އެމަޖެންސީ ސަރވިސް ހޮޓްލައިން 911، ހުރިހާ އިދާރާތަކެއް ގުޅާލެވި، ކުއްލި ހާލަތްތަކުގައި އިޖާބަދިނުން އަވަސްވެގެންދާނެ ކަމަށް ދާހިލީ ސަލާމަތާ ފަންނިއްޔާތާބެހޭ ވަޒީރު އަލީ އިހުސާން ވިދާޅުވެއްޖެއެވެ.
ވަޒީރު ހިމެން ވިދާޅުވީ ކުއްލި ހާލަތްތަކުގައި ރާއްޖޭގައި ހަރަކާތްތެރިވާ ހުރިހާ އިދާރާތަކަކަށް އެއް ނަންބަރަކުން ގުޅޭގޮތް ހަމަޖެއްސުމަށްޓަކައި ތައާރަފްކުރި އެމަޖެންސީ ސަރވިސް ހޮޓްލައިން “911” އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ވަޒީރު އަލީ އިހުސާން ވިދާޅުވީ، ކުއްލި ހާލަތްތަކުގައި އިޖާބަދިނުން އަވަސްކުރުމަށް ގިނަ މަސައްކަތްތަކެއް ސަރުކާރުން ކުރައްވަމުންގެންދަވާކަމަށެވެ. އެކަމަށް އެޅުނު އެންމެ މުހިންމު ފިޔަވަޅުކަން ވަޒީރު ފާހަގަކުރައްވައި ވަޒީރު ވިދާޅުވީ ކުއްލި ހާލަތްތަކުގައި ހަރަކާތްތެރިވާ ހުރިހާ އިދާރާތަކަކަށް އެއް ނަންބަރަކުން ގުޅޭނެ ނިޒާމެއް ތައާރަފް ކުރެވިގެންދިއުމާއެކު ހިދުމަތް އަވަސް ވެގެންދާނެކަމަށެވެ.
މި ހިދުމަތުގެ ތެރެއިން އެމްބިއުލާންސް، ފުލުހުން، އެމްއެންޑީއެފްގެ ފަޔަރ އެންޑް ރެސްކިއު އަދި ކޯސްޓްގަރޑްގެ ހިދުމަތް ގުޅާލާފައިވާކަމަށާއި އަދި މި ހިދުމަތް ބަލަހައްޓާނީ ފުލުހުންގެ ހިދުމަތުންކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ އެމަޖެންސީ ސަރވިސްގެ ނަންބަރަށް ހުށައަޅާ މައްސަލަތައް ކަމާގުޅުންހުރި ހުރިހާ އިދާރާތަކަށް ވަގުތުން އެ މަޢުލޫމާތު ފޯރުކޮށްދެވޭކަމަށެވެ. އަދި އެންމެ ނަންބަރަކަށް ގުޅާ މަޢުލޫމާތު ދިނުމުން، ދެން ހިމެނޭ ހުރިހާ އިދާރާތަކަށްވެސް އެ މަޢުލޫމާތު ފޯރުކޮށްދެވޭނޭކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ހާލަތެއް ދިމާވުމުން ގުޅަންވީ ނަންބަރު ރައްޔިތުންނަށް ނޭނގުމާއި އަދި ވަކި ހާއްސަ ހާލަތްތަކާއި ގުޅިގެން ގުޅަންޖެހޭ އިދާރާވެސް ނޭނގޭ ޙާލަތު ވަރަށް ގިނައިން ކުރިމަތިވާކަމަށެވެ. އަދި އެ ހުރިހާ މައްސަލަތަކަށް، މި ހިދުމަތުގެ ސަބަބުން ހައްލު ލިބޭނެކަމަށް ވަޒީރު ވިދާޅުވިއެވެ.
“ކަމެއް ހިނގީމަ ގިނަފަހަރަށް އެއް ހިދުުމަތަކަށް މި ގުޅަނީ. އެކަމަކު އެތަނެއް ވެދާނެ އެމަޖެންސީ ގިނަ ޚިދުމަތްތަކެއް ދާންޖެހޭ ހާލަތެއް އޮތް ތަނަކަށް. އެކަމަށް މި ހައްލު ލިބެނީ. ހުރިހާ ހިދުމަތަކަށް އެއްފަހަރާ މަޢުލޫމާތު އެބަ ފޯރުކޮށްދެވޭ. އެހެންވީމަ އެ ހާދިސާއަކަށް އިޖާބަދޭ ވަގުތު ވަރަށް ބޮޑަށް އެބަ އަވަސްކުރެވޭ.” ދާހިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިހުސާން.