ރަށްރަށުގައި ތިބެގެން ދަރިވަރުންނަށް ކިޔެވޭނެ އިންތިޒާމް ފަހިކޮށްދިނުމުގެ މަސައްކަތް ކުރަމުންދާކަމަށް ތައުލީމާއި ބެހޭ ވަޒީރު ޑރ. އިސްމާއީލް ޝަފީއު ވިދާޅުވެއްޖެއެވެ. ވަޒީރު މިފަދައިން ވިދާޅުވީ މުދައްރިސުން ތަމްރީނުކުރުމުގެ ޤައުމީ ޕްރޮގްރާމް އިފްތިތާހް ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒީރު ޝަފީއު ވިދާޅުވީ، ރައީސް ޑރ. މުޙައްމަދު މުއިއްޒު ކެމްޕޭނަށް ވަޑައިގެންނެވިއިރުއާއި އޭގެ ފަހުން އަތޮޅުތެރެއަށް ކުރެއްވި ދަތުރުފުޅުތަކުގައި ވެސް ރަށުގައި ހުރެގެން މަތީ ތައުލީމުގެ ފުރުސަތު ފަހިކޮށްދެވުމަށް ގިނަ ރައްޔިތުންތަކެއް އެދުނު ކަމަށެވެ. މި ކަމަށް އިޖާބަދިނުމުގެ ގޮތުން، ގައުމީ ޔުނިވަރސިޓީ، އިސްލާމިކް ޔުނިވަރސިޓީ، ވިލާ ކޮލެޖު އަދި ޔޫއޭއީގެ އެހީތެރިކަމާއެކު ވީހާވެސް ގިނަ މާއްދާތަކެއް ދަރިވަރުން ރަށުގައި ތިބެގެން ކިޔެވޭނެ މަގު ފަހިކޮށްދިނުމަށް އެއްބަސްވެފައިވާ ކަމަށް ވަޒީރު ހާމަކުރެއްވިއެވެ.
“މާލެއަށް ހިޖުރަކޮށް މާލޭގައި ދިރިއުޅުމުގެ ހަރަދުތައް ބެލެހެއްޓުމަކީ ކޮންމެ ކޮންމެ އާއިލާއަކަށް ކުޅަދާނަ ކަމަކަށް ނުވާނެ. އެހެންވީމަ ރައީސްގެ ސިޔާސަތުގައިވާ ގޮތުގެ މަތިން ދަރިވަރުންނަށް އެ ކުދިންނަށް ރަށުގައި ތިބެގެން ކިޔެވޭނެ ގޮތެއް ފަހިކޮށްދިނުމުގެ މަސައްކަތް ދަނީ ކުރަމުން،” ވަޒީރު ޝަފީއު ވިދާޅުވިއެވެ.
މީގެއިތުރުން، ވަޒީރު ފާހަގަކުރެއްވީ ޓީޗަރުންގެ އަގު ވަޒަންކުރެވި، ޓީޗަރުންނަކީ މުޖްތަމައުގެ ތެރޭގައި ގަދަރުވެރި ޝަރަފުވެރި ބައެއްގެ ގޮތުގައި ވެގެންދިއުމަކީ ރައީސް ޑރ. މުޢިއްޒު ވަރަށް އިސްކަން ދެއްވާ ކަމެއް ކަމަށެވެ. މި މަޤްޞަދު ހާސިލުކުރުމަށްޓަކައި، އެ ވުޒާރާގެ ފަރާތުން ކޮމިއުނިޓީ އެވެއާނަސް ޕްރޮގްރާމްތަކުގެ އިތުރަށް ސްކޫލްތަކުގައި މުދައްރިސުންނަށް ވީހާވެސް ފަހި މާހައުލެއް ގާއިމްކުރުމުގެ މަސައްކަތް ކުރަމުން އަންނަ ކަމަށް ވަޒީރު ވިދާޅުވިއެވެ.