މި ސަރުކާރަކީ އުންމީދު ގެނެސްދޭނެ ސަރުކާރެއް ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ރައީސުލްޖުމްހޫރިއްޔާގެ ނައިބު މިހެން ވިދާޅުވީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ސަރުކާރަށް އެއް އަހަރު ފުރުމާ ގުޅިގެން ޕީ.އެސް.އެމް ނިއުސްއަށް ދެއްވި ބަސްދީގަތުމެއްގައެވެ.
ރައީސުލްޖުމްހޫރިއްޔާގެ ނައިބު ވިދާޅުވީ، ރިޔާސީ ނިންމެވުންތަކަކީ ރައްޔިތުންގެ މުސްތަޤުބަލަށްޓަކައި މުހިންމު ނިންމުންތަކެއް ކަމަށާއި، ކުރިއަށްއޮތް ތަނުގައި ދިވެހީންގެ ރާއްޖެ މެނިފެސްޓޯ ތަންފީޒުވަމުންދާ މަންޒަރު ފެނިގެންދާނެކަމަށެވެ. އެގޮތުން ބަޖެޓުގެ ބޮޑު ބައެއް ގެދޮރުވެރިކަމާއި ބޯހިޔާވަހިކަމަށް ޚާއްޞަކޮށް، ބޯހިޔާވަހިކަމުގެ މަޝްރޫޢުތައް ފެށިގެންދާނޭކަމަށް އެމަނިކުފާނު ވިދާޅުވިއެވެ. އަދި ބޭރުގެ ފަރާތްތަކުން ލިބޭ އެހީތަކާއި ޤައުމުގެ އުފެއްދުންތެރިކަމުން ލިބޭ އާމްދަނީގެ އެހީގައި ކުރިއަށްއޮތް ހަތަރު އަހަރުގެ އުންމީދުތައް ޙާޞިލުވެގެންދާނެކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވެރިކަމަށް ވަޑައިގެންނެވިއިރު، ވާރުތަވެފައިވާ ދަރަންޏާއި، އެ ދަރަނި އަދާކުރާނޭ ރޭވުންތެރި އިންތިޒާމެއް ނެތުމުގެ ސަބަބުން، ސަރުކާރާ ހަވާލުވާތާ ދެތިން މަސް ދުވަހުގެ ތެރޭގައި ދައުލަތް ބަނގުރޫޓުވެދާނޭކަމަށް ބަޔަކު ދުށްނަމަވެސް، މިއަދު ދުނިޔެއިން ރައީސުލްޖުމްހޫރިއްޔާގެ ސިޔާސަތުތައް ބަލައިގެންފައިވާކަމަށް ރައީސުލްޖުމްހޫރިއްޔާގެ ނައިބު ވިދާޅުވިއެވެ. ފައިސާ ޗާފުކުރުން ހުއްޓާލުމާއި، ސަބްސިޑީގެ އުޞޫލަށް ބަދަލުގެނައުން ފަދަ ބޮޑެތި، އުނދަގޫ ނިންމުންތަކުގައި ރައްޔިތުން ދެއްވި އެއްބާރުލެއްވުމާއި ދެއްކެވި ކެތްތެރިކަމާއެކު، އެ ގޮންޖެހުންތަކުން އަރައިގަތުމުގައި ކުރިއެރުންތައް ލިބިވަޑައިގެންފައިވާކަން އެމަނިކުފާނު ފާހަގަކުރެއްވިއެވެ. ނަތީޖާއެއްގެ ގޮތުން، ބައިނަލްއަޤުވާމީ ޖަމުޢިއްޔާތަކާއި، އަވަށްޓެރި ޤައުމުތަކާއި، ޢަރަބި ޤައުމުތަކާއި ހުޅަނގުންވެސް ރާއްޖޭގެ ތަރައްޤީއަށް ކުރާ މަސައްކަތްތަކުގައި އެއްބާރުލުން ދިނުމަށް ތައްޔާރަށް ތިބިކަމަށް އެމަނިކުފާނު ވިދާޅުވިއެވެ. ރައީސުލްޖުމްހޫރިއްޔާގެ ހަރުދަނާ ޚާރިޖީ ސިޔާސަތަށް އަލިއަޅުއްވާލައްވަމުން، ޤައުމީ މަސްލަޙަތު އިސްކުރެއްވުމަށް ފެއްޓެވި މަސައްކަތްތަކުގެ މަންޒަރުތައް ނައްސި ސިފައެއްގައި ދެއްކުމަށް ބަޔަކު ކުރި މަސައްކަތުން ކުރިމަތިވީ ގޮންޖެހުންތަކުންވެސް އަރައިގަނެވިފައިވާކަން އެމަނިކުފާނު ފާހަގަކުރެއްވިއެވެ.
ޤައުމުގެ އިޖުތިމާޢީ ފޭރާން ރަނގަޅުކުރުމަށް ކުރައްވަމުންގެންދަވާ މަސައްކަތްތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާގެ ނައިބު ވިދާޅުވީ، ސަރުކާރުން މަސައްކަތްކުރަމުންދަނީ ޒުވާން ޖީލު، ހަރުދަނާގޮތުގައި ބިނާކުރުމަށް ކަމަށެވެ. މުޖުތަމަޢުގެ ކަންކަން ހަމައިން ނެއްޓިދާނޭ ފަދަ ސިޔާސީ ނިންމުންތަކުން އެއްކިބާވެވަޑައިގަންނަވާ، ކުށާއި މާރާމާރީ މަދުކުރެވި، އާންމު މަސްލަހަތު ހުރި ކަންކަމުގައި ލުއިތައް ލިބެމުންދާ މަންޒަރު މިއަދު ފެންނަމުންދާކަމުގައި އެމަނިކުފާނު ވިދާޅުވިއެވެ.
ސަރުކާރުގެ އަމާޒަކީ، ކޮންމެ ސަރުކާރެއް ބަދަލުވެގެންދާއިރު ވަކިވެގެންދާ ސަރުކާރުގެ މަޝްރޫޢުތައް ހުއްޓާލުމުގެ ޘަޤާފަތް ރާއްޖެއިން ނައްތާލައި، ރައްޔިތުންގެ މަސްލަޙަތު އިސްކުރުންކަން ފާހަގަކުރައްވަމުން، ޤައުމީ ތަރައްޤީގެ 20 އަހަރު ދުވަހުގެ ޕްލޭންގެ އަމާޒަކީވެސް ރައްޔިތުންނަށް މަންފާ ލިބޭ ފަދަ މަސައްކަތްތަކަށް ޤާނޫނީ ބާރު ލިބި، ޢާންމު މަސްލަޙަތު ކަށަވަރުކުރުންކަން އެމަނިކުފާނު ފާހަގަކުރެއްވިއެވެ.