ހިޔާ ޓަވަރުގައި މީހަކު ރަހީނުކުރީ މަސްތުވާތަކެތީގެ ވިޔަފާރިއެއްގެ ތެރެއިން ހިނގި ދެބަސްވުމެއްގައި ކަމަށް ފުލުހުން ހާމަކޮށްފިއެެވެ.
މާލޭގެ ހިޔާ ޓަވަރުގައި މީހަކު ރަހީނުކުރި މައްސަލައިގައި، އެކަން ހިނގާފައިވަނީ މަސްތުވާތަކެތީގެ ވިޔަފާރިއެއްގެ ތެރެއިން އުފެދުނު ދެބަސްވުމެއްގެ ސަބަބުން ކަމަށް މިހާތަނަށް ކުރެވުނު ތަހުގީގުން އެނގިފައިވާ ކަމަށް ފުލުހުން ވަނީ ބުނެފައެވެ. ފުލުހުން މިކަން ހާމަކުރީ މިއަދު ބޭއްވި ނޫސްވެރިންގެ ބައްދަލުވުމުގައެވެ.
ހިޔާ ޓަވަރުގެ އެޕާޓްމަންޓެއްގައި މީހަކު ރަހީނުކޮށްގެން އުޅޭކަމަށް ފުލުހުންނަށް މައުލޫމާތު ލިބިފައިވަނީ 12 މާރިޗު 2024 ވަނަ ދުވަހުގެ ރޭ 19:40 ހާއިރުކަމަށް ކަމަށާއި ރަހީނުކޮށްފައިވާ މީހާ ސަލާމަތްކޮށް، އެއަމަލު ހިންގުމުގައި އުޅުނު 12 މީހުން ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
މި މައްސަލައާ ގުޅޭގޮތުން ވާހަކަދައްކަވަމުން އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ، ރަހީނުކޮށްގެން ގެންގުޅުނު މީހާއާއި، ރަހީނުކުރުމުގައި ބައިވެރިވި މީހުންނާ ދެމެދު ގުޅުންތަކެއް އޮތްކަން ތަހުގީގަށް ފާހަގަވެފައިވާ ކަމަށެވެ. އަދި އެ ގުޅުންތަކަކީ މަސްތުވާތަކެތީގެ ވިޔަފާރިއާ ގުޅޭ ގުޅުންތަކެއްކަންވެސް ފާހަގަކުރެވިފައިވާ ކަމަށް އެސިސްޓަންޓް ކޮމިޝަނަރ އޮފް ޕޮލިސް ވިދާޅުވިއެވެ.
މި މައްސަލައިގެ ފަހަތުގައި ހުރިކަމަށް ތުހުމަތުކުރެވޭ މީހާއަކީ ރ. އިންނަމާދޫ ފެރޯމާގޭ މުޙައްމަދު ސަލީމް (65 އަހަރު) ކަމަށް ހެޑް އޮފް ޑްރަގް އެންފޯސްމަންޓް، ސުޕްރިންޓެންޑެންޓް އޮފް ޕޮލިސް ނާހިދު ހުސައިން ވަނީ ހާމަކުރައްވާފައެވެ. އަދި ކޯޓު އަމުރުގެ ދަށުން އޭނާ ބަލައި ފާސްކުރިއިރު، އޭނާގެ ހަށިގަނޑުން ޝައްކުކުރެވޭ އެއްޗެއް ހުރި ޖުމްލަ 13 ރަބަރު ޕެކެޓް ފެނިފައިވާ ކަމަށާއި، އޭނާ ދިރިއުޅޭ އެޕާޓްމަންޓް ބަލައި ފާސްކުރިއިރު މަސްތުވާތަކެއްޗަށް ޝައްކުކުރެވޭ އެއްޗެއް ހުރި 8 ރަބަރު ޕެކެޓް ފެނިފައިވާ ކަމަށް ނާހިދު ވިދާޅުވިއެވެ. އަދި މުޙައްމަދު ސަލީމަކީ އުމުރުދުވަހަށް ޖަލަށް ލާފައިވާ މީހެއްކަމަށްވެސް ނާހިދު ފާހަގަކުރެއްވިއެވެ.
ހިޔާ ޓަވަރުގައި މީހަކު ރަހީނުކޮށްފައި ހުރީ ހިޔާ 9 ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައެވެ. މި މައްސަލައިގައި ހައްޔަރުކުރި 12 މީހުންގެ ބަންދަށް ވަނީ މުއްދަތު ޖަހާފައެވެ.
ފުލުހުން ބުނެފައިވާ ގޮތުގައި ރަހީނުކޮށްފައިވާ މީހާ ސަލާމަތްކުރީ، ފުލުހުން ގޮސް އެ އެޕާޓްމަންޓްގެ ދޮރު ވައްޓާލައިގެން އެތަނަށް ވަދެގެންނެވެ. އަދި އެމީހާ ސަލާމަތްކޮށްފައިވަނީ އޭނާގެ އިނގިލި ބުރިކޮށްލަން ތައްޔާރުވެފައިވަނިކޮށްކަމަށް ފުލުހުން ބުނެފައިވެއެވެ.
އެ ސީނަށް ދިޔަ ޕީއެސްއެމްނިއުސްގެ ނޫސްވެރިންނަށް އެ އެޕާޓްމަންޓުގައި ދަގަނޑާއި ހަނޑަހަ ފަދަ ތަކެއްޗާއި، ގެއްލުންދިނުމަށް ބޭނުންކުރާ އެކި ބާވަތުގެ ތަކެތިވެސް ފެނިފައިވެއެވެ. މީގެ އިތުރުން، އެތަނުން މަސްތުވާތަކެތި ބޭނުންކުރުމަށް ބޭނުންކުރާ އެކި ޒާތުގެ ތަކެތިކަމަށް ބެލެވޭ ޒާތުގެ އެއްޗެހިވެސް ފެނިފައިވާކަމަށް ނޫސްވެރިން ބުނެފައިވެއެވެ.
މި މައްސަލައާ ގުޅިގެން ފުލުހުން ދަނީ ފުޅާ ދާއިރާއެއްގައި ތަހުގީގެއް ކުރިއަށް ގެންދަމުންނެވެ.