ޝަރުއީ ދާއިރާއަށް ނުފޫޒު ފޯރުވުމުގެ ބަދަލުގައި، އެ ދާއިރާއަކީ ސަލާން ނުޖަހާ އުޅެވޭ ދާއިރާއަކަށް ހެދުމަށް މި ސަރުކާރުން މަސައްކަތްކުރާނެ ކަމަށާއި، ޝަރުއީ ދާއިރާއަށް ސަރުކާރުން ނުފޫޒު ނުފޯރުވާނެ ކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
ޖުމްހޫރީ ދުވަސް ފާހަގަކުރުމުގެ ގޮތުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، އެމަނިކުފާނު ރައީސްކަމުގެ ހުވާކުރެއްވި ވަގުތުން ފެށިގެން ރާއްޖޭގެ ޝަރުއީ ދާއިރާ މިނިވަންކުރެވިފައިވާ ކަމަށެވެ. އަދި ސަލާންޖަހަން ނުޖެހި އަދުލު އިންސާފު ރާއްޖޭގައި ޤާއިމުކުރެވެމުންދާ ކަމަށް އެމަނިކުފާނު ވިދާޅުވިއެވެ.
"ނޮވެމްބަރު 17، 2023 ވީ ހުކުރު ދުވަހު ހަވީރު 5:03 އިން ފެށިގެން ދެށިގެން ދިވެހިރާއްޖޭގެ ސަރުކާރުން ޝަރުއީ ދާއިރާއަކަށް ނުފޫޒެއް ނުފޯރުވާ. ކުރިޔަށް އޮތް ތަނުގައި ވެސް ނުފޯރުވާނަން. އެހެންވީމާ ސިޔާސީ ގޮތުން މީހުން ހައްޔަރު ނުކުރަނީ، ސިޔާސީ ގޮތުން ހައްޔަރުވެފައި ތިބި މީހުން މިނިވަންވެސް ވަނީ. އަޅުގަނޑުމެން ނުފޯރުވާނަން ޝަރުއީ ދާއިރާއަކަށް ނުފޫޒެއް. އޭގެ ބަދަލުގައި ޝަރުއީ ދާއިރާއަށް ބޭނުންވާ ކަންތައްތަކަށް މަގުފަހިކޮށްދޭނީ،" ރައީސް ވިދާޅުވިއެވެ.
ޝަރުއީ ދާއިރާގެ އިމާރާތްތަކަށް ދިމާވެފައިވާ ޖާގައިގެ ދަތިކަން އަންނަ އަހަރު ހައްލުކުރެވޭނެ ކަމަށާއި، ކުރިމިނަލް ކޯޓުގެ އިމާރާތް ހުޅުމާލެއަށް ބަދަލުކުރުމުގެ މަސައްކަތް އަންނަ އަހަރުގެ މާރިޗު ނުވަތަ އޭޕްރީލް މަހާ ހިސާބަށް ނިމޭނެ ކަމަށް ރައީސް ވިދާޅުވިއެވެ. އަދި އަންނަ އަހަރުގެ ބަޖެޓުގައި ހިމެނިގެން ޝަރުއީ ދާއިރާގެ ކޮމްޕްލެކްސް ހުޅުމާލޭގައި އެޅުމުގެ އަމަލީ މަސައްކަތް އަންނަ އަހަރު ފެށިގެންދާނެ ކަމަށްވެސް ރައީސް ވިދާޅުވިއެވެ.
ސުޕްރީމް ކޯޓަކީ މާލޭގައި ހުންނަންޖެހޭ އިމާރާތެއް ކަމަށް ގަބޫލުފުޅުކުރައްވާތީ، ސުޕްރީމް ކޯޓު އެޅުމަށް ބޭނުންވާ ބިން މިދިޔަ ހަފްތާގައި ހަވާލުކޮށްފައިވާނެ ކަމަށްވެސް ރައީސް ވަނީ ވިދާޅުވެފައެވެ.
ރައީސް މުއިއްޒު ވިދާޅުވީ، އެއްވެސް ބަޔަކަށް ބަރޯސާނުވެ ސަލާންޖަހަން ނުޖެހި ޝަރުއީ ދާއިރާ މިނިވަންކަމާއެކު ބޭއްވުމަކީ އެމަނިކުފާނުގެ އަމާޒު ކަމަށެވެ. އަދި މި ވެރިކަމުގައި އެކަން އެގޮތަށް ބާއްވާނެ ކަމަށާއި ސަރުކާރުގެ އެއްވެސް ނުފޫޒެއް އެ ދާއިރާއަށް ނުފޯރުވާނެ ކަމުގެ ޔަގީންކަން ރައީސް ތަކުރާރުކޮށް ދެއްވިއެވެ.
"އެހެންވީމަ ޝަރުއީ ދާއިރާ މިނިވަންކޮށް، އެހެން ބަޔަކަށް ބަރޯސާނުވެ އާދޭސްކުރަން ނުޖެހި ސަލާންޖަހަން ނުޖެހި އުޅެވޭގޮތް ހެދުން އެއީ ހަގީގީ އިހުލާސްތެރިން ވެރިކަންކުރާ ގޮތަކީ. އެގޮތަށް އެކަންވާތަން ފެންނާނެ،" ރައީސް ވިދާޅުވިއެވެ.
ޝަރުއީ ދާއިރާ މިނިވަންކަންމަތީ ބޭއްވުމަކީ ރައީސްގެ ރިޔާސީ ވައުދުފުޅެއް ކަމަށް ފާހަގަކޮށްލެވެއެވެ. ރިޔާސީ އިންތިޚާބުގެ ކެމްޕެއިންގެ ތެރޭގައި އެމަނިކުފާނު ވަނީ ޝަރުއީ ދާއިރާ އާއި ޖުޑިޝަރީ ވާނީ ހަގީގީ މާނައިގައި މިނިވަން ދާއިރާއަކަށް ކަމަށާއި، ޝަރީއަތުގެ ތެރެއަށް ދައުލަތުގެ ނުވަތަ ސަރުކާރުގެ އެއްވެސް ނުފޫޒެއް ނުފޯރުވާނެ ކަމަށް ވިދާޅުވެފައެވެ.
މީގެ އިތުރުން، ޝަރުއީ ދާއިރާއަށް ނުފޫޒު ފޯރުވާ ސަރުކާރުގެ މަގާމުތަކުގައި ތިއްބަވާ ބޭފުޅުން މަގާމުން ވަކިކުރައްވާނެ ކަމަށްވެސް ރައީސް މުއިއްޒު ވަނީ ކުރިން ވިދާޅުވެފައެވެ.