“ޙައްޤަކާ ނުލައި، ފިރިމީހާގެ ގާތުން ވަރިވާން އެދޭ އަންހެނާގެ މައްޗަށް ސުވަރުގޭގެ ވަސް ޙަރާމްވެގެންވާ ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާ އަލިއަޅުއްވާފައިވަނީ ވަރިކުރުމާއި ޢިއްދާއާ ބެހޭ ޙުކުމްތަކުގެ މައްޗަށެވެ. އެގޮތުން ކައިވެންޏަކީ މަތިވެރި ގުޅުމެކެއް ކަމަށާއި، ޒަވާޖީ ޙަޔާތުގެ ގުޅުމަށް ބުރޫއަރާ ފަދަ ކަމެއް މެދުވެރިވެއްޖެ ޙާލަތެއްގައި، ޢަމަލުކުރާންވީ ޝަރުޢީ ގޮތް ކީރިތި ޤުރްއާނުގައި ބަޔާން ވެގެންވާކަމަށެވެ.
ހާއްސަކޮށް ވަރިކުރުމާއި އިއްދައާއި ބެހޭ ހުކުމްތައްކާ ގުޅޭ ގޮތުން ފާހަގަކޮށްފައިވަނީ ޝަރުޢީ ސަބަބަކާ ލައިގެން މެނުވީ، އަނބީން އެކަނބަލުންގެ ފިރީންގެ ގާތުން ވަރިވާން އެދުމަކީ، އިސްލާމްދީނުގައި ނަހީކުރައްވައިފައިވާ ކަމެއް ކަމަށެވެ.
ދެ މީހުންގެ ދެމެދުގައި ދެކޮޅުވެރިކަމެއް އުފެދި، އެކަމާމެދު ތިޔަބައިމީހުން ބިރުގެންފިނަމަ، އޭނާގެ أهلވެރީންގެ ތެރެއިން ނިޔާވެރިޔަކާއި، އެކަނބުލޭގެ أهلވެރީންގެ ތެރެއިން ނިޔާޥެރިއަކާ ވާހަކަދައްކާ ހައްލުކުރުމަކީ އެކަމުގެއޮތް އެންމެ ރަނގަޅުގޮތް ކަމަށާއި، ދެމަފިރިއެއްގެ ދެމެދުގައި އުފެދޭ އަރައިރުން، ވަރިއާ ހަމައަށް ދިއުމުގެ ކުރީން، އެ އަރައިރުން ޙައްލުކުރެވޭނެ ގޮތެއް އޮތްތޯ ބެލުމަށް ޓަކައި، ދެ ފަރާތުން ފޮނުވާ ނިޔާވެރީންގެ ނިންމުމާ، އެއް ގޮތަށް ޢަމަލުކުރަންޖެހޭ ކަމަށެވެ.
ނަމަވެސް ވަރިކުރުން ހުއްދަވާ ސަބަބުތަކެއްވެސްވާ ކަމަށާއި، އަނބިމީހާގެ އަޚްލާޤު ނުބައިވުމާއި، ޒަވާޖީ ޙަޔާތުގެ އިންތަކުން ބޭރުވުމާއި، ﷲގެ އަމުރުފުޅުތަކަށް ފަރުވާ ކުޑަކުރުން ހިމެނޭ ކަމަށެވެ. އަދި ﷲ އެންގެވި އިމުގެ ތެރޭގައި ދެމަފިރީންނަށް ޒަވާޖީ ޙަޔާތް ވޭތުނުކުރެވޭނެކަން ކަށަވަރުވެއްޖެ ނަމަ، އެންމެ ރަނގަޅު ގޮތަކީ ވަރިވުން ކަމަށާއި، ހަމަ އެ ފަދައިން ފިރިމީހާ އަނބިމީހާގެ މައްޗަށް އަނިޔާވެރިވެ، އޭނާގެ ޙައްޤުތައް އަދާނުކުރާނަމަ، އަނބިމީހާއަށް ކައިވެނި ޚުލްޢުކުރުމަށް ހުށަހެޅުންވެސް ހުއްދަވާނެ ކަމަށެވެ.
އެ ފަދަ ޙާލަތެއްގައި ފިރިމީހާ އޭނާއަށް ދިން ކައިވެނީގެ ރަން ވެސް އަނބުރައި ދޭން ޖެހޭނެ ކަމަށް ޚުތުބާގައި ބުނެއެވެ.