަލިފާނުގެ ހާދިސާ ހިނގަން މެދުވެރިވި ސަބަބު އަދި ހާމަކޮށްފައެއް ނުވެއެވެ.
އެމްއެންޑީއެފްއިން އާންމުކޮށްފައިވާ ފޮޓޯތަކުން ފެންނަ ގޮތުގައި ސަފާރީ ވަނީ ގާތްގަނޑަކަށް އަނދާ ހުލިވެފައެވެ. އަދި ހާދިސާ ހިނގިތާ 8 ގަޑިއިރު ފަހުންވެސް އަލިފާންގަނޑު ނިއްވުމުގެ މަސައްކަތް ކުރިއަށްދިޔަ ކަމަށް އެމްއެންޑީއެފްއިން ބުނެފައިވެއެވެ.