އައިޑީކާޑާއި ޕާސްޕޯޓުގެ ހިދުމަތް މުޅި ރާއްޖެއަށް ފުޅާކުރުމުގެ މަޝްރޫއަކީ ޒަމާނީ ޓެކްނޮލޮޖީގެ އަލީގައި ހިދުމަތް ދެއްވުމަށް ރައީސުލްޖުމްހޫރިއްޔާ ގެންގުޅުއްވާ ވިސްނުންފުޅު ކަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.
ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމާއި، ޕާސްޕޯޓު ދޫކުރުމުގެ ހިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ މިމަޝްރޫއު ފެށުމާއެކު މިއަދަކީ ދިވެހި ތާރީޚުގައި ރަން އަކުރުން ފަވާލެވިގެންދާނެ ދުވަހެއް ކަމަށެވެ.
ރައްޔިތުންނަށް ބޭނުންވާ އަސާސީ ހިދުމަތްތައް ކަށަވަރުކަމާއެކީ ދެއްވާނެކަމުގެ ޔަގީންކަމަކީ ރައީސް ޑރ މުއިއްޒު ދެއްވާފައިވާ ޔަގީންކަމެއްކަން ފާހަގަކުރައްވާ މިނިސްޓަރ ވިދާޅުވީ ރައްޔިތުންނާ ގާތުން އައިޑީކާޑް ޕްރިންޓްކޮށް، ދޫކުރުމާއި ޕާސްޕޯޓް ދޫކުރުމުގެ ޚިދުމަތް ފެށިގެންދިޔުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެއް ކަމަށެވެ.
ޑިޕާޓްމަންޓް އޮފް ނެޝަނަލް ރަޖިސްޓްރޭޝަނުން ރާއްޖޭގެ އެއްވެސް ކަންކޮޅަކުން އެޕްލިކޭޝަނެއް އައުމުން އެ އެޕްލިކޭޝަން ޕްރޮސެސްކޮށްފައި ޕްރިންޓާއި ހިސާބަށް ދިޔައިމަ ހަމައެކަނި އެ ޕްރިންޓް އޮޕްޝަންދީފައި، އޮތޮރައިޒް ކުރެވޭ އައިޑީކާޑު އެކަނި ޕްރިންޓް ކުރެވޭގޮތަށް އަތޮޅުތަކަށް ފުރުސަތު ދީފައި އޮންނާނީ. މައުލޫމާތު ރައްކާތެރިވެގެންދާނެ. އެއްވެސް އިތުރު ކާޑެއް ޕްރިންޓެއް ނުކުރެވޭނެ. ކާޑެއް ދެ ފަހަރަކަށް ޕްރިންޓެއް ނުކުރެވޭނެ. މިކަންކަން އަޅުގަނޑުމެން ވާނީ ޔަގީންކޮށްފައި. ވަޒީރު
މިނިސްޓަރ ވިދާޅުވީ މި މަޝްރޫޢަކީ ޒަމާނީ ޓެކްނޮލޮޖީގެ އަލީގައި ހިދުމަތް ދެއްވުމަށް ރައީސުލްޖުމްހޫރިއްޔާ ގެންގުޅުއްވާ ވިސްނުންފުޅުގެ ޔަގީން ކަމަށާއި އަދި އެކަމުގެ ސަބަބުން ރައްޔިތުންނަށް ލިބިގެންދާ ފައިދާ ފެނިގެންދާނެ އަލިގަދަ ހެއްކެއް ކަމަށެވެ.
މީގެ އިތުރުން މިނިސްޓަރ ވިދާޅުވީ މި މަސައްކަތް ދާހިލީ ވުޒާރާއާ ހަވާލުކުރެއްވި ހިސާބުން މި މަސައްކަތުގެ ފޮނި ނަތީޖާ ހާސިލްކުރެވިގެންއައީ ޑީއެންއާރު ހިންގެވުމާ ހަވާލުވެވަޑައިގެން ތިއްބެވި ވެރިންނާއި ކޮންޓްރޯލަރ ޖެނެރަލް އޮފް އިމިގްރޭޝަންގެ ބުރަ މަސައްކަތުން ކަމަށެވެ.