ހުޅުމާލޭގައި މީހަކު ރަހީނުކޮށް، ފައިސާއަށް ޑިމާންޑްކުރި މައްސަލައިގައި މީހަކު ހައްޔަރުކޮށްފި އެވެ.
ހުޅުމާލޭގައި މީހަކު ރަހީނުކޮށް، އެމީހާގެ އާއިލާއަށް ގުޅައި ފައިސާއަށް ޑިމާންޑު ކުރި މައްސަލައިގައި 37 އަހަރުގެ ފިރިހެނަކު ފުލުހުން ވަނީ ހައްޔަރުކޮށްފައެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ މި މައްސަލައިގައި ހައްޔަރުކޮށްފައިވަނީ މާލެ ދަފްތަރު ނަންބަރު އާރު.އެސް 9022، ތޮލާލް މޫސާ (37 އަހަރު) އެވެ. އޭނާ ހައްޔަރު ކޮށްފައިވަނީ ނޮވެމްބަރު 11 ވަނަ ދުވަހުގެ ރޭގަައި ކަމަށްވެސް ފުލުހުން ބުނެފައިވެއެވެ.
ފުލުހުން ބުނީ، މިމީހާ ވަނީ ހުޅުމާލޭ އޯކިޑްމާގޭ ހިނގުމުގައި، ކާރެއްގެ ތެރޭގައި ދިވެހި ފިރިހެނަކު ރަހީނުކޮށް، ހިފަހައްޓައި، އަނިޔާކޮށް ބިރުދައްކައި، އަދި އެމީހާގެ އާއިލާ މީހުންނަށް ގުޅައިގެން ފައިސާ ދިނުމަށް މަޖުބޫރު ކޮށްފައިވާ ކަމަށެވެ.
ފުލުހުން ދަނީ މިމައްސަލަ އިތުރަށް ތަހުގީގު ކުރަމުންނެވެ.