އައިޖީއެމްއެޗްގެ ފިލިޕީންސް ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލަން ކްރިމިނަލް ކޯޓުން މިއަދު އަމުރުކޮށްފިއެވެ.
ކްރިމިނަލް ކޯޓުގެ ގާޒީ ހުސެއިން ފާއިޒް ރަޝާދު މިއަދު ހެނދުނު 10:00 ގައި ބޭއްވި އަޑުއެހުމުގައި ނިންމެވީ ޝަރުތުތަކާއެކު ލަމްހާގެ ބަންދަށް ލުއިދީ، ތިން މަސް ދުވަހުގެ މުއްދަތަކަށް ބަންދުން ދޫކޮށްލުމަށެވެ. މި ނިންމުމަށް ގާޒީ ވާސިލުވި ސަބަބުތަކުގެ ތެރޭގައި ދައުލަތުގެ ގިނަ ހެކިންތަކެއްގެ ހެކިބަސް ނެގިފައިވުމާއި، ބާކީ ތިބި ހެކިންނަކީ ބަންދުން ދޫކޮށްލިޔަސް ހެއްކަށް ނުފޫޒު ފޯރުވުމުގެ ފުރުސަތު ކުޑަ ހެކިތަކަކަށް ވުން ހިމެނެއެވެ.
ލަމްހާ ބަންދުން ދޫކޮށްލުމަށް، ގާޒީ ކަނޑައެޅުއްވި ޝަރުތުތަކުގެ ތެރޭގައި ރާއްޖެއިން ފުރައިގެން ނުދިއުމާއި، ގާނޫނާ ހިލާފު އަމަލެއް ނުވަތަ އިތުރު ކުށެއް ނުކުރުމާއި، ކޯޓުން އަންގާ ކޮންމެ ވަގުތެއްގައި ކޯޓަށް ހާޒިރުވުން ހިމެނެއެވެ. އަދި ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށާއި މާލެއިން ބޭރަށް ފުރައިގެން ނުދިއުމަށް އަމުރުކުރެއްވިއެވެ. މީގެ އިތުރުން، މި މައްސަލާގައި ހެކިބަސް ދީފައިވާ އެއްވެސް މީހަކާއި މޭރީގެ އާއިލާ މީހަކާ ވެސް ބައްދަލު ނުކުރުމަށް އަންގަވާފައިވެއެވެ.
ލަމްހާ ބަންދުން ދޫކޮށްލާފައި މިވަނީ އޭނާގެ ފަރާތުން މުޖުތަމައަށް އޮތް ނުރައްކާ ކުޑަނުވާ ކަމަށް ބުނެ ބަންދުން ދޫކޮށްލަން ދައުލަތުން އިއުތިރާޒު ކުރި ފަހުން މިއަދު ބޭއްވި އަޑުއެހުމުގައެވެ.
މި މައްސަލައިގައި ލަމްހާގެ މައްޗަށް ތިން ދައުވާއެއް އުފުލާފައިވާއިރު، އޭގެ ތެރޭގައި މަރުގައި އެހީތެރިވެދިނުމުގެ ދަޢުވާ ހިމެނެއެވެ. މި މައްސަލާގައި މާވިންގެ މައްޗަށް ގަސްތުގައި މީހަކު މަރާލިކަމުގެ ދަޢުވާ ކޮށްފައިވެއެވެ.
19 އޮކްޓޫބަރު 2021 ގައި މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން ދިޔަ މޭރީ، (އޭނާގެ ފިރިމީހާ އާއި ފިރިމީހާގެ ލޯބިވެރިޔާ ކަމަށް ބުނާ ލަމްހާ) ގުޅިގެން މަރާލި ކަމަށް ތުހުމަތު ކޮށްފައިވަނީ މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްލައިގެން ކަމަށެވެ.
ލަމްހާ ފުރަތަމަ ބަންދުން ދޫކޮށްލާފައިވަނީ މިދިޔަ އަހަރުގެ ނޮވެމްބަރު މަހުގައެވެ. ނަމަވެސް، އޭނާ އަލުން ބަންދުކުރަން 2022 ވަނަ އަހަރުގެ ޑިސެމްބަރު މަހު ހައި ކޯޓުން އަމުރުކުރުމާ ގުޅިގެން، މިއަދާ ހަމައަށް އޭނާ ހުރީ ޝަރީއަތް ނިމެންދެން ބަންދުކޮށްފައެވެ.
މި މައްސަލައިގެ ޝަރީއަތް ލަސްވެ، ހައްގުތަކަށް ހުރަސްއެޅެމުންދާ ކަމަށް ބުނެ މިދިޔަ ބުރާސްފަތި ދުވަހު އޮތް އަޑުއެހުމުގައި ލަމްހާ ވަނީ ޝަރުތުތަކާ އެކު ނަމަވެސް ބަންދުން ދޫކޮށްލަން އެދިފައެވެ. މިއަދުގެ އަޑުއެހުމުގައި ގާޒީ ހުސެއިން ފާއިޒް ރަޝާދު ނިންމެވީ އެ އެދުމަށް އިޖާބަ ދެއްވައި، ޝަރުތުތަކާއެކު ލަމްހާގެ ބަންދަށް ލުއި ދިނުމަށެވެ.
ލަމްހާ ބަންދުން ދޫކޮށްލާފައި ހުންނަ މުއްދަތުގައި ޒަރޫރީ ބޭނުމެއް ނޫން ގޮތަކަށް ގެއިން ބޭރަށް ނުނިކުތުމަށާއި، ކޮންމެހެން ނުކުންނަން ޖެހިއްޖެ ނަމަ ފުލުހުންގެ ފަރާތުން ހުއްދަ ހޯދުމަށް ގާޒީ ވަނީ އަމުރުކޮށްފައެވެ. މީގެ އިތުރުން، ވަކި ގަޑިތަކެއްގައި ގޭގައި ހުރުމަށްވެސް އަމުރުކުރެއްވިއެވެ.