އިއްޔެ ނިމުނު އިންޓަރ ސްކޫލް އެތްލެޓިކްސް ޗެމްޕިއަންޝިޕުގައި ވާދަކުރި ގދ އަތޮޅު ތައުލީމީ މަރުކަޒަށް ގިނަ ވަނަތަކާއިއެކު މިއަހަރު އެތްލެޓިކްސް މުބާރާތްތަކުން ރަނގަޅު ކާމިޔާބީތަކެއް ހޯފައިފިއެވެ.
މިމަހު 9 އިން 14 އަށް ހުޅުމާލެ ސިންތަޓިކުގައި ކުރިއަށް މިމުބަަރާތުގައި ރާއްޖޭގެ އެކިއެކި ސްކޫލްތަކުން 1500 އަށްވުރެ ގިނަ ދަރިވަރުން ވަނީ ވާދަކޮށްފައެވެ. މި މުބާރާތުގައި ގދ އަތޮޅު ތައުލީމީ މަރުކަޒުން ބައިވެރިވީ 15 އަހަރުން ދަށް އަދި 17 އަހަރުން ދަށުގެ އުމުރުފުރާގައެވެ.
ގދ އަތޮޅު ތައުލީމީ މަރުކަޒުގެ އެތްލެޓިކްސް ޓީމް އަދި އޮފިޝަލުން/ފޮޓޯ: ނަޖާހް- ހުވަދޫ
މުބާރާތުގައި 5 ރެކޯޑްގެ އިތުރުން 17 އަހަރުންދަށުގެ އެންމެ މޮޅު އެތްލީޓްގެ މަގާމާއި، 17 އަހަރުން ދަށުގެ ފިރިހެން ޗެމްޕިއަންޓީމަކީ ވެސް ގދ އަތޮޅު ތައުލީމީ މަރުކަޒެވެ.
މި ސްކޫލުން މި މުބާރާތުގައި ހަދާފައިވާ ރެކޯޑްތަކަށް ބަލާއިރު 4*200 މީޓަރ ރިލޭއިން މީޓް ރެކޯޑް، 17 އަހަރުންދަށުގެ 200 މީޓަރ ދުވުމުންވެސް ވަނީ މީޓް ރެކޯޑެއް ހަދާފައެވެ. މި ރެކޯޑް ހަދާފައިވަނީ މި މުބާރާތުން އެންމެ ފާހަގަ ކޮށްލެވުނު އެއް އެތްލީޓް އަދި އުއްމީދީ ދުވުންތެރިޔާ އަހްނަފް ރައްޔާނެވެ.
17 އަހަރުން ދަށުގެ 100 މީޓަރ ހާޑްލްސް އިން ގދ އަތޮޅު ތައުލީމީ މަރުކަޒުން މީޓް ރެކޯޑް ހަދާފައިވާއިރު، 15 އަހަރުން ދަށުގެ ލޯންގް ޖަމްޕާއި، ޓްރިޕްލް ޖަމްޕުންވެސް ވަނީ މީޓް ރެކޯޑް ހަދާފައެވެ. މިއާއި އެކު ގދ އަތޮޅު ތައުލީމީ މަރުކަޒު ވެގެން ގޮސްފައިވަނީ މި މުބާރާތުގައި އެންމެ ގިނަ ރެކޯޑް ހެދި ސްކޫލްގެ ގޮތުގައެވެ.
17 އަހަރުން ދަށުގެ ބެސްޓް އެތްލީޓް އަހްނަފް ރައްޔާން/ފޮޓޯ: އިމޭޖްސް
ކާމިޔާބާއި ގުޅިގެން ހުވަދޫއިން ސުވާލުކޮށްލުމުން ތައުލީމީ މަރުކަޒުގެ ކޯޗު ރައުހަތު ވިދާޅުވީ މުބާރާތުގައި ލިބުނު ކާމިޔާބާއި ދޭތެރޭ ހިތްހަމަޖެހޭ ކަމަަށެވެ. އަދި ހުރިހާ ކުދިންގެ ޕާފޯމަންސާއި ދޭތެރޭވެސް ހިތްހަމަޖެހޭ ކަމަށެވެ. ކުރިއަށްހުރި މުބާރާތްތަކަށް މިހާރަށްވުރެ ބޮޑަށް ތައްޔާރުވާނެކަމަށެވެ.
މީގެ އިތުރުން ގދ ތިނަދޫ ސިޓީގެ އަބޫބަކުރު ސުކޫލުން ވާދަކުރި 13 އަހަރުން ދަށުގެ ޓީމްވަނީ މުބާރާތުގެ ރަނަރަޕްކަން ކާމިޔާބުކޮށްފައެވެ.
އެތްލެޓިކްސްގައި ގދ ތިނަދޫ ސިޓީ ފާހަގަވެގެން ގޮސްފައިވަނީ ކާމިޔާބު ސިޓީއެއްގެ ގޮތުގައެވެ.
ރާއްޖޭގެ މިވަގުތު އެންމެ ބާރު ދުވުންތެރިޔާ އިބާދުالله އާދަމްއަކީ ވެސް ތިނަދޫސިޓީއަށް ނިސްބަތްވާ އެތްލީޓެކެވެ. އެންމެ ފަހުން ބޭއްވުނު އޮލިމްޕިކްސްގައި ވާދަކުރި އިބާދުالله މިވަގުތު އިތުރު ތަމްރީން ހަދަމުންދަނީ ޖަމައިކާގައެވެ.