މީގެ ކުރިން އެއްވެސް ސަރުކާރަކުން މިހާތަނަށް އިންޑިއާ ކަނޑުގެ މުއްސަނދިކަމުގެ ބޭނުން ހިފާފައިނުވާ ކަމަށް އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެ އެވެ.
ވަޒީރު ސައީދު މިހެން ވިދާޅުވީ، އިހަވަންދިއްޕޮޅުގައި ތަރައްގީ ކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު"ގެ ޕޯޓު ތަރައްގީ ކުރުމާއި، މަޝްރޫޢާއި ގުޅުންހުރި އިތުރު މަސައްކަތްތައްކުރުމަށް ސިންގަޕޫރުގެ ކެޕިޓަލް އޭޝިއާ އިންވެސްޓުމަންޓު ކުންފުންޏާއެކު ފްރޭމްވޯކް އެއްބަސްވުމެއްގައި ސޮއިކުރުމަށް ބޭއްވުނު ރަސްމިއްޔާތުގައެވެ.
ވަޒީރު ސައީދު ވިދާޅުވި ގޮތުގައި، އިންޑިއާ ކަނޑުގެ ބޮޑުބައެއް ރާއްޖެ ހިއްސާކުރެއެވެ. އަދި މީގެ ކުރިން އައި ސަރުކާރުތަކުން މިކަމާމެދު ވިސްނާފައި އޮތް ނަމަވެސް އެއްވެސް ފިޔަވަޅެއް އަޅާފައިނުވާ ކަމަށް އެމަނިކުފާނު ފާހަގަކުރެއްވިއެވެ.
"ކުރީ ސަރުކާރުތަކުންވެސް މިކަމާއި ވިސްނާފައި އޮވެދާނެ، އެހެންނަމަވެސް އެކަމަށް އަޅަންޖެހޭ ފިޔަވަޅުތައް އަޅާފައިނުވޭ. އެހެންނަމަވެސް މިކަމުގައި ރައީސް ޑރ. މުއިއްޒު ފަހަތަށް ނުޖެހޭނެ،" ވަޒީރު ސައީދު ވިދާޅުވިއެވެ.
ވަޒީރު ސައީދު އިތުރަށް ވިދާޅުވި ގޮތުގައި، ރައީސް ޑރ. މުއިއްޒަކީ ތައުލީމީ ރައީސެކެވެ. އަދި އެމަނިކުފާނު ގެންދަވަނީ އައު ކަންކަން ތައާރަފުކޮށް ރާއްޖެ ތަރައްގީ ކުރުމުގެ މަސައްކަތް ކުރައްވަމުންނެވެ. ރައީސް ޑރ. މުއިއްޒުގެ ވިސްނުންފުޅު ހުރީ މި ފުރުސަތުތަކުގެ ބޭނުން ހިފާ ރާއްޖެ ތަރައްގީގެ އެހެން ހަރުފަތަކަށް ގެންދިޔުމަށް ކަމަށްވެސް ވަޒީރު ސައީދު ވިދާޅުވިއެވެ.