މީގެ އިތުރުން، ބަނގުރަލުގެ ވަގު ވިޔަފާރި ހުއްޓުވުމަށް ހާއްސަ މަސައްކަތްތަކެއް ކުރަމުންދާ ކަމަށް ފުލުހުން ހާމަކުރިއެވެ. މި މަސައްކަތުގެ ތެރެއިން، މިދިޔަ މުއްދަތުގައި 57 ސަފާރީއެއް ބަލައި ފާސްކޮށްފައިވާ ކަމަށާއި، ބަނގުރަލާއި މަސްތުވާތަކެއްޗާ ގުޅޭ އެކި މައްސަލަތަކުގައި 1,009 މީހުން ހައްޔަރުކޮށްފައިވާ ކަމަށް ފުލުހުން ބުންޏެވެ.
އަދި މަސްތުވާތަކެއްޗަށް ދެވިހިފާފައިވާ މީހުންނާއި ކުށްކުރާ މީހުން ފަރުވާގެ ނިޒާމަށް ވެއްދުމަށް ކުރެވޭ މަސައްކަތުގެ ދަށުން 49 މީހަކު ނޭޝަނަލް ޑްރަގް އެޖެންސީ (އެންޑީއޭ) އާ ހަވާލުކޮށްފައިވާ ކަމަށްވެސް ފުލުހުން ހާމަކުރިއެވެ. ހަމައެހެންމެ މާލެ ސަރަހައްދުގައި، ކާޓެލްގެ ނަމުގައި މަސްތުވާތަކެތި ވިއްކައި، އެތަންތަނުގައި ފަސޭހަކަމާއެކު މަސްތުވާތަކެތި ބޭނުންކުރެވޭނެ މަގުފަހިކޮށް، މަސްތުވާތަކެތި ބޭނުން ކުރާމީހުންނަށް ހުޅުވާލެވިފައިވާ ހިދުމަތް ދެމުން ގެންދިޔަ ތަންތަން ބަލައި ފާސްކޮށް، 48 ތަނެއް މިހާތަނަށް ބަންދުކޮށްފައިވާ ކަމަށްވެސް ފުލުހުން ވަނީ ހާމަކޮށްފައެވެ.