ބޭރުފައިސާއާ ބެހޭ އައު ގަވާއިދުގެ ދަށުން ޑޮލަރު މާރުކުރުމުގެ ލައިސަންސް ނުނަގާ އޮތީ އެންމެ ރިސޯޓެއް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭއިން މިއަދު ނެރުނު ބަޔާނެއްގައި ބުނެފައިވަނީ، މިހާރު ރާއްޖޭގައި ހިންގަމުންދާ 174 ރިސޯޓުގެ ތެރެއިން 173 ރިސޯޓު މިހާރު ވަނީ އައު ގަވާއިދުގެ ދަށުން ރަޖިސްޓްރީ ކޮށްފައެވެ. އަދި ބޭރުފައިސާއިން އާމްދަނީ ލިބޭ ހުރިހާ ވިޔަފާރިތަކެއް މި ގަވާއިދުގެ ދަށުން އެމްއެމްއޭގައި ރަޖިސްޓްރީވާން ޖެހޭކަމަށް ވެސް ބަޔާނުގައި ބުނެފައިވެއެވެ.
މި އައު ގަވާއިދަށް އަމަލުކުރަން ފެށީ މިދިޔަ އޮކްޓޯބަރު މަހުގެ 1 ވަނަ ދުވަހުން ފެށިގެންނެވެ. މި ގަވާއިދުގެ ދަށުން، އަލަށް ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް ބޭރު ފައިސާއިން ލިބޭ އާމްދަނީ ޑިޕޮސިޓް ކުރުމަށް ރަޖިސްޓަރީވުމަށް 30 ދުވަހުގެ މުއްދަތެއް ދެވޭނެ ކަމަށް އެމްއެމްއޭއިން ބުނެފައިވެއެވެ.
އައު ގަވާއިދުގެ ދަށުން ފަތުރުވެރިކަމުގެ ޚިދުމަތްދޭ ތަންތަން ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ކޮންމެ ފަތުރުވެރިއަކަށް ކަނޑައެޅޭ ވަކި މިންވަރަކަށް ބޭރު ފައިސާ ބޭންކިން ނިޒާމުގެ ތެރެއަށް މާރުކުރަން ޖެހެއެވެ. އޭ ކެޓަގަރީގެ ތެރޭގައި ހިމެނޭ ރިސޯޓުތަކާއި، ބޮޑެތި ހޮޓާތަކާއި ޓުއަރިސްޓް އުޅަނދުތަކުން ކޮންމެ ފަތުރުވެރިއަކަށް 500 ޑޮލަރުގެ ރޭޓުން ބޭންކަށް ރުފިޔާ މާރުކުރަން ޖެހެއެވެ. އަދި ބީ ކެޓަގަރީގައި ހިމެނޭ ގެސްޓް ހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކުން ކޮންމެ ފަތުރުވެރިއަކަށް 25 ޑޮލަރުގެ ރޭޓުން މާރުކުރަން ޖެހެއެވެ.
އެމްއެމްއޭއިން ބުނެފައިވާ ގޮތުގައި، މި ގަވާއިދުގެ މައިގަނޑު މަގުސަދަކީ ބޭރުފައިސާ ގަނެވިއްކުމުގެ ވިޔަފާރި ބެލެހެއްޓުން މިހާރަށްވުރެ ހަރުދަނާކޮށް، އެ ވިޔަފާރި ހިންގުމުގައި ޒަމާނީ އުސޫލުތަކެއް ކަނޑައެޅުމެވެ. އަދި މީގެ ސަބަބުން ބޭންކުތަކަށް ބޭރު ފައިސާ ލިބުމުގައި މިހާރު ދިމާވާ ދަތިތަކަށް ހައްލެއް ހޯދޭނެކަމަށް އެމްއެމްއޭއިން ގަބޫލުކުރާކަމަށް ވެސް ބުނެފައިވެއެވެ.