ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވަމުން އެ ގެންދަވަނީ ރައްޔިތުންނަށް ފައިދާވާނެ، އުނދަގޫ ނިންމުންތަކެއް ކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވެއްޖެއެވެ.
އެހެން ރައީސުންނަށް ކުރަން ނުކެރުނު، މުޅި ގައުމަށާއި ރައްޔިތުންނަށް ދުރު ރާސްތާ އަދި ކުރު ރާސްތާގައި ލާބަޔާއި މަންފާކުރާނެ އުނދަގޫ ނިންމުންތަކެއް ކަމަށެވެ.
ނަރީޝް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ. މިއީ ދާދި ފަހުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލި ބޭރު ފައިސާގެ ގަވާއިދުގެ ދަށުން، ރިސޯޓުތަކަށް އަންނަ ފަތުރުވެރިންގެ އަތުން 500 ޑޮލަރު މަރުކަޒީ ބޭންކަށް މާރުކުރަން ލާޒިމްކުރި ކުރުމާ ދެކޮޅަށް ރިސޯޓުތަކުގެ ވެރިން ވާހަކަދައްކަން ފެށުމާ ގުޅިގެން ނަރީޝް ކުރެއްވި ޕޯސްޓެއްކަމަށް ބެލެވެއެވެ.
ނަރީޝް ވިދާޅުވެފައިވަނީ “ރާއްޖޭގެ މެޖޯރިޓީ ރައްޔިތުންނަކީ އާދައިގެ ދިރިއުޅުމެއް އުޅެން ޖެހިފައިވާ ރައްޔިތުން، ކަންކަން ސަރުކާރުން ނިންމަންވާނީ މެޖޯރިޓީ އަދި މުޅި ގައުމަށް ފައިދާވާ ގޮތަށް!” ކަމަށެވެ.
އިތުރަށް ނަރީޝް ވިދާޅުވެފައިވަނީ ގައުމަށް ހެޔޮ އެދޭނަމަ ހުރިހާ ސިޔާސީ ލީޑަރުން މި ނިންމުންތަކަށް މަރުހަބާ ކިޔައި، އެއްބާރުލުން ދޭން ޖެހޭ ކަމަށެވެ. އަދި ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރިން ރައްޔިތުންނަށް ވަރަށް ސާފުކޮށް ފެންނާނެ ކަމަށް ވެސް ނަރީޝް ވިދާޅުވިއެވެ.
ރައީސް ޑރ މުއިއްޒުގެ ފަރާތްޕުޅުން ނަރީޝް ނަންގަވާފައިވާ ބަސްފުޅެއްގައި ވިދާޅުވެފައި ވަނީ މި ސަރުކާރު ކުރިޔަށް ދާނީ ރައްޔިތުންގެ ފަޅީގައި އޮވެ، ހުރިހާ ރައްޔިތުންނަށް އިންސާފުވެރި ކަމާއެކު ތަނަވަސްކަން ހޯދައިދިނުމަށް މަސައްކަތް ކުރާނެ ކަމަށެވެ.
މި މައްސަލައާ ގުޅިގެން ރާއްޖޭގެ ނަން މަޝްހޫރު ގިނަ ރިސޯޓް ބްރޭންޑްތައް ހިންގާ ވިޔަފާރިވެރިން ވަނީ އެ ގަވާއިދުގެ ދަށުން ފަތުރުވެރިންގެ އަތުން 500 ޑޮލަރު އެމްއެމްއޭއަށް މާރު ކުރުމަކީ ނުވާނެ ކަމެއް ކަމަށް ބުނެފައެވެ. ނަމަވެސް ސަރުކާރުން ދަނީ މި ނިންމުމަށް ތާއީދުކުރަމުންނެވެ.