މި ސަރުކާރަކީ ދެފުށް ފެންނަ ރައްޔިތުންނަށް ޖަވާބުދާރީވާ ރައްޔިތުން އެދޭ އަމާޒަށް ވެރިކަންކުރާ ދިވެހި ޤައުމަށް ފާގަތިކަމާ ބާއްޖަވެރިކަން ހޯދައިދޭ ހެޔޮ ވެރިކަމެއްކޮށްދިނުމަށް މަސައްކަތްކުރާ ސަރުކާރެއްކަމުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ
ރޭ ޖުމްހޫރީ ދުވަހާ ގުޅިގެން ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުން ރައީސްވަނީ މި ސަރުކާރު ރައްޔިތުންނަށް މަޢުލޫމާތު ފޯރުކޮށްދީ، ދެފުށް ފެންނަ ސަރުކާރެއް ގޮތުގައި މަސައްކަތް ކުރުމަށް ކުރައްވާފައިވާ މުހިންމު މަސައްކަތްޕުޅުތަކުގެ މައްޗަށް އަލިއަޅުވާލައްވާފައެވެ. އެގޮތުން “ރައްޔިތުންގެ އަޑު” ޕޯޓަލްގެ ތެރެއިން މިހާތަނަށް ގާތްގަނޑަކަށް 840 އަށް ވުރެ ގިނަ ސުވާލު އެމަނިކުފާނަށް ލިބިވަޑައިގެންފައިވާކަން ފާހަގަކުރައްވައި އޭގެތެރިން ޖަވާބު ނުދެވި އޮތީ ގާތްގަނޑަކަށް 22 ސުވާލުކަމުގައި އެމަނިކުފާނު ފާހަގަކުރެއްވިއެވެ.
މިމޭރުމުން ވާހަކަފުޅު ކުރިއަށް ގެންދަވަމުން ރައީސް ވިދާޅުވީ އެމަނިކުފާނަށް މިހާތަނަށް ލިބިވަޑައިގެންނެވި އާރު.ޓީ.އައި ތަކުގެތެރެއިން 90 އިންސައްތައަށް ޖަވާބުދާރީ ވެވަޑައިގެންފައިވާކަމުގައެވެ. އަދި މިފަހުން އައި އެއްވެސް ސަރުކާރަކުން ނުބާއްވާވަރަށް، ނޫސްވެރިންގެ ބައްދަލުވުން ސަރުކާރުގެ ފަރާތުން އެކި މިނިސްޓަރުންނާއި އެކި ބޭފުޅުން މެދުވެރިކުރައްވައިގެން ބާއްވަވާފައިވާކަން އެމަނިކުފާނު ފާހަގަކުރެއްވިއެވެ. މީގެ އިތުރުން ސަރުކާރު ވެބްސައިޓް ނަމުގައި ވެބްސައިޓެއް ހައްދަވައިގެން ސަރުކާރުން ކުރަމުންދާކަންކަން ދުވަހުން ދުވަހަށް ރައްޔިތުންނާ ޙިއްޞާކުރައްވާކަމުގައި އެމަނިކުފާނު ވިދާޅުވިއެވެ.
އެ ޖަލްސާގައި ވާހަކަފުޅު ދައްކަވަމުން ރައީސް ވަނީ އެމަނިކުފާނުގެ ބައްޕާފުޅުގެ “ދައުލަތާއި ވެރިންނާއި މަސްޢޫލިއްޔަތު އަދި ކިޔަމަންވުމުގެ މަފުހޫމް” ފޮތުން މަޢުލޫމާތު ހާމަކުރުމާއި ޞައްޙަ މަޢުލޫމާތު ނޫސްވެރިން ރައްޔިތުންނަށް ފޯރުކޮށްދިނުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އެގޮތުން “ޑިމޮކްރެޓިކް ނިޒާމެއްގައި އެއް ނަޒަރަކުން އެންމެ ބާރުގަދަ ބަޔަކު ކަމުގައިވެސް ބަލަނީ ނޫސްވެރިންނޭ، އެހެންވީމާ ނޫސްވެރިންގެ ޒިންމާ ތެދުވެރިކަމާއި އަމާނާތްތެރިކަމާއެކީގަ އަދާކޮށްދެއްވައްޗޭ. ތެދުވެރިކަމާއި އަމާނާތްތެރިކަމާ އެކީގަ އިސްލާމީ ޤައުމެއްގައި އޮންނަންޖެހޭ ގޮތަށް އެކަން ކުރެވުމަކީ ޤައުމަށް އެންމެ ފައިދާހުރި ގޮތް،” ކަމުގައި ރައީސް ވިދާޅުވިއެވެ.