ޓިކްޓޮކް ޕްލެޓްފޯމަކީ ރާއްޖޭގެ ގިނަ ބަޔަކު ބޭނުން ކުރަމުން އަންނަ ސޯޝަލްމީޑިޔާގެ ނުފޫޒުގަދަ ހިއްސާއަކަށް ވާތީ މި މަންސަ ބޭނުން ކުރާ ފަރާތްތަކުގެ ތެރެއިން ލައިވް ތައް ކުރިއަށް ގެންދާ ހޯސްޓުންނަކީ ރާއްޖޭގެ ސެލެބްރިޓީންނާ އެއް ހަމައެއްގައި މީހުންނަށް އެނގޭ ދެކެފަރިތަ ބަޔަކަށް ވެއެވެ. އެކި މީހުން މި ޕްލެޓްފޯމް ބޭނުން ކުރަނީ އެކިކަހަލަ ކަންތައްތަކުގައެވެ.
އެއްބަޔަކު އެމީހުންގެ ފުރިހަމަ ނުވެ އޮތް އެކްޓު ކުރުމުގެ ހުވަފެން ސީދާ ކުރުމަށްޓަކައި ލަވައާއި ކުދިކުދި ވީޑިޔޯ ތައްޔާރުކުރާ އިރު އަނެއްބަޔަކު އެބައިމީހުންގެ ވިޔަފާރި ކުރިއެރުވުމަށެވެ. އަދި އަނެއްބަޔަކު ރީތި ލަވަތައް ގެނެސްދިނުމަށެވެ. ރާއްޖޭގެ އެތައް ސަތޭކަ ބަޔަކު ބޭނުން ކުރަމުންދާ މި ޕްލެޓްފޯމުން ތަފާތުކަމެއް ފެށި ފުރަތަމަ ފަރާތަކީ ސަމާ އޭ ބުނުމަކީ އެހެން ފަރާތްތަކަށް ބުނެވޭ ނާއިންސާފީ ދެރަ ބަހަކަށް ނުވާނެ ކަމަށް އުއްމީދު ކުރަމެވެ.
ސަމާގެ ޓިކްޓޮކް ފެށިގެން އައީ ގިނަ ބައެއްގެ ލޯތްބާއި އެއްވަރަށް ގިނަބައެއްގެ ނުރުހުންވެސް ލިބެމުންނެވެ. އެހެންނަމަވެސް ސަމާގެ ހިތުންހިތަށް މިއީ ސަމާދެކެ އެންމެ ނުރުހޭ މީހާވެސް ދެކޮޅު ނުހަދާ ބަސްނުބުނާ ވަރުގެ ހަގީގަތަކަށް ވެގެންދިޔައެވެ. އެތަކެއް ކަނިލަމުންދިޔަ އުއްމީދުގެ ބައްތިތަކުގެ ހުޅުކޮޅު ނިވުނަ ނުދީ ރޯޝަންކުރުވި ސަމާގެ ހިތުންހިތަށް މިއީ ފަންޑްރައިޒިން ނުވަތަ އެހީ ހޯދައިދިނުމަށް ކުރިއަށް ގެންދާ ލައިވް ޕްރޮގްރާމް ތަކެކެވެ.
ސަމާ، ހުވަދޫމީޑިޔާއަށް އިންޓަވިއު ދިނުމުގެ ތެރެއިން……………….ފޮޓޯ: ހުވަދޫމީޑިޔާ/ޝަފާ
"ހިތުންހިތަށް ފެށީ ކީއްވެގެންތޯ؟
"ހަމަ ލައިވްގައި ކުއްޖަކު އައިސް އެހީއަށް އެދުމުން ފަންޑްރެއިޒިންގ ފެށިގެން ދިޔައީ،"
ކުއްޖަކު އެގޮތަށް ބުނުމުން އެކަމާމެދު ސަމާއަށް ވިސްނާލަން މަޖުބޫރުވީއެވެ.
އެހީއަށް ބޭނުންވެ ނޫސްތަކުގެ ޒަރިއްއާއިން، ފޭސްބުކް ޕޯސްޓުތަކުން މީހުން އެދޭ އެދުންތައް ސަމާގެ ރޭތަކުގެ ނިންޖަށް އަސަރު ކުރުވީ އޭނާއަށް އެކަންކަމާމެދު ވިސްނާލެވުނުވަރު ބޮޑު ކަމުންނެވެ. އަމިއްލަ ދިރިއުޅުމުގައި އޭނާގެ ދެކުދިންނަށް އެއްވެސް ކަމެއް ވެއްޖެނަމަ އޭނާގެ ހިތާއި ނަފުސުގައި އަޅާނެ ވޭން ހިތަށް އެރުމުންނެވެ.
ކަނޑައެޅި އަޒުމުގައި ހަރުދަނާ ކަމާއެކު ސަމާ އޭނާގެ އެކުލެވެމުން އައިސްފައި އޮތް ޓިކްޓޮކް ސަމާގެ އިތުބާރު ހިފޭވަރުގެ ކުދިންކޮޅަކާ މިހިޔާލު ހިއްސާކޮށް "ހިތުންހިތަށް" ވުޖޫދުވެގެން އައީ ތުއްތުކުއްޖެއްގެ ފަނޑުވަމުންދާ ހިނިތުންވުމަށް އުޖާލާ ކަން ގެނުވަމުންނެވެ.
ސަމާ ފަންޑުރައިޒިން އަކަށް ތައްޔާރުވަނީ…………….ފޮޓޯ:ސަމާގެ ޓެލެގްރާމް ހިތުންހިތަށް ގްރޫޕުން
ފަންޑްރައިޒިންގ އިޝްތިހާރު ކުރުމަށް ފަހު ނުހަނު ތައްޔާރުވެ ހުރެ ސަމާ އޭނާގެ ފުރަތަމަ ހިތުންހިތަށް ބިސްމީގެ ބަރަކާތުން ފެށީ ޔޫސުފު ހާމިދު މުހައްމަދު ގެ ސާޖަރީއަށް ފަންޑު ހޯދުމަށެވެ. ފުރަތަމަ ފަހަރު ކަމަށްވިޔަސް ސަމާގެ އަޑާއި ޖޯޝަކަށް އެއްވެސް ފިނިކަމެއް އައިސްފައި ނެތެވެ.
ހިތުން ހިތަށް ފަންޑްރައިޒިން އިވެންޓުތައް ސަމާ ކުރިއަށް ގެންދަން ފެށީ ދުރާލާ އެކަމަށް ތައްޔާރުވެ، އެއްގަޑިއިރު ތެރޭގައި ކުރިއަށް ގެންދާ ލައިވް އެއް މެދުވެރިކޮށް އެހީއަށް ބޭނުންވެފައި ހުންނަ ފަރާތަށް އެ ބޭނުންޖެހިފައިވާ މުރާދު ފުރިހަމަ ވާނެފަދަ އަދަދެއް ލިބޭނެ ފަދަ ގޮތަކަށް ކަންތައް ބައްޓަން ކޮށްގެންނެވެ. އެހީއަށް ބޭނުންވެފައިވާ ފަރާތްތަކާ ބައްދަލުވެ ސާޖަރީއަށް ނުވަތަ ޑޮކްޓަރުން އިރުޝާދު ދީގައި ހުންނަ ރިޕޯޓުތަކާއި ލިޔުންތައް ބަލައި އޭގެ ސައްހަކަން ވެސް ކަށަވަރު ކުރުމަކީ ވެސް ސަމާ ހާއްސަ ސަމާލުކަމެއް ދީގެން ކުރާ ކަމެކެވެ.
ސަމާގެ ހިތުންހިތަށް މެދުވެރިކޮށް ފަލަސްތީނަށް ހާއްސަ އިވެންޓެއްވެސް ވަނީ ބާއްވާފައެވެ. އާންމު ގޮތެއްގައި މަހަކު އެއްފަހަރު ކުރިއަށް ގެންދާ މިއިވެންޓަށް ދުރާލާ ތައްޔާރުވެ އެރެއަކަށް އެ ފައިސާ ލިބޭ ފަރާތްތައްވެސް ތައްޔާރު ކުރުވައެވެ. ދުރާލާ ތައްޔާރު ނުވި ކުއްލި އެއް އިވެންޓު ކުރިއަށް ގެންދަން ޖެހުނު ކަން ސަމާވަނީ ފާހަގަކޮށްފައެވެ.
ހުވަދޫ މީޑިޔާގެ އެސިސްޓަންޓްއެޑިޓަރ/ޖާނަލިސްޓާއި ސަމާ އެކުގައި، ……ފޮޓޯ: ހުވަދޫމީޑިޔާ
މިހިސާބުން މިއޮތީ ބޮޑު ސުވާލު އުފެދިގައެވެ. މިހާތަނަށް އައިއިރު އެންމެ ފަހުން ބޭއްވި އެހީގެ ހަރަކާތް ފިޔަވައި އެހެންހުރިހާ ހަރަކާތެއްގައި ޖަމާވަމުން ދިޔަ ފައިސާ އެފައިސާ ލިބެންޖެހޭ ކުއްޖާގެ ބައްޕަ ނުވަތަ މަންމަ ނޫނީ އެހެންވެސް އެއާއިލާގެ އެކައުންޓަކަށް ޖަމާ ނުކޮށް ސަމާގެ ބޭންކް އެކައުންޓަށް ފައިސާ ޖަމާ ކުރީ ކީއްވެގެންތޯއެވެ.
ސަމާއަށް އަމާޒުވި މި ސުވާލާއެކު ބޮޑެތި އިލްޒާމުތައްވެސް އޭނާގެ ބޮލުގައި އެޅިގެން ދިޔައެވެ.
ހުވަދޫމީޑިޔާއިން ސަމާއާ ބައްދަލުވެ އިންޓަވިއު ކުރިއަށް ގެންދިޔައިރު ސަމާގެ ބޭންކް ސްޓޭޓްމަންޓްތައް ވެސް ބަލާލީމެވެ. ސަމާގެ އެކައުންޓްގެ ތަފްސީލު ފެނުމުން ހަގީގަތުގައިވެސް ހައިރާންވާނެކަން ޔަގީނެވެ. ފަންޑްރައިޒް އިވެންޓްގެ ތާރީހުގެ އިވެންޓް ފެށޭ ގަޑި ފެށުމާއެކުހެން އެކި އަދަދުތަކުން ޖަމާވެފައި ހުރި ފައިސާގެ އަދަދު ތައް ގިނަވަމުން ގޮސް ވަކި އަދަދެއް ހަމަވުމާއެކު އެ އަދަދު ހުރި ގޮތަށް ހުރީ އެހެން އެކައުންޓަކަށް ޓްރާންސްފަރ ކޮށްފައެވެ. އެފައިސާ ފޮނުވުމާއެކު އަނެއްކާވެސް ސުމަކުން ފެށިގެން އެހީގެ އަދަދުތައް ޖަމާވާން ފަށްޓައެވެ. އިވެންޓް ނިންމާލުމަށްފަހު އެންމެންގެ ހާޒިރުގައި ލައިވްގައި ޖަމާވެފައި ހުރި ފައިސާ، އެފައިސާގެ ހައްގުވެރިންނަށް ފޮނުވާލައެވެ.
ހުވަދޫ މީޑިޔާ އަށް އިންޓަވިއު ދިނުމުގެ ތެެރެއިން…..ފޮޓޯ؛ ހުވަދޫ މީޑިއާ/ޝަފާ
އަދި ދެން ދެވަނަ ފަންޑްރައިޒިންގ އިވެންޓް ފެށުމާ ހަމައަށް ސަމާގެ އެކައުންޓަށް އެއްވެސް ބޮޑު އަދަދެއްގެ ފައިސާ އެއް ޖަމާ ވެފައި ނެތް ތަން ފެނުމުން އެސުވާލު ކޮށްލެވުނެވެ.
"މުސާރަ ޖަމާވުމާއެކު އެހުންނަނީ މަންމައަށް ފޮނުވާފައި. ސަމާ އަށް މުސާރަ ނޫން އެހެން އެއްޗެއް ޖަމާވެފައި ނުހުންނާނެ،" ތެދުކަން އޮތީ ސީދާ ކުރިމަތިން ހާމަވެ ފެންނާށެވެ. ކުރާނެ އިތުރު ސުވާލެއް ނެތްނަމަވެސް އެތައް ބަޔަކު ސަމާގެ ބޮލުގައި އަޅުވަމުންދާ އިލްޒާމަށް އިޝާރާތް ކޮށް އެސުވާލުކޮށްލީމެވެ.
ސަމާގެ ހިތުންހިތަށް ގެ ފުރަތަމަ ކޭސްގައި، ޔޫސުފުގެ ބެލެނިވެރިންގެ އަތުގައި އިންޓަނެޓްބޭންކިންގ ނެތުމުން ސަމާގެ އެކައުންޓަށް ފައިސާ ޖަމާކުރަން އެދުނީ ހުދު އެ ބެލެނިވެރިން އަމިއްލައަށްކަން އެމީހުން ވަނީ ފާހަގަކޮށްފައެވެ. މިފަންޑަށް ލިބުނު ފައިސާ ސަމާގެ އެކައުންޓުން ފޮނުވާފައި ވަނީ ދެފަހަރެއްގެ މަތިންނެވެ.
ހިތުންހިތަށް ގެ ދެވަނަ ކޭސްގައި ކުއްޖާގެ މަންމައާއި ބައްޕަ އިންޑިޔާގައި ތިބުމާއެކު ކުއްލިއަކަށް ދުރާލާ ރޭވުމެއް ނެތި ވަރަށް ކުއްލި ގޮތަކަށް ހަމަޖެހުނު އިވެންޓަކަށްވެފައި އިންޑިޔާގައި ތިބި ބައެއް ކަމުން ޓިކްޓޮކް ލައިވަށް ޖޮއިން ނުވެވޭނެތީ އެމީހުންގެ ފަރާތުން ބޮޑުދައިތަ ކިޔާ ކުއްޖަކު ލައިވްގައި ބަހައްޓައިގެން ކުރިއަށް ގެންދިޔަ ފަންޑްރައިޒިންގެ ފައިސާ ލައިވް ނިމުމާއެކު އެފަރާތަށް ވަނީ ޖަމާކޮށްދީފައެވެ.
ސަމާ ހުވަދޫމީޑިއާއަށްއިންޓަވިއު ދިނުމުގެ ތެރެއިން………ފޮޓޯ: ހުވަދޫމީޑިޔާ/ޝަފާ
ހިތުންހިތަށް ފަލަސްތީނު ހަރަކާތް
މި ހަރަކާތުގައި އިންޓަނޭޝަނަލް އެއިޑް، އައިއޭސީގެ އެކައުންޓަށް ފައިސާ ޖަމާ ނުކުރީ ކީއްވެ؟ މިއީ ކިރިޔާވެސް ވިސްނޭ ފަރާތެއްގެ ހިތުގައި އުފެދިގެންވާނެ ސުވާލެއް ނޫނެވެ. ސަބަބަކީ ފަލަސްތީނަށް އެހީދޭން ތިބި ހުރިހާ ކުދިންވެސް އެކުދިންނަށް އެއްގައިރު ތެރޭ ހޯދެނީ ކިހާވަރެއްގެ އަދަދެއްތޯ ދެނެގަންނަން ކެތްމަދުވެފައެވެ. އަދި އައިއޭސީގެ އެކައުންޓަށް ފައިސާ ޖަމާ ކުރާނަމަ އެބޭފުޅުންނަށް އެއީ ކޮންފަރާތަކުން ލިބުނު ފައިސާއެއްތޯ ސީދާ ދެނެގަނެ އޭގެ އަދާހަމަ ދިނުން އެއީ ފަސޭހަ ކަމަކަށް ނުވާނެއެވެ.އަދި ވަގުތުވެސް ބޭނުންވާނެއެވެ. އެހެންކަމުން ސަމާގެ އެކައުންޓަށް ޖަމާކޮށް އިވެންޓު ނިމުމުން އައިއޭސީގެ އެކައުންޓަށް އެފައިސާ ފޮނުވާލީއެވެ.
ހިތުންހިތަށް އަންސާރާގެ ކޭސް، މިއީ ދާދި ގާތުގައި ހުދު އަޅުގަނޑަށްވެސް ފެނިގެން ދިޔަ އިވެންޓެކެވެ، އަންސާރާގެ ކިޑްނީ ޓްރާންސްޕްލާންޓަށް ހޯދި ފައިސާގެ ބޭނުން ފުރިހަމައަށް ހިފައި، އަންސާރާގެ ކިޑްނީ ސާޖަރީވެސް މިހާރު ވަނީ ނިމިފައެވެ.
ވަކިވަކިން ބަލާލާއިރު މިހާތަނަށް ކުރިއަށް ގެންދެވިފައިވާ ހަރަކާތްތައް:
- އަންސާރާގެ ބޭސްފަރުވާއަށް: 111،826 ރުފިޔާ އަދި 458.96 ޑޮލަރު
- އަރީކްގެ ބޭސްފަރުވާއަށް: 77،563.08 ރުފިޔާ އަދި 207 ޑޮލަރު
- އައިރާގެ ބޭސްފަރުވާއަށް: 45،525.99 ރުފިޔާ އަދި 380 ޑޮލަރު
- ނޫހުގެ ބޭސްފަރުވާއަށް: 107،879.51 ރުފިޔާ އަދި 138.34 ޑޮލަރު
- ޒައުލްގެ ބޭސްފަރުވާއަށް: 93.108.18 ރުފިޔާ އަދި 446.94 ޑޮލަރު
- ޔަޝްވީގެ ބޭސްފަރުވާއަށް: 58602.04 ރުފިޔާ އަދި 763 ޑޮލަރު
- ފަލަސްތީނުގެ އާއިލާތަކަށް: 100،660 ރުފިޔާ އަދި 380 ޑޮލަރު
- ޝައުރާގެ ބޭސްފަރުވާއަށް: – 61,499.99 ރުފިޔާ / 205 އެމެރިކާ ޑޮލަރު
- ޒަލްޔާގެ ބޭސްފަރުވާއަށް: – 30,589.70 ރުފިޔާ
- ލިވިއާގެ ބޭސްފަރުވާއަށް: – 26,447 ރުފިޔާ
- ޝަހާގެ ބޭސްފަރުވާއަށް:- 47,105.88 ރުފިޔާ
- ފަލަސްޠީނުގެ އާއިލާތަކަށް: – 100,660 ރުފިޔާ / 380 އެމެރިކާ ޑޮލަރު
މިއިން އެއްވެސް އެހީގެ ހަރަކާތެއް ނިމުމަށްފަހު ސަމާގެ ބޭންކް އެކައުންޓަށް ބޮޑު އަދަދަކުން ފައިސާ ޖަމާވެފައި ހުރި އެއްވެސް ޓްރާންސެކްޝަނެއް ފެންނާކަށް ނެތެވެ. ކުޑަ އަދަދަކުންވެސް ފައިސާއެއް ޖަމާވެފައި ހުރީ އިނގިލިން ގުނާލެވޭހާ މަދު ފަހަރެއްގައެވެ.
ސަމާގެ ހިތުންހިތަށް ރަޖިސްޓްރީވިކަމުގެ ރަސްމީ ލިޔުން…………ފޮޓޯ: ސަމާ
"އެއްވެސް މީހަކު ބުނި ބުނުމަކަށް ނޫން މި ރަޖިސްޓަރީ ކުރީ. ފުރަތަމަ މިފަންޑް އިވެންޓްތައް ފެށި ދުވަހުއްސުރެވެސް އުއްމީދެއް، ދެކެމުން އައި ހުވަފެނެއް. ޓިކްޓޮކް ތެރޭ ފަންްޑްރައިޒިން އަށް އަބަދުވެސް ބަސް ބުނަމުން ދިޔައީ. އެއްވެސް މައްސަލައެއް ޖެހުމުގެ ކުރުންވެސް އަބަދުވެސް ގަސްދުކޮށްފައި އޮތް ކަމެއް މި ޖަމިއްްޔާއެއް ގޮތަށް ރަޖިސްޓަރީ ކުރުމަކީ. ވަރަށް މަސައްކަތުން އެކަން ކާމިޔާބުވީ،" ޓިކްޓޮކް ސަމާ،
ދެން މިއޮތީ އިސްމާއީލް ޝިހާބުގެ ވާހަކައެވެ. ސަމާއާ އެންމެ ބޮޑަށް ސުވާލު ކުރިމަތިކުރުވި ޓިކްޓޮކް ލައިވްތަކުން އާންމުންގެ ސަމާލުކަމަށް އައިސްފައިވާ ޓިކްޓޮކް ނަމުންނަމަ ވާވާ އާއި ސަމާގެ ސުލްހައަކީ މުޅި ޓިކްޓޮކްގައި ހިނގަމުން އައި ހަނގުރާމައަށް ފިނިކަަމެއް އައި ކަމަކަށްވިޔަސް އަދިވެސް ސަމާއާ ދިމާއަށް ބަދުނާމުގެ ބަސްތައް އުކާ މީހުން މަދެއް ނޫނެވެ، ސަމާއަށް އެކިފާޑުގެ ނަމުން ގޮވާ މީހުންވެސް މަދެއް ނޫނެވެ.
އެހެންކަމަށްވުމާއެކު ވާވާއާ ސުވާލުކޮށްލުމަކީ މުހިންމުކަމެއްކަމަށް ގަބޫލު ކުރެވުނީއެވެ. ސަމާގެ ކާމިޔާބީއާމެދު ވާވާ ދެކޭ ގޮތް ހިމަނާލުމަށް ވިސްނީ ވެސް މިއީ ސަމާގެ ހިތުންހިތަށް އެހީގެ ޖަމިއްޔާ އާ ގުޅޭ ވާހަކަތަކަކަށް ވީމައެވެ. ހިތުންހިތަށް ޖަމިއްޔާއަކަށް ވުމުގެ ކުރިން، ސަމާއާ ސުލްހަ ވުމުގެ ކުރިން އެންމެ ބޮޑަށް މީހުންގެ ސަމާލުކަން ދެވުނީ ސަމާއާއި ވާވާގެ "ފިނި ހަނގުރާމައަށް ކަމަށް ވާތީއެވެ. ބަހުގެ ތަޅާފޮޅުމަކަށްފަހު ހޫނުކަން މަތީގައި މިދެމީހުން ކުއްލިއަކަށް ބައްދަލުވެ ސުލްހަ ވުމަކީ މިހާތަނަށް ޓިކްޓޮކުން ފެނުނު އެންމެ ބޮޑު ހައިރާންކުރުވަނިވި ހާދިސާކަަމަށް ގިނަ މީހުން ވަނީ ބުނެފައެވެ.
"އަސްލު ސަމާވެސް ހީކުރީ، ދިމާވުމުގެ ކުރިން ހީކޮށްގެން ހުރީ ޕާސަނަލީ ރުޅި އައިސްގެން ކަމަށް، އެކަމަކު އޭގެ ތެރޭގައި ގޮތްނޭނގޭ ކަންތައްތަކެއް، އެހެން މީހުން ނުސީދާކޮށް މީގެ ކުރިން އެވާހަކަ ދެއްކީ ސިއްރު ސިއްރުން، އައި ހެޑް މައި ޑައުޓްސް، މައި ޕްރިންސިޕަލް ހުންނަ ގޮތުން ދެން ކަންތައް ވެގެން ދިޔަގޮތަށް ބަލާއިރު އެއްބަޔަކަާް އެހެން ގޮތަކަށް ހީވިޔަސް އަހަރެން ބޭނުންވީ ޝައްކެއްގެ މަތީ ނުހުރެ އެކަންތައް ދެނެގަންނަން، ދެން އައި ޑިޑް ހާ އަ ފޭވަރ ކަންނޭނގޭ، އައި ހައިލައިޓެޑް ރަސްމީކޮށް ހައިސިއްޔަތެއް އޮވެގެން ދެފުއް ފެންނަ ގޮަތަކަށް އެކަން ކުރުމަށް، ރަޖިސްޓްރީ ކުރާށޭވެސް ބުނެފަ ހުންނާނެ، ޝީ ގޮޓް މައި މެސެޖް، ދެޓްސް އިޓް،
މިހާރު އެއްވެސް މީހަކަށް ނުބުނެވޭނެ އެކަހަލަ އެއްވެސް ވާހަކައެއް ގޯސްކޮށް، ދެން ސަމާއަށް ވެސް އެނގޭނެ ސްޓޭޓްމަންޓް ޑީޓެއިލްސް ބެލިއިރު ވެސް، ކްލިއަރ ކުރަން ބޭނުންވެގެން ކަން، ކޮންމެހެން ޕާސަނަލީ އެއްވެސް ކަމެއް އޮވެގެނެއް ނޫންކަންވެސް، މިހާރު އެއީ ޖަމިއްޔާ އެއް ވެއްޖެއްޔާ، އަހަރީ ރިޕޯޓާއި ފައިނޭންޝަލް އޮޑިޓު ކުރުމާއި މިހުރިހާ ކަމަކުން ދެފުށް ފެންނާނެ، އެކަހަލަ ކަމެއްގައި ވަރަށް މުހިންމު ވާނެ ޓްރާންސްޕޭރެންސީ، ޕަބްލިކް ހިމެނޭ ކަމެއް، އެއްވެސް އިރެއްގައި "އެހީހޯދުން، ފަންޑުކުރުން" މިކަމާ ދެކޮޅެއް ނުވަން، އައި ވޯޒް ނެވަރ އެގެއިންސްޓް ފަންޑްރައިޒިން، އައިހެޑް މައިޑައުޓްސް، އެ ހައްލު ވެގެން ދިޔައިމަ އެ ނިމުނީ،
ކޮންމެ ކަމެއްގައިވެސް އެކަމެއްގެ ތެރޭ ހިމެނޭ މީހުންގެ ހައްގެއް އެއީ ކަންތައްތައް ހިނގަމުންދާ ގޮތް ދެނެގަތުމަކީ، އޭރު އަމިއްލަ އެކައުންޓަށްވެސް ޓްރާންސްފަރ ކޮށްފައި ހުރީމަ ސުވާލު އުފެއްދީ، ދެން އެކަން އެނިމުނީތާ، މިހާރު އެއީ އެންޖީއޯ އެއް، ރަސްމީ ހައިސިއްޔަތަކުން ޖަމިއްޔާއެއްގެ ގޮތަށް އުފަންވެގެން އައިމަ ވަރަށްބޮޑަށް އުފާވޭ، ދެން އެންމެ ބޮޑަށް އުފާވަނީ ޑައިރެކްޓްކޮށް އަހަންނަށް އެކަމުގައި، އެކަހަލަ ރަނގަޅު ކަމެއްގައި ރަނަގަޅު މެސެޖެއް ދެވިގެން ދިޔާމަ، ކުރިންވެެސް ބުނިހެން އައިޑިޑް ހަރ އަ ފޭވަރ ކަން ނޭނގޭ، އަދިވެސް ބުނެލަން، އޭގަ ހަމަ އެއްވެސް ވަރަކަށް ޕާސަނަލް އެއްޗެއް ނެތް، އެކަން އެ ނިމުނީ،" އިސްމާއިލް ޝިހާބު، ޓިކްޓޮކް އަދި މީހުން ދަންނަ ނަމުން ބުނާ ނަމަ ވާވާ
އަޅުގަނޑުގެ މަގުސަދަކީ ސަމާގެ ބޭންކް އެކައުންޓް ދިރާސާކޮށް ކިޔައިދިނުމެއް ނޫނެވެ. އެހެންނަމަވެސް އެތަކެއް ގިނަ ބައެއްގެ އުއްމީދުތައް ގުޅިފައިވާ ސަމާގެ ފަންޑްރައިޒިން "ހިތުން ހިތަށް" މިއަދު ރާއްޖޭގައި ރަޖިސްޓްރީ ވެފައި އޮތް ޖަމިއްޔާއަކަށް ވެފައި އޮތުމުން ލޯމަރާލާފައި އިތުބާރު ކުރަން ފަސޭހަ ބޭފުޅުން ތިބެދާނެއެވެ. އެކަމަކު އެ ޖަމިއްޔާއެއްގެ ގޮތަށް ރަޖިސްޓްރީ ނުކުރާއިރުވެސް ސަމާ މިމަސައްކަތް ކުރަމުން އައިސްފައި ވަނީ ހިތުގެ އަޑިން އިހުލާސްތެރިކަމާއެކުގައިކަން އޭނާގެ ބޭންކްއެކައުންޓް ސްޓޭޓްމަންޓުން ހާމަވެ އެނގެން އެބައޮތެވެ. މިއީ ސްކޭމެއް ކަމަށާއި މަކަރާއި ހީލަތުގެ މަޅިއެއް ކަމަށް ކޮށްފައިވާ އަދި ކުރަމުން އަންނަ ތުހުމަތުތަކާމެދު ކަންބޮޑުވުމުން އެއީ ތެދެއް ނޫންކަން އަމިއްލައަށް ދެނެގަތުމަށް ބޭނުންވީއެވެ. އަދި ސަމާގެ ޒާތީ، އަދި ރަސްމީ މަސައްކަތްތަކާ ގުޅޭ ގޮތުން ލިޔަމުންދާ މިލިޔުމުގައި މިބައިތައް ހިމަނާނުލުމަކީ ބޭއިންސާފެއް ކަމަށް އިހުސާސް ވާތީއެވެ.
ސަމާއާއި އިސްމާއިލް ޝިހާބް، ވާވާ، ގެ ސުލްހަވި ދުވަހުގެ ލައިވްގެ ތެރެއިން
ދެން މިއޮތީ ސަމާގެ އެހެނިހެން ވާހަކަތަކެވެ. ހިތުންހިތަށް ގެ އެއްގަޑިއިރު ތެރޭ ސަމާ ކްރައުޑް ހިފަހައްޓާލުމަށް އެ ކުރާ މަސައްކަތަކީ ހަގީގަތުގައިވެސް ހުނަރެކެވެ. ސަމާގެ ފަހަތުގައި އޭނާގެ ހިތުންހިތަށް ކުރއަށް ގެންދިއުމަށް ޓީމެއް އެއޮތީ ސަބަބެއް ނެތިއެއް ނޫނެވެ، ޓިކްޓޮކް ކޮމިއުނިޓީގައި ސަމާ ހައްގަށް ބަސް ބުނުމަށް ތެދުވާ ފަދައިން އެހިތްވަރާއެކު ތެދުވަން ކެރޭ ހޯސްޓަކު ނެތޭ ބުނުމަކީ އެހެން ހޯސްޓުންނަށް ބުނެވޭ ބޭއިންސާފެއް ނޫނެވެ.
ސަމާގެ ހިތުންހިތަށް އަދު ޖަމިއްޔާ އަކަށް ވެފައި އޮތުމާއެކު ވެސް ސަމާއަށް ނަފުރަތާއި ހަސަދައިގެ ބަހުން ހަަމަލަ ދިނުމަކަށް ހުއްޓުމެއް ނާދެއެވެ.
މިރޭ މިއީ ސަމާގެ ހިތުންހިތަށް ރަސްމީ ހައިސިއްޔަތަކުން، ރާއްޖޭގެ ޖަމިއްޔާތަކުގެ ތެރޭގައި ރަޖިސްޓްރީ ވުމަށްފަހު ފުރަތަމަ ފަންޑްރައިޒިން ހަރަކާތް ބާއްވާ ހާއްސަ ރެއެވެ. ޕްރީމެޗުއަރކޮށް ވިހޭ ކުޑަ ކުއްޖަކުގެ ބަލި ހާލަތަށް ފަރުވާ ހޯދުމަށް އެހީއަށް ބޭނުންވެފައި ތިބި މަންމައަކާއި ބައްޕައެއްގެ މޫނުމައްޗަށް އަނެއްކާވެސް ހިނިތުންވުމެއްގެ އަސަރު ގެނެސްދިނުމުގެ ރެއަކަށް ސަމާއާއި ސަމާގެ ޓީމުން ދަނީ ތައްޔާރުވަމުންނެވެ.
ބަޔަކު ބުނެފާނެއެވެ. "އޭނަ އެކުރަނީ މާބޮޑު ކަމެއް ހެއްޔެވެ؟ އެކަން ކޮންމެ މީހަކަށްވެސް ކުރެވިދާނެއެވެ." ނޫނެކެވެ. އެހެނެއް ނޫނެވެ. ކޮންމެ މީހަކަށް ދެކުދިން ގޮވައިގެން ގެއާއި ދަރިންގެ ކެއިިންބުއިމާއި ކުދިންގެ ސުކޫލުގެ ކަންތައް ބަލަހައްޓަމުން މިފަދަ ބޮޑު ކަމަކަށް ވަގުތު ހުސް ކުރުމަކީ ފަސޭހަކަމަކަށް ނުވާނެއެވެ. ކޮންމެވެސް ހާއްސަގޮތަކާއި ކަމެއް ހުންނަން ޖެހޭނެއެވެ. ދެން އޮތް ވާހަކައަކީ ސަމާ ޕަބްލިކްގައި ޓިކްޓޮކްގައި ގެންދާ ބައެއް ލައިވްތައް އެހާ ހޫނުކޮށް ދަނީ ކީއްވެގެން ހެއްޔެވެ. ސަމާއާ ވާހަކަ ދައްކައި އޮޅުން ފިލުވާލުމުން އެނގުނު ކަމަކީ އޭނާގެ ހިނިތުންވެފައިވާ މޫނަކީ އެހެން މީހުންނަށް ފެންނަ މޫނެއްކަމެވެ. އޭނައަކީ އާދައިގެ އެހެން އަންހެނުން ކަހަލަ އިހުސާސްތަކާއި ހިތާމައާއި ދެރަވުން ވެސް ހުރި އަންހެނެކެވެ. ސްކްރީނުން އެހަރުކަށި ސިފަ ނުދައްކައި، ދިފާއުގައި އަޑު ނުއުފުލައި، ސަމާއަކަށް މި މުޖުތަމައުގައި ފައިތިލަ ހަރުކޮށްލައި ސާބިތުކޮށްލައިގެން ހުންނަން ފަސޭހަ ނުވާނެއެވެ. ވަށައިގެން ނަފުރަތާއި ހަސަދައިގެ ބަސްތައް ތާއަބަދު އޮހެމުންދާ މީހަކަށްވެ ހުރެ، ސަމާ އެކުރާ ހިތްވަރަށް ސާބަސްދޭހާ ވެއެވެ.
އެންމެ ފަހުން ގެންދިޔަ ފަންޑްރައިޒިން ހަރަކާތް ކުރިއަށް ގެންދިއުމުގެ ކުރިން އޭގެ ޕްރީއިވެންޓު ކުރިއަށް ގެންދިޔައީ އިސްމާއީލް ޝިހާބާވެސް އެކުގައި………ފޮޓޯ: ސަމާ
އަދު "ހިތުންހިތަށް" ޖަމިއްޔާއަކަށް ވުމާއެކުވެސް ސަމާއާ ދިމާއަށް ބަދު ބަސް ބުނާ މީހުން މަދުނުވާ ކަމީ، ކޮންމެ ކަމެއް ކުރިކަމުގައި ވިޔަސް އެންމެންގެ ރުހުން އެއްވެސް މީހަކަށް ނުލިބޭނެ ކަމުގެ ހެއްކެކެވެ. ސަމާގެ ބަހަކީ އޭނާދެކެ ލޯބިވާ މީހުންނާއި އޭނާއާމެދު އުއްމީދު ކުރާ މީހުންތަކުގެ ހެޔޮދުއާއާއި ލޯބިން އޭނާ އެހެން ހުރިހާ ކަމެއް ހަނދާން ނައްތާލާ ކަމެވެ. މިއަދާ ހަމައަށް ޓިކްޓޮކުން އޭނައާ ދެކޮޅަށް ނުކުތް ގިނަމީހުން ފަހު ވަގުތު އޭނައާ އެއްބަސްވެ، އެކުވެރިކަމާއި ސުލްހައިގެ ސަލާންކޮށްފައިވުމަކީ ކުޑަ ކަމެއް ނޫނެވެ. ސަމާއަކީ އިންސާފާ ދެކޮޅުވާ ކޮންމެ ވަގުތަކު އަޑުއުފުލާ މީހެއްކަމާމެދު ޝައްކެއް ނެތެވެ. އަދި ކުރިއަށް އޮތް ތަނުގައިވެސް އޭނާގެ އެގޮތް ބަދަލުނުވާނެ ކަމުގެ ޔަގީންކަން އޭނާ ވަނީ އެތައް ގޮތަކަށް ދީފައެވެ.
ދާދި ފަހުން ސަމާއަށް މަރުގެ އިންޒާރުދީ ސަމާގެ ދެކުދިންނަށް ބަދުދުއާ ކުރިމައްސަލައެއް ދިވެހި ފުލުހުންނާ ހަމައަށް ގޮސް، އެމައްސަލައިގެ ތަހުގީގު ކުރިއަށްދާ ވާހަކަ ވެސް ފުލުހުން ވަނީ ހާމަ ކޮށްފައެވެ. މިއީ ދިވެހި މުޖުތަމައުގެ ހާލަތު ގޮސްފައި އޮތް ހިސާބެވެ. މިފަދަ އެތައް ކަމަކާއެކުވެސް ސަމާގެ ހިތްވަރަކަށް ކުޑަ ބަދަލެއްވެސް ނާދެއެވެ. އޭނާ ސްކްރީނުގެ ކުރިމައްޗަށް ދެންވެސް އަންނާނީ ހަމަ ހެވިފައި ހުރެ، އުފާވެރި މޫނެއްގައެވެ. އޭނާގެ ޓީމާއެކު މިރޭ ސްކްރީނަށް އައުމަށް ތައްޔާރުވަމުން އެދަނީވެސް ހަމަ މިދެންނެވިފަދައިން ހިތްވަރާއި ޔަގީންކަމާއެކުގައެވެ.
ކޮންމެ މީހަކީވެސް ތަފާތު މީހަކަށް ވާގޮތަށް ސަމާއަކީވެސް ތަފާތު އަންހެނެކެވެ، އެހެންނަމަވެސް އެކަނިވެރި މަޔަކަށް ވެ ހުރެ ސަމާ އެދައްކާ ހިތްވަރާއި މިއަދު ޖަމިއްޔާއެއް ކޮޅަށް ނެގުމަށް އޭނާ ކޮށްފައިވާ މަސައްކަތާއި އެ ހިސާބަށް އައުމަށް ހުރަސް އެޅި އެތައް ބައެއް ތިބުމާއެކުވެސް ކާމިޔާބީގެ މިމަންޒިލާހަމައަށް އައުމުގައި ދެއްކި ހިތްވަރަށް އައްސަރިބަހާއި ސާބަސް ދޭވަރު ނުވޭތޯއެވެ. ޔަގީނުންވެސް ސަމާގެ ހިތުންހިތަށް އެއީ އެތައް ބައެއްގެ އުއްމީދެކެވެ. ސަމާގެ އުއްމީދުތަކާއި ހުވަފެންތައް ގުޅިފައިވާ އޭނާގެ އުއްމީދީ ޕްރޮޖެކްޓަކީ ދެންވެސް ހަމަ ހިތުންހިތަށް ކަމާމެދު އެއްވެސް ޝައްކެއް ނެތެވެ.
ހުވަދޫމީޑިއާގެ ޓީމުން އެދެނީ ސަމާއާއި ސަމާގެ ހިތުންހިތަށް ޖަމިއްޔާއަށް އަބަދުވެސް ކާމިޔާބާއި ފަހިކަން ލިބުނެވެ. ހިތްވަރާއެކު ދެންވެެސް އަބަދުވެސް ހިނިތުންވެ ހުރެ ކުރިއަށް ދިއުމެވެ.