ފޭކު ސްލިޕެއް ފޮނުވައިގެން ރެޑްބުލް އާއި ސިނގިރޭޓު ގަތް މީހަކު ޖޫރިމަނާ ކުރަން ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި ދައުވާ ލިބުނު ފަރާތަކީ ހދ. ވައިކަރަދޫ، މިލާފަރު، އަލީ ރަޝީދެވެ. އަލީ ރަޝީދު ވަނީ 23 ޖޫން 2021 ވަނަ ދުވަހު މާލޭ ޖަންބުމަގުގައި ހުންނަ ހިޓްޒްމާޓް ފިހާރައިން 5 ރެޑްބުލް އާއި ކެމަލް ހާޑް ބްރޭންޑުގެ 3 ސިނގިރޭޓު ފޮށި ގަތުމަށްފަހު ފޭކު ސްލިޕެއް ފިހާރައިގެ ވައިބަރ ނަންބަރަށް ފޮނުވާފައެވެ.
ފިހާރައިން އެ ސްލިޕަކީ ފޭކު ސްލިޕެއް ކަމަށް ޝައްކުވެގެން ވަގުތުން ފުލުހުންނަށް މައްސަލަ ހުށަހެޅުމާ ގުޅިގެން ފުލުހުން އަލީ ރަޝީދު ހޯދައި ހައްޔަރުކުރިއެވެ.
މި މައްސަލައިގައި އަލީ ރަޝީދުގެ މައްޗަށް ދައުވާކޮށް ކްރިމިނަލް ކޯޓަށް ހާޒިރުކުރުމުން، އިބްތިދާއީ އަޑުއެހުމުގައި އޭނާ ބުނެފައިވަނީ ވަކީލަކާ ނުލައި މައްސަލަ ކުރިއަށް ގެންދަން ބޭނުންވާ ކަމަށެވެ. އަދި އެފަދަ އަމަލެއް އޭނާ ކޮށްފައިނުވާނޭ ކަމަށް ބުނެ އަލީ ރަޝީދު ވަނީ އެ ދައުވާއަށް އިންކާރުކޮށްފައެވެ.
ދައުލަތުން މި މައްސަލައިގައި ހެކިންގެ ގޮތުގައި ހުށަހެޅި ފަރާތްތަކުގެ ތެރޭގައި ފިހާރައިގެ ވެރިފަރާތް ކަމުގައިވާ ގއ. ދާންދޫ ކަރަކްނާގެ، ޝާން އަލީ އާއި ބަންގްލަދޭޝްގެ ރައްޔިތެއް ކަމަށްވާ މުހައްމަދު ސަބުޖް ޚާން ހިމެނެއެވެ. މީގެ އިތުރުން ފޭކު ސްލިޕާ ގުޅޭ ހެކިތައް ވެސް ފުލުހުން ވަނީ ހުށަހަޅާފައެވެ.
ޝަރީއަތުގެ އަޑުއެހުމުގައި އަލީ ރަޝީދު ބުނެފައިވަނީ އެ ސްލިޕަކީ އޭނާ ފޮނުވި ސްލިޕެއް ނޫން ކަމަށާއި އޭނާ ފިހާރައަށް ދިޔައީ ރަހުމަތްތެރިޔަކު ބުނެގެން އޭނާ ގަތް ސާމާނުކޮޅެއް ބަލައި ކަމަށެވެ. އަދި އެ ޓްރާންސްފަރއަކީ އޭނާ ކުރި އެއްޗެއް ނޫން ކަމަށާއި މުދަލަށްވާ އަގަށް ފިހާރައަށް ފައިސާ ޓްރާންސްފަރ ކުރީ އޭނާގެ ރަހުމަތްތެރިޔާ ކަމަށް ބުނެފައިވެއެވެ. ނަމަވެސް ރަހުމަތްތެރިޔާގެ “ނަން ނޭނގޭ” ކަމަށް އޭނާ ބުނެފައިވެއެވެ.
މި މައްސަލައިގައި ކްރިމިނަލް ކޯޓުން ނިންމީ އަލީ ރަޝީދު 2 މަހާއި 12 ދުވަހު ޖަލަށްލުމަށެވެ. ނަމަވެސް މި މައްސަލައާ ގުޅިގެން އަލީ ރަޝީދު 14 ދުވަހާއި 16 ގަޑިއިރު އަދި 45 މިނެޓު ބަންދުގައި ހޭދަކޮށްފައިވާތީ މި މުއްދަތު ޖަލު ހުކުމުން އުނިކުރުމަށް ކްރިމިނަލް ކޯޓުން ނިންމިއެވެ.
އެހެންނަމަވެސް އަލީ ރަޝީދު އެދުނީ ޖަލު ހުކުމު ޖޫރިމަނާއަކަށް ބަދަލުކޮށްދިނުމަށެވެ. އެހެންކަމުން މަކަރާއި ހީލަތުގެ މައްސަލައިގައި އަލީ ރަޝީދު 11،600 ރުފިޔާއިން ޖޫރިމަނާ ކޮށްފައިވެއެވެ. އަދި އެ ފައިސާ މިދިޔަ ބުރާސްފަތި ދުވަހުން ފެށިގެން 1 މަސް ދުވަސްތެރޭ މީރާއަށް ދެއްކުމަށް ކްރިމިނަލް ކޯޓުން ވަނީ އަމުރުކޮށްފައެވެ.