ވެލާނާ އިންޓަރނޭޝަނަލް އެއަރޕޯޓްގެ އައު ފިއުލްފާމާއި ފިއުލް ހައިޑްރަންޓް ނިޒާމުގެ ޚިދުމަތް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިފްތިތާޙު ކޮށްދެއްވައިފިއެވެ.
މިކަމަށްޓަކައި ވެލާނާ އިންޓަރނޭޝަނަލް އެއަރޕޯޓްގައި ބޭއްވުނު ޚާއްސަ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި އެމަނިކުފާނުގެ ނައިބު އަލްއުސްތާޛު ޙުސައިން މުޙައްމަދު ލަތީފާއި، ސަރުކާރާއި އެމްއޭސީއެލްގެ އިސްވެރިންނާއި އެއަރލައިންތަކުގެ ބޭފުޅުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރ އިބްރާޙިމް ޝަރީފް މުޙައްމަދު ވިދާޅުވީ، އައު ފިއުލް ފާމުގައި 45 މިލިއަން ލީޓަރުގެ ޖެޓް ފިއުލް ރައްކާކުރެވޭނެ ކަމަށެވެ. މީގެ އިތުރުން 1 މިލިއަން ލީޓަރުގެ ޑީސަލާއި، 100،000 ލީޓަރުގެ ޕެޓްރޯލް ރައްކާކުރެވޭނެ ކަމަށްވެސް އެމަނިކުފާނު ވިދާޅުވިއެވެ.
ވެލާނާ އިންޓަރނޭޝަނަލް އެއަރޕޯޓްގެ އައު ފިއުލްފާމާއި ފިއުލް ހައިޑްރަންޓް ނިޒާމުގެ ޚިދުމަތް، އިފުތިތާހު ރަސް މިއްޔާތުގެ ތެރެއިން
ފިއުލް ހައިޑްރަންޓް ނެޓްވޯކާ ގުޅިގެން، ފްލައިޓްތަކަށް ތެޔޮ އެޅުމަށް ހޭދަވާ ވަގުތު ވަރަށް ބޮޑަށް ކުޑަކުރެވޭނެ ކަމަށް ޝަރީފް ފާހަގަކުރެއްވިއެވެ. މި ޚިދުމަތް ދިނުމަށް 8.4 ކިލޯމީޓަރުގެ ވިއުގައެއް އަޅާފައިވާ ކަމަށާއި، މި ނިޒާމް ބޭނުންކޮށްގެން އެއްފަހަރާ 7 ބޯޓަށް ތެޔޮ އެޅުމުގެ ޚިދުމަތް ދެވޭނެ ކަމަށް އެމްއޭސީއެލްއިން ބުނެއެވެ.
"ކުރިން އޮތް ޕްލޭނަށް މަސައްކަތްތައް ދާނަމަ 2026އަށްވެސް މިމަސައްކަތް ނުނިމޭނެ. ރައީސް ވަރަށް ބޮޑަށް މަސައްކަތްކުރައްވާ އެއަރޕޯޓް މަޝްރޫޢު އަވަސްކުރަން. އައު ޓަރމިނަލްގެ ޚިދުމަތްތަކަށްވެސް މީގެ ލުއިކަން ލިބޭނެ." އެމްއޭސީއެލްގެ އެމްޑީ ޝަރީފް ވިދާޅުވިއެވެ.