138ރަށެއްގައި ކުރިއަށްދާ އޮޕަރޭޝަން ކުރަނގީގެ ދަށުން 10،000 އަށްވުރެ ގިނަ ބިދޭސީންގެ ބަޔޯމެޓްރިކްސް ނެގިއްޖެ ކަމަށް ދާހިލީ ސަލާމަތާއި ފަންނިއްޔަތާ ބެހޭ ވަޒީރު، އަލީ އިހުޙްސާން ވިދާޅުވެއްޖެއެވެ.
ވަޒީރު އިހުސާން ވިދާޅުވެފައިވަނީ، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ފައްޓާފައިވާ “އޮޕަރޭޝަން ކުރަންގި”ގެ ދަށުން 10،000 އަށްވުރެ ގިނަ ބިދޭސީންގެ ބަޔޯމެޓްރިކްސް ނަގާފައިވާ ކަމަށެވެ.
“ހަފްތާ52″ގެ ނަމުގައި ގެނެސްދިން ހާއްސަ ޕެނަލް ޑިސްކަޝަންގައި ވާހަކަފުޅުދައްކަވަމުން ވަޒީރު އިހުސާން ވިދާޅުވީ، މި އޮޕަރޭޝަން މިހާރު ރާއްޖޭގެ 138 ރަށެއްގައި ކުރިއަށްދާ ކަމަށެވެ. އަދި މި މަސައްކަތް އަންނަ އަހަރުގެ އޭޕްރީލް މަހުގެ ނިޔަލަށް ނިންމުމަށް މަސައްކަތް ކުރަމުންދާ ކަމަށްވެސް އެމަނިކުފާނު ވިދާޅުވިއެވެ.
ވަޒީރު އިތުރަށް ވިދާޅުވީ، ރާއްޖޭގައި ކުދި ވިޔަފާރިތަކަށް ހުރަސްތަކެއް އަޅަމުންދިޔަ ބިދޭސީންގެ ވިޔަފާރިތައް ހުއްޓުވާ، އެފަދަ ވިޔަފާރިތަކުގައި ގަވާއިދާ ހިލާފަށް އުޅެމުންދިޔަ ބިދޭސީން 48 ގަޑިއިރުގެ ތެރޭގައި ފުރުވާލުމުގެ އިންތިޒާމު ހަމަޖައްސާފައިވާ ކަމަށެވެ. މިގޮތުން، ގަވާއިދާ ހިލާފަށް ރާއްޖޭގައި ވިޔަފާރިކުރަމުންދިޔަ 5000 އެއްހާ ބިދޭސީން މިހާރު ރާއްޖެއިން ފުރުވާލާފައިވާ ކަމަށް ވަޒީރު ފާހަގަކުރެއްވިއެވެ.
މީގެ އިތުރުން، ވޭތުވެދިޔަ އެއް އަހަރުގެ ތެރޭގައި ދާހިލީ ސަލާމަތާއި ފަންނިއްޔަތާ ބެހޭ ވުޒާރާއިން ކުރެވުނު އެހެނިހެން މުހިންމު މަސައްކަތްތަކަށްވެސް ވަޒީރު އަލިއަޅުވާލެއްވިއެވެ. އޭގެ ތެރޭގައި މަސްތުވާތަކެތީގެ މައްސަލަ ހައްލުކުރުމަށް ކުރެވުނު މަސައްކަތްތަކާއި، ގޭންގު ކުށް ހުއްޓުވުމަށް ކުރެވުނު މަސައްކަތްތަކާއި، ކުށުގެ ވެށިން ކުޑަކުދިން ރައްކާތެރިކުރުމަށް ކުރެވުނު މަސައްކަތްތަކާއި، އަދި ޖަލުގައި ހިންގަމުންދާ ކުށްތައް ހުއްޓުވުމަށް ކުރެވުނު މުހިންމު މަސައްކަތްތައް ހިމެނެއެވެ.