ހުޅުމާލޭގެ ފުލެޓެއް ތެރޭގައި ރަހީނުކޮށްގެން ގެންގުޅުނު މީހަކު ސަލާމަތްކޮށް، އެކަމާ ގުޅިގެން 12 މީހަކު ހައްޔަރުކޮށްފިއެވެ. މި ހާދިސާ ހިނގާފައިވަނީ ހުޅުމާލޭ ދެވަނަ ފިޔަވަހީގެ ހިޔާގެ ނުވަވަނަ ޓަވަރުގައި ހުންނަ ފުލެޓެއްގެ ތެރޭގައެވެ.
ފުލުހުން މަޢުލޫމާތު ދެމުން ބުނެފައިވަނީ މި މައްސަލައިގެ ރިޕޯޓު ލިބިފައިވަނީ މިއަދު ރޭ 8:00 ހާއިރު ކަމަށެވެ. މި މަޢުލޫމާތު ލިބުމާއެކު، ފުލުހުންގެ އިންޓެލިޖެންސް، ގޭންގު ކްރައިމްސް އޮޕަރޭޝަން ޔުނިޓު އަދި ހުޅުމާލޭ ކްރައިމްސް ޑިޕާޓްމަންޓު ގުޅިގެން މަޢުލޫމާތު އެއްކުރުމުގެ މަސައްކަތް ފަށައި، ކުޑައިރުކޮޅެއްގެ ތެރޭގައި ހިޔާ ޓަވަރުގެ އެ ފުލެޓު ދެނެގަނެވުނެވެ.
ރަހީނު ކޮށްގެން އެމީހާ ގެންގުޅުނު ފުލެޓުތެރެ، ރަހީނުކުރި މީހާގެ ބޮލުގެ އިސްތަށިގަނޑު ކޮށާލާފައި……. ފޮޓޯ: ވޮއިސް
ކޯޓު އަމުރެއްގެ ދަށުން ފުލުހުން ފުލެޓުގެ ދޮރު ވައްޓާލައި އެތެރެއަށް ވަން އިރު، ގޭންގަކަށް ނިސްބަތްވާ މީހުން ވަނީ ރަހީނު ކޮށްގެން ގެންގުޅުނު މީހާގެ ބޯ ބާލާފައެވެ. އަދި އެވަގުތު އެމީހުން މަސައްކަތް ކުރަމުން ދިޔައީ އޭނާގެ އިނގިލިތައް ބުރިކޮށްލުމަށް ކަމަށް ރަހީނުގައި ހުރި މީހާ މަޢުލޫމާތު ދީފައިވާކަމަށް ފުލުހުން ހާމަކޮށްފައިވެއެވެ
ފުލުހުން އިތުރަށް ބުނެފައިވަނީ މި ފުލެޓަކީ މަސްތުވާތަކެތި ބޭނުންކޮށް، އެތަކެތީގެ ވިޔަފާރި ހިންގާ ތަނެއްކަން ފާހަގަ ކުރެވިފައިވާ ކަމަށެވެ. އަދި އެތަނުން މަސްތުވާތަކެތި ވެސް ފެނިފައިވާ ކަމަށް ފުލުހުން މަޢުލޫމާތު ދީފައިވެއެވެ.
މި ހާދިސާއާ ގުޅިގެން ރަހީނުގައި ހުރި މީހާ މިހާރު ވަނީ ރައްކާތެރި މާޙައުލަކަށް ގެންގޮސްފައެވެ. އަދި މި މައްސަލައިގައި ތުހުމަތުކުރެވޭ 12 މީހަކު ހައްޔަރު ކޮށްފައިވާކަން ފުލުހުން ހާމަކޮށްފައިވެއެވެ.
ފުލުހުން މިހާރު ދަނީ މި މައްސަލައިގެ ތަޙުޤީޤު ކުރިއަށް ގެންދަމުންނެވެ.