ސީޓު އެއަރ ކާގޯ ޚިދުމަތް ދަނީ ވަރަށް ބާރަށް ފުޅާވަމުންދާ ކަމަށާއި، އެ ޚިދުމަތުން މިހާތަނަށް 3 މިލިޔަނަށްވުރެ ގިނަ ޑޮލަރު އިގުތިސާދަށް ވަދެފައިވާ ކަމަށް އެމްޕީއެލްގެ ސީއީއޯ މުޙައްމަދު ވަޖީހް އިބްރާހިމް މިއަދު ވިދާޅުވެއްޖެއެވެ.
ފޭސްބުކްގައި ކުރެއްވި ޕޯސްޓެއްގައި ވަޖީހް ވިދާޅުވީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިގުތިސާދު ހަރުދަނާ ކުރެއްވުމަށްޓަކައި އެމަނިކުފާނުގެ ވެރިކަމުގެ ފުރަތަމަ އަހަރު ފެށްޓެވި މަސައްކަތްޕުޅުތަކުގެ ތެރޭގައި ހިމެނޭ ސީޓު އެއަރ ކާގޯގެ ޚިދުމަތް ވަރަށް ބާރަށް ފުޅާވަމުންދާ ކަމަށެވެ.
އެގޮތުން މިއަހަރުގެ މެއި މަހު ފެށުނު މި މަސައްކަތުގެ ތެރެއިން މިހާތަނަށް 3 މިލިޔަނަށްވުރެ ގިނަ އެމެރިކާ ޑޮލަރު ރާއްޖޭގެ އިގުތިސާދުގެ ތެރެއަށް ވަދެފައިވާ ކަމަށް ވަޖީހު ވިދާޅުވިއެވެ. އަދި މިއީ ރާއްޖޭގެ އިގުތިސާދަށް ބޮޑު މަންފާއެއް ކުރާނެ ސިނާއާތެއްގެ ގޮތުގައި ތަރައްގީވަމުންދާ ކަމަށް ވެސް ވަޖީހް ވިދާޅުވިއެވެ.
ތަފާސްހިސާބުތައް ދައްކާ ގޮތުން މިހާތަނަށް ކަނޑު މަގުން ރާއްޖެ އައި 210 ކޮންޓެއިނަރުން 1008000 ކިލޯގެ މުދާ ދުނިޔޭގެ އެކި ގައުމުތަކަށް ވައިގެ މަގުން ފޮނުވިފައިވާ ކަމަށް ވަޖީހް ވިދާޅުވިއެވެ.
މި މުދާ ރާއްޖެއިން ބޭރަށް ގެންދިއުމުގައި 9 އެއާލައިނަކުން ބައިވެރިވެއެވެ. މުދާ ފޮނުވޭ ގައުމުތަކުގެ ތެރޭގައި އެމެރިކާ، ކެނެޑާ، އިނގިރޭސިވިލާތާއި، ޔޫރަޕުގެ ގައުމުތައް ހިމެނެއެވެ.