ހުޅުމާލޭން މަސްތުވާތަކެއްޗާއެކު ހައްޔަރުކުރެވުނު އުމުރުން ދުވަސްވީ މީހާއަކީ ކުރީގެ ސަރުކާރުން ގޭބަންދަށް ބަދަލުކޮށްފައިވާ މީހެއްކަމަށް ފުލުހުން މިއަދު ހާމަކޮށްފިއެވެ.
“މިހާ ހިސާބަށް އަޅުގަނޑުމެން ބެލި ބެލުމުން މި ފާހަގަވަނީ ރަހީނުކުރި ފަރާތާއި، ރަހީނުކުރުމުގައި ބައިވެރިވި މީހުންނާއި ގުޅުންތަކެއް އޮވޭ. އެ ގުޅުންތަކުގެ ތެރޭގައި ބޮޑަށް އަދި ތަހުޤީގުން އައިޑެންޓިފައިވާގޮތުގައި ހަމަ ބޮޑަށް ބެލެވެނީ މަސްތުވާތަކެތީގެ ވިޔަފާރިކުރުމުގެ ތެރޭގައި އުފެދުނު ދެބަސްވުމުގެ ތެރެއިން ހިނގައިގެން އުޅޭ ކަމެއްގެ ގޮތުގައި.” އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ހެޑް އޮފް ޑްރަގް އެންފޯސްމަންޓް، ސްޕްރިންޑެންޓެޑް އޮފް ޕޮލިސް ނާހިދު ޙުސައިން ވިދާޅުވީ، ރަހީނު ކުރުމުގެ އެ މައްސަލައިގެ ފަހަތުގައި ހުރިކަމަށް ތުހުމަތުކުރެވޭ މީހާއަކީ ރ. އިންނަމާދޫ ފެރޯމާގޭ މުހައްމަދު ސަލީމު ކަމަށެވެ. ކޯޓު އަމުރެގެ ދަށުން 65 އަހަރުގެ އެމީހާ ހައްޔަރު ކުރީ، މިމަހުގެ 12 ވަނަ ދުވަހު އޭނާ ދިރިއުޅެމުން ދިޔަ ހިޔާ ފްލެޓަކުންނެވެ.
ނާހިދު ވިދާޅުވިގޮތުގައި، އޭނާގެ ހަށިގަނޑާއި ދިރިއުޅޭ ތަން ބަލައި ފާސްކުރިއިރު، މަސްތުވާތަކެތި ކަމަށް ޝައްކުކުރެވޭ އެއްޗެހި ހުރި ޖުމްލަ 21 ރަބަރު ޕެކެޓް ފެނިފައިވެއެވެ.
މުހައްމަދު ސަލީމްއަކީ މީގެ ކުރިންވެސް މަސްތުވާތަކެތީގެ މައްސަލަތަކުގައި ދަޢުވާކުރެވި ހުކުމްކޮށްފައިވާ މީހެކެވެ. 2016 ވަނަ އަހަރު ޑައިމޯފިން ޓްރެފިކް ކުރުމުގެ މައްސަލައެއްގައި ކްރިމިނަލް ކޯޓުން އުމުރު ދުވަހުގެ ޖަލު ހުކުމެއް އޭނާގެ މައްޗަށް ކޮށްފައިވެއެވެ. މި ހުކުމް ހައިކޯޓުން ދަމަހައްޓާފައިވަނީ 2022 ވަނަ އަހަރުގެ އޮކްޓޯބަރު މަހުގެ 6 ވަނަ ދުވަހުއެވެ.
“މި މައްސަލައިގައި ހުކުމް ތަންފީޒު ކުރަމުން ދަނިކޮށް 8 ޖުލައި 2021 ވަނަ ދުވަހު އޭނާ ވަނީ ގޭބަންދަށް ބަދަލުކޮށްފަ.” ނާހިދު ވިދާޅުވިއެވެ.
މީގެ އިތުރުން، 2023 ވަނަ އަހަރު ޑައިމޯފިން ޓްރެފިކް ކުރުމުގެ އިތުރު މައްސަލައެއްގެ ޝަރީޢަތް މިހާރުވެސް ހުޅުމާލޭ ކޯޓުގައި ހިނގަމުންދާކަމަށް ނާހިދު ވަނީ ވިދާޅުވެފައެވެ.
މި މަހުގެ 14 ވަނަ ދުވަހު، މުހައްމަދު ސަލީމްގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް އަމުރު ކޮށްފައިވާ ކަމަށް ފުލުހުން ބުނެފައިވެއެވެ.
މި މައްސަލައާ ގުޅިގެން އިތުރު ތަހުގީގޔތައް ކުރިއަށްދާ ކަމަށް ފުލުހުން ވަނީ ބުނެފައެވެ