ހުޅުމާލޭގައި މިދިޔަ ސެޕްޓެމްބަރު މަހު ހިނގި މަރުގެ އެކްސިޑެންޓާ ގުޅިގެން ކާރު ދުއްވި ފަރާތުގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ދަޢުވާ ކުރަން ކްރިމިނަލް ކޯޓަށް ހުށަހަޅައިފިއެވެ.
މި މައްސަލައިގައި ދަޢުވާ ކުރެވިފައިވަނީ އައްޑޫ ސިޓީ ހިތަދޫ ވައިލެޓްފެހި، މުހައްމަދު ވިސާމް ސިއްދީގު (26އ) ގެ މައްޗަށެވެ. ޕްރޮސެކިއުޓަރ ޖެނެރަލްގެ އޮފީހުން މަޢުލޫމާތު ދީފައިވާ ގޮތުގައި މި ދަޢުވާ ހުށަހެޅީ އޮކްޓޯބަރު މަހުގެ 31 ވަނަ ދުވަހުއެވެ.
މި އެކްސިޑެންޓް ހިނގާފައިވަނީ ސެޕްޓެމްބަރު މަހުގެ 6 ވަނަ ދުވަހުގެ ރޭ މެންދަމު 2:48 ހާއިރު ހުޅުމާލޭ ސެންޓްރަލް ޕާކް ކައިރީގައެވެ. ބާރު ސްޕީޑުގައި ދުއްވަމުން ދިޔަ ސްޕޯޓްސް ކާރަކާއި ސައިކަލެއް ޖެހުމުން ހިނގި މި އެކްސިޑެންޓުގައި މަރުވެފައިވަނީ މޯލްޑިވްސް ކަރެކްޝަނަލް ސަރވިސްގެ އޮފިސަރެއްގެ ގޮތުގައި މަސައްކަތްކުރަމުން ދިޔަ ލ. އިސްދޫ ބީޗްހައުސް، ހަސަން ސަމާހް (23އ) އެވެ.
ޕްރޮސެކިއުޓަރ ޖެނެރަލްގެ އޮފީހުން ވިސާމްގެ މައްޗަށް ކޮށްފައިވާ ދަޢުވާއަކީ ޤާނޫނުލް އުޤޫބާތުގެ 111 ވަނަ މާއްދާގެ (ހ) އާ ހަވާލާދީ، އެ މާއްދާގެ (ނ) ގެ ދަށުން، މީހަކު މަރުވެދިއުމުގެ ފަރުވާކުޑަ އަމަލެއް ކުރުމުގެ ކުށުގެ ދަޢުވާއެވެ. މި ދަޢުވާ ސާބިތުވެއްޖެނަމަ، އޭނާގެ މައްޗަށް ކަނޑައެޅޭނެ އަދަބަކީ 6 އަހަރަށް ޖަލަށްލުމެވެ.
ފުލުހުން ދީފައިވާ މަޢުލޫމާތުގައިވާ ގޮތުން، ވިސާމަކީ ކާރު ދުއްވުމުގެ ލައިސަންސް ވެސް ނެތް މީހެކެވެ. މިހާރު އޭނާ ހުރީ ޝަރީޢަތް ނިމެންދެން ބަންދުގައެވެ.