މޯލްޑިވްސް ބޮޑީބިލްޑިންގ އެސޯސިއޭޝަނުން ރާއްޖޭގައި އިންތިޒާމުކޮށްގެން ބާއްވާ 15 ވަނަ ވޯލްޑް ބޮޑީ ބިލްޑިންގ މުބާރާތާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އާންމު ރައްޔިތުންގެ އަރިހުން މަޢާފަށް އެދިއްޖެއެވެ.
އެ އެސޯސިއޭޝަނުން މިރޭ ނެރުނު ނޫސްބަޔާނެއްގައި ބުނެފައިވަނީ، މި މުބާރާތާ ގުޅޭގޮތުން މިހާރު ފެތުރެމުންދާ ވާހަކަތަކާ ގުޅިގެން ރައީސް އަދި ދިވެހި ރައްޔިތުންގެ ފަރާތުން މައާފަށް އެދޭ ކަމަށެވެ. މި މުބާރާތް ރާއްޖޭގައި ބޭއްވުމުގެ މަގުސަދަކީ ބައިނަލްއަގުވާމީ ކުޅިވަރުގެ ދުނިޔޭގައި ރާއްޖޭގެ ޕްރޮފައިލް ވަރުގަދަކުރުމާއި، ރާއްޖޭގެ އިގުތިސާދަށާއި ފަތުރުވެރިކަމަށް ކުރިއެރުން ހޯދުން ކަމަށް ބަޔާނުގައި ފާހަގަކޮށްފައިވެއެވެ.
އެސޯސިއޭޝަނުން އިތުރަށް ބުނެފައިވަނީ، މުބާރާތް ބޭއްވުމަށް ކޮންޓްރެކްޓް ހެދުމަށްފަހު ރާއްޖޭގައި ނުބޭއްވުމަށް ނިންމައިފިނަމަ، ރާއްޖޭގެ ކުޅިވަރު އެސޯސިއޭޝަންތަކަށާއި ޖުމްލަކޮށް ރާއްޖެއަށް ލިބިދާނެ މާލީ އަދި އެހެނިހެން ގެއްލުންތަކަށް ރިއާޔަތްކޮށް މުބާރާތް ބޭއްވުމަށް ނިންމާފައިވާ ކަމަށެވެ. އަދި މުބާރާތް ކުރިއަށް ގެންދިއުމުގައި ސްޕޯޓްސް މިނިސްޓްރީގެ އިރުޝާދާ އެއްގޮތަށް އަމަލުކުރަމުންދާ ކަމަށްވެސް ބަޔާނުގައި ބުނެފައިވެއެވެ.
"މި މުބާރާތާ ގުޅިގެން ފެތުރެމުންދާ ހަބަރުތަކާ ގުޅިގެން އާންމު ރައްޔިތުންގެ ކަންބޮޑުވުން ހުރުމާއެކު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ދިވެހި ލޮބުވެތި ރައްޔިތުންގެ ފަރާތުން ނިހާޔަތަށް މަޢާފަށް އެދެމެވެ. އަދި މުސްތަގުބަލުގައި މިފަދަ ކަމެއް ތަކުރާރު ނުވާނެ ކަމުގެ ފުރިހަމަ ޔަޤީންކަން ރައްޔިތުންނަށް އަރުވަމެވެ،" ބަޔާނުގައި ބުނެފައިވެއެވެ.
މި މުބާރާތް ރާއްޖޭގައި ބޭއްވުމާ ގުޅިގެން އާންމުންނާއި ދީނީ ޢިލްމުވެރިން ވަނީ ކަންބޮޑުވުން ފާޅުކޮށްފައެވެ. އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމު އަލީ ސައީދު މީސްމީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ ބަރަހަނާ މަންޒަރުތައް ދައްކާ ހަފުލާތައް ބޭއްވުމަކީ މުސްލިމުން ކޮށްގެންވާނެ ކަމެއް ނޫން ކަމަށާއި، ގައުމުގެ އިޖުތިމާއީ ކަރާމާތް ނަގަހައްޓައި އިސްލާމީ ސަގާފަތު ރައްކާތެރި ކުރަން ޖެހޭނެ ކަމަށެވެ.
މި މުބާރާތް ރާއްޖޭގައި ބޭއްވުމާ ގުޅިގެން އުފެދިފައިވާ ހިޔާލު ތަފާތުވުންތަކާއި ކަންބޮޑުވުންތަކުގެ ސަބަބުން، މޯލްޑިވްސް ބޮޑީބިލްޑިންގ އެސޯސިއޭޝަނުން މިފަދަ މައާފަށް އެދުމުގެ ބަޔާނެއް ނެރުމަކީ މުހިންމު ފިޔަވަޅެއް ކަމުގައި ބެލެވެއެވެ. މި ބަޔާނުން އެނގޭ ގޮތުގައި، އެސޯސިއޭޝަނުން ވަނީ މުބާރާތް ބޭއްވުމުގެ އިގުތިސާދީ އަދި ފަތުރުވެރިކަމުގެ ފައިދާތަކަށް ބަލައި ނިންމުން ނިންމާފައިވާ ކަމަށެވެ. ނަމަވެސް، މިކަމުން އުފެދިފައިވާ އިޖްތިމާއީ އަދި ދީނީ ކަންބޮޑުވުންތަކަށް ރިއާޔަތްކޮށް، އެސޯސިއޭޝަނުން ވަނީ މުސްތަގުބަލުގައި މިފަދަ ކަންކަން ތަކުރާރު ނުވާނެ ކަމުގެ ޔަގީންކަން ދީފައެވެ.