ގިނަ ހިދުމަތްތަކެއް އަލަށް ގާއިމު ކޮށް ޓަރޝަރީ ފެންވަރުގައި ހުޅުމާލެ ހޮސްޕިޓަލް މިއަދު ރަސްމީކޮށް ހުޅުވައިފިއެވެ. މި ހޮސްޕިޓަލް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ދަރުމަވަންތަ ހޮސްޕިޓަލްގެ ސީއީއޯ އިބްރާހިމް އަބްދުއްރައްޒާގު ހަލީމު ވިދާޅުވީ، ރައީސް މުޢިއްޒުގެ އަމާޒަކީ ރާއްޖޭގެ ސިއްހީ ދާއިރާއަށް އައު ހިދުމަތްތައް ތައާރަފްކޮށް، މިހާރު ދެމުންދާ ހިދުމަތްތައް ކުރިއަރުވައި، މި ދާއިރާއަށް އިންގިލާބީ ބަދަލެއް ގެނައުން ކަމަށެވެ. އަދި މާލެ ސަރަހައްދުގެ ހޮސްޕިޓަލުތަކަށް ބޭނުންވާ ސިއްހީ ހިދުމަތްތެރިންނާއި ހިންގުމަށް ބޭނުންވާ ފައިސާ ހަމަޖައްސައިދީ، ސިއްހީ ދާއިރާއަށް ބޮޑު ކުރިއެރުމެއް ރައީސް ޑރ މުއިއްޒު ހޯއްދަވައިދެއްވާފައިވާ ކަމަށްވެސް އޭނާ ފާހަގަ ކުރެއްވިއެވެ.
ޓަރޝަރީ ފެންވަރަށް ހުޅުމާލެ ހޮސްޕިޓަލު ތަރައްގީ ކުރުމާ ގުޅިގެން، ގިނަ އައު ހިދުމަތްތަކެއް ވަނީ ގާއިމުކޮށްފައެވެ. މީގެ ތެރޭގައި ހިމެނެނީ:
- ޒަމާނީ ވަސީލަތްތަކާއެކު 4 އޮޕަރޭޓިން ރޫމް ހިމެނޭ އޮޕަރޭޝަން ތިއޭޓަރ ކޮމްޕްލެކްސެއް
- 10 އެނދުގެ އިންޓެންސިވް ކެއަރ ޔުނިޓު (އައިސީޔޫ)
- 14 އެނދުގެ ނިއޮނޭޓަލް އިންޓެންސިވް ކެއަރ ޔުނިޓު
- ސެންޓްރަލް ސްޓްރެއިލް ސަރވިސް ޑިޕާޓްމަންޓެއް
މި ތަރައްގީއާއެކު، ލެޕަރަސްކޯޕިކް ސަރޖަރީތައް ފަސޭހަކަމާއި އިތުބާރާއެކު ކުރެވޭނެ މަގު ފަހިވެގެންދާނެ ކަމަށް ހުޅުމާލެ ހޮސްޕިޓަލުން ވަނީ ބުނެފައެވެ. އަދި މާލެ ސިޓީ ގްރޫޕް އޮފް ހޮސްޕިޓަލްސްގެ ވިއުގަ ފުޅާކުރުމުގެ ގޮތުން އައިޖީއެމްއެޗް އަދި ދަރުމަވަންތަ ހޮސްޕިޓަލުގެ ޑޮކްޓަރުންވެސް މި ތިއޭޓަރުތަކުގައި ސަރޖަރީތައް ކުރިއަށް ގެންދިއުމަށް ވެެސް ހަމަޖެހިފައިވާ ކަމަށް އެހޮސްޕިޓަލުން މައުލޫމާތު ދެއެވެ.