ހުޅުމާލޭ ދެވަނަ ފިޔަވަހީގައި ހުންނަ ހިޔާ ފްލެޓެއްގައި ދިވެހި ފިރިހެނަކު ރަހީނުކުރި މައްސަލާގައި ހައްޔަރުކުރި މީހުންގެ ބަންދުގެ މުއްދަތު އިތުރުކޮށްފިއެވެ.
މި މަހުގެ 07 ވަނަ ދުވަހުގެރޭ 12 މީހުންގެ ގުރޫޕަކުން މީހަކު ރަހީނުކުރީ އެޗް 9 ގެ 20 ވަނަ ފްލޯގެ 11 ވަނަ އެޕާޓްމަންޓެއްގައެވެ.
އެ ރޭގެ އިރާކޮޅުގެ ވަގުތެއްގައި ފުލުހުން ވަނީ އެ އެޕާޓްމަންޓުގެ ދޮރު ހަލާކުކޮށްލުމަށްފަހު ވަދެ، ރަހީނުކުރި މީހާ ސަލާމަތްކޮށް، އެ ތަނުގައި ތިބި 12 މީހުން ހައްޔަރުކޮށްފައެވެ.
އެ މީހުންގެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން އަމުރުކުރީ 7 ދުވަހަށް ބަންދުކުރުމަށެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ އެ މުއްދަތު ހަމަވުމާއެކު ކޯޓުން އެ މީހުންގެ ބަންދުގެ މުއްދަތު މިހާރު އިތުރުކޮށްފައިވާ ކަމަށެވެ.
އެގޮތުން ދަންމަރު، ށ.ފޯކައިދޫ، އަޙްމަދު ޒާހިދު (36 އ) 05 ދުވަހަށް، ވެހި، ގދ.ވާދޫ، އަލްމާން ޢަލީ ޚާލިދު (22 އ) އާއި، މ.ހަތިކަނޑު، މުޙައްމަދު އިޒްކާން (18 އ) އާއި، ޒުނައިޓްވިލާ، ކ.ގުރައިދޫ، އިޛާން އަޙްމަދު (18 އ) 08 ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ. އަދި ދެން ތިބި 08 މީހުން ތަހުގީގު މަރުހަލާ ނިމެންދެން ބަންދުކުރުމަށް އަމުރުކޮށްފައިވާ ކަމަށެވެ.
ހޯމް މިނިސްޓަރު ޢަލީ އިޙްސާން ވިދާޅުވެފައިވާ ގޮތުން އަނިޔާ ލިބުނު މީހާ ސަލާމަތް ކުރީ އޭނާ ރަހީނުކުރިތާ ގާތްގަނޑަކަށް 40 މިނެޓް ތެރޭގައެވެ.
ފުލުހުން އެ އެޕާޓްމަންޓަށް ވަންއިރު އޭނާގެ ބޯ ބާލުވައި، ވަޅިން އޭނާގެ އިނގިލި ބުރިކޮށްލަން ވެސް ހުރީ ތައްޔާރުކޮށްފައެވެ.