ގިނައިން އާމްދަނީ ލިބޭ މީހުންގެ ތެރެއިން އިންކަމް ޓެކްސް ދައްކާ ފަރާތްތަކުން ކޮންމެ އަހަރަކު ވަކި މިންވަރެއް އެނުއަލް ހެލްތު ކޮންޓްރިބިއުޝަންގެ ގޮތުގައި ދައްކަންޖެހޭ ގޮތަށް ބަދަލު ގެންނަން ހުށަހަޅާފައިވާ ކަމަށް ސަރުކާރުން މިއަދު ހާމަކޮށްފިއެވެ.
މި މަޢުލޫމާތު ހާމަކޮށްފައިވަނީ މިއަދު ސަރުކާރުގެ ގެޒެޓުގައި އާންމުކުރި ދައުލަތުގެ ބަޖެޓް ޕޮޒިޝަން ރިޕޯޓުގައެވެ. މި ރިޕޯޓުގައި ބުނެފައިވާ ގޮތުން، މި ބަދަލު ގެނައުމުން އެންމެ މަދުން އާމްދަނީ ލިބޭ މީހުންނަށް މިހާރުވެސް އޮންނަ އުސޫލުން އާސަންދައިގެ ޚިދުމަތް ފޯރުކޮށްދެވޭނެއެވެ.
އަދި ބޭސްފަރުވާއަށް ދެމުން އަންނަ އެހެނިހެން އެހީތައްވެސް ދެމެހެއްޓެނިވި އުސޫލަކުން ފޯރުކޮށްދިނުމަށް، އެންމެ އެހީއަށް ބޭނުންޖެހޭ މީހުންނަށް ޚާއްޞަކޮށް ބަދަލުކުރަން ބަޖެޓުގައި ހިމަނާފައިވާ ކަމަށްވެސް ރިޕޯޓުގައި ފާހަގަ ކޮށްފައިވެއެވެ.
ރިޕޯޓުގައި އިތުރަށް ބަޔާންކޮށްފައިވަނީ، ދައުލަތުން ފޯރުކޮށްދޭންޖެހޭ އިޖުތިމާޢީ ރައްކާތެރިކަން އޭގެ އެންމެ ފުރިހަމަ ގޮތުގައި ފޯރުކޮށްދެވޭކަން ކަށަވަރުކޮށް، ޚަރަދު ކުޑަކުރުމުގެ މުހިންމު ސިޔާސަތުތަކެއް ތަންފީޒުކުރުމަށް އަންނަ އަހަރުގެ ބަޖެޓުގައި ހިމަނާފައިވާ ކަމަށެވެ.
މީގެ ތެރޭގައި، މިހާރު އިންޑިރެކްޓް ސަބްސިޑީގެ ގޮތުގައި ދެމުންދާ ތެޔޮ، ކަރަންޓު، ކާޑު އަދި ނަރުދަމާގެ ސަބްސިޑީގެ ބަދަލުގައި ސަރުކާރުގެ އެހީތެރިކަން އެންމެ ބޭނުންޖެހިފައިވާ ފަރާތްތައް ދެނެގަނެ، ޑައިރެކްޓް ކޭޝް ޓްރާންސްފާއެއް ނުވަތަ ސަބްސިޑީ ހައްޤުވާ ފަރާތްތަކަށް ފައިސާގެ އެހީއެއް ދިނުން ހިމެނެއެވެ.
އަދި އާސަންދައިގެ ޚިދުމަތް އަމާޒުކޮށް، އެންމެ މުއްސަނދި މީހުން އާސަންދަ ޚިދުމަތް ހޯދާއިރު ބައެއް ޚިދުމަތްތަކާއި ނަން-އެސެންޝަލް ބޭހުގެ އަގުން ވަކި ޕަސެންޓެއް ދައްކަންޖެހޭ ގޮތަށް ބަދަލުކުރުމަށްވެސް ރާވާފައިވާ ކަމަށް ރިޕޯޓުގައި ބަޔާންކޮށްފައިވެއެވެ.
މި ބަދަލުތަކަކީ ދައުލަތުގެ އިޖުތިމާޢީ ރައްކާތެރިކަމުގެ "ސޭފްޓީ ނެޓް" އެއް ޤާއިމުކޮށް، އެއް ނިޒާމެއްގެ ތެރެއިން ފަޤީރުންނަށާއި އެންމެ ބޭނުންޖެހިފައިވާ މީހުންނަށް އިސްކަން ލިބޭނެހެން ޓާގެޓުކޮށްގެން ސަބްސިޑީ، ޞިއްޙީ އެހީތައް، ޕެންޝަން އަދި އެހެނިހެން ސޯޝަލް ވެލްފެއާ ޕްރޮގްރާމްތަކުގެނިޒާމު ބެހެއްޓުމަށް ރޭވިފައިވާ ބަދަލުތަކެއް ކަމަށް ރިޕޯޓުގައި ފާހަގަ ކޮށްފައިވެއެވެ.
މި ބަދަލުތަކުގެ މަޤްޞަދަކީ ދައުލަތުގެ ވަސީލަތްތައް އެންމެ ހެޔޮގޮތުގައި ބޭނުން ކުރުމާކުރުމާއި، އިޖުތިމާޢީ ރައްކާތެރިކަމުގެ ނިޒާމު އިތުރަށް ހަރުދަނާކުރުން ކަމަށް ބަޖެޓް ޕޮޒިޝަން ރިޕޯޓުގައި ބަޔާން ކޮށްފައިވެއެވެ. މިގޮތުން، އެންމެ އެހީއަށް ބޭނުންވާ ފަރާތްތަކަށް އަމާޒު ކޮށްގެން އެހީތެރިކަން ފޯރުކޮށްދިނުމަށް އިސްކަން ދޭނެ ކަމަށް ސަރުކާރުން ބުނެފައިވެއެވެ.