ހަށިގަނޑުގައި ޑްރަގް ފޮރުވައިގެން ފުރަން ގޮސް ހުއްޓާ ވެލާނާ އިންޓަނޭޝަނަލް އެއާޕޯޓުން ހައްޔަރުކުރި މީހާ އިތުރު 30 ދުވަހަށް ބަންދުކުރަން ކްރިމިނަލް ކޯޓުން އަމުރުކޮށްފިއެވެ.
މި މައްސަލާގައި އޮކްޓޫބަރު 07 ވަނަ ދުވަހު ފުުލުހުން ހައްޔަރުކޮށްފައިވަނީ ށ.ނޫމަރާ، ހަވީރީގޭ އުމުރުން 24 އަހަރުގެ ޢަބްދުﷲ ފަސީހެވެ.
އޭނާގެ މައްޗަށް ކޮށްފައިވަނީ ޑްރަގް ބޭނުންކުރުމާއި، ގެންގުޅުމާއި، ޓްރެފިކް ކުރުމުގެ ކުށުގެ ތުހުމަތެވެ.
ކޯޓުން އާންމުކޮށްފައިވާ މައުލޫމާތުތަކަށް ބަލާއިރު، މި މައްސަލާގައި މަސްތުވާތަކެތި ފޮރުވައިގެން ފަސީހު ވަނީ ޑޮމެސްޓިކް އެއާޕޯޓުން ފުރަން މަސައްކަތްކޮށްފައެވެ.
އޭނާގެ އަތުން 275 ގްރާމް މަސްތުވާތަކެތި ފެނުނު ކަމަށް ފުލުހުންނާ ހަވާލާދީ ކޯޓުން ބުނެފައިވެއެވެ.
މި މައްސަލާގައި މީގެކުރިން ދެތިން ފަހަރެއްގެ މަތިން ފަސީހުގެ ބަންދުގެ މުއްދަތު އިތުރުކުރުމަށްފަހު، ކޯޓުން އިއްޔެ ވަނީ އިތުރު 30 ދުވަހަށް ފަސީހު ބަންދުކުރަން އަމުރުކޮށްފައެވެ.