ޑްރޯނުގެ އެހީގައި، ރާއްޖޭގެ ކަނޑުގެ ސަރަހައްދުގައި ގާނޫނާ ހިލާފަށް ހަރަކާތްތެރިވި ބޯޓެއް އަތުލައިގަނެފި އެވެ.
އެމްއެންޑީއެފް އިން ބުނީ ރާއްޖޭގެ ކަނޑުގެ ސަރަހައްދުގައި ގާނޫނާ ހިލާފަށް ހަރަކާތްތެރިވި ބޭރު ގައުމެއްގެ ބޯޓެއް، އެމްއެންޑީއެފްގެ އެއާ ކޯގައި ހިމެނޭ ޑްރޯން ބޭނުންކޮށްގެން އަތުލައިގަނެފައިވާ ކަމަށެވެ. މިއީ ޑްރޯން ބޭނުންކޮށްގެން މިފަދަ އުޅަނދެއް އަތުލައިގަތް ފުރަތަމަ ފަހަރެވެ.
އެމްއެންޑީއެފްގެ މީޑިއާ އޮފިޝަލް ވިދާޅުވިގޮތުގައި މި ބޯޓު އަތުލައިގަތީ އެމްއެންޑީއެފް އެއާ ކޯގެ ޑްރޯން ބޭނުންކޮށްގެންނާއި އެމްއެންޑީއެފް ކޯސްޓްގާޑުން ގުޅިގެން ރާއްޖޭގެ އުތުރުގެ ސަރަހައްދު ބެލެހެއްޓުމަށް ހިންގި ހާއްސަ އޮޕަރޭޝަނެއްގައެވެ. މި ބޯޓު ހޯދީ ރާއްޖޭގެ ސަރަހައްދުގައި ގާނޫނާ ހިލާފަށް އުޅެނިކޮށް ޑްރޯން ބޭނުންކޮށްގެންނެވެ.
“ކޯސްޓްގާޑުން މި ބޯޓް އިންޓަސެޕްޓް ކުރުމަށްފަހު މިހާރު ވަނީ ކޯސްޓްގާޑުގެ ބެލުމުގެ ދަށަށް ގެނެވިފައި،” އެމްއެންޑީއެފްގެ މީޑިއާ އޮފިޝަލް ވިދާޅުވިއެވެ.
އަތުލައިގަނެވުނު ބޯޓަކީ ކޮން ގައުމެއްގެ ބޯޓެއްކަން އެމްއެންޑީއެފުން ހާމައެއް ނުކުރެއެވެ. ނަމަވެސް، ބޯޓުގެ ސިފަތަކަށް ބަލާއިރު މިއީ އިންޑިއާ ނުވަތަ ސްރީލަންކާގެ ބޯޓަކަށް ވުމުގެ ފުރުސަތު ބޮޑުކަމަށް ބެލެވެއެވެ.
ރާއްޖޭގެ 900،000 އަކަކިލޯމީޓަރުގެ ބޮޑު އެކްސްކްލޫޒިވް އިކޮނޮމިކް ޒޯން 24 ގަޑިއިރު ހުއްޓުމެއް ނެތި އެމްއެންޑީއެފުން ދަނީ ބަލަހައްޓަމުންނެވެ. މި މަސައްކަތް އިތުރަށް ހަރުދަނާކުރުމަށްޓަކައި، ރާއްޖޭގެ އިގުތިސާދީ ސަރަހައްދު ބެލެހެއްޓުމަށް ތުރުކީގެ އެހީތެރިކަމާއެކު ތިން ޑްރޯނެއް ސަރުކާރުން ވަނީ ގެނެސްފައެވެ.
މި ޑްރޯންތަކަކީ ބައިރެކްތާރު ޓީބީ2 މޮޑެލްގެ ޑްރޯންތަކެވެ. މިއީ 27 ގަޑިއިރަށް ވުރެ ގިނަ އިރު 25،000 ފޫޓަށް ވުރެ މަތިން ދަތުރު ކުރުމުގެ ގާބިލްކަން ލިބިފައިވާ، އަދި 70 އާއި 120 ނޮޓްގެ ބާރުމިނުގައި ދުއްވުމުގެ ގާބިލުކަން ލިބިފައިވާ ޒަމާނީ ޑްރޯންތަކެކެވެ/