ރިޔާސީ އިންތިޚާބަށްފަހު އޭރުގެ ސަރުކާރުން ކުރީގެ ރައީސް ޔާމީން ޢަބްދުލްޤައްޔޫމް މިނިވަންކުރީ ރައީސް ޑރ. މުޙައްމަދު މުޢިއްޒުގެ އެދިވަޑައިގަތުމަކަށް ނޫން ކަމަށް ވިދާޅުވެ، ކުރީގެ ރައީސް އިބްރާހިމް މުޙައްމަދު ޞާލިޙް ދެއްކެވި ވާހަކަފުޅު ރައީސް ޑރ. މުޢިއްޒު މިރޭ ދޮގުކުރައްވައިފިއެވެ.
އެމްއެމްޕީއާރްސީގެ ޚިޔާނާތުގެ މައްސަލާގައި 11 އަހަރުގެ ޖަލު ހުކުމެއްގައި ހުންނަވަނިކޮށް އޭރުގެ ރައީސް ޞާލިޙް، ޔާމީން ގޭބަންދަށް ބަދަލުކުރީ މިދިޔަ އަހަރުގެ އޮކްޓޫބަރުމަހުގައެވެ.
ރައީސް ޑރ. މުޢިއްޒު ވިދާޅުވެފައިވަނީ ޔާމީން ގެއަށް ބަދަލުކުރީ އެމަނިކުފާނު އެކަމަށް އެދިވަޑައިގަތުމުން ކަމަށެވެ. އަދި އެކަމަށް އެދި އާދޭސް ދަންނަވައި ޞާލިޙަށް ފޮނުއްވި މެސެޖުތައް ފޯނުގައި ހުންނާނެ ކަމަށް ވެސް ރައީސް ޑރ. މުޢިއްޒު ވަނީ ވިދާޅުވެފައެވެ.
ނަމަވެސް ޔާމީން ތުހުމަތު ކުރައްވާ ގޮތުގައި އެމަނިކުފާނު މިނިވަންވެވަޑައިގަންނަވާކަށް ރައީސް ޑރ. މުޢިއްޒު ބޭނުންފުޅެއް ނުވެއެވެ. އަދި ސަރުކާރު ބަދަލުވުމާއެކު ޖަލުން ދޫކޮށްލި ދުވަހު ވެސް ރައީސް ޑރ. މުޢިއްޒު ހުންނެވީ ޔާމީން މިނިވަންވެވަޑައިގަންނަވަން ބޭނުންފުޅުވެގެންނެއް ނޫނެވެ.
އަދި ޞާލިޙްގެ ދައުވަތަކަށް ޢަބްދުއްރަޙީމް ޢަބްދުﷲ އާއެކު ރައީސް ޑރ. މުޢިއްޒު ވަޑައިގެން ބައްދަލުކުރެއްވި ނަމަވެސް އެ ބައްދަލުވުމުގައި ޔާމީން މިނިވަންކުރުމުގެ އެއްވެސް ވާހަކައެއް ނުދައްކަވާ ކަމަށެވެ.
މިކަމާ ގުޅިގެން ރާއްޖެ ޓީވީގެ "ފަށާއިރު" ޕްރޮގްރާމުގައި ސުވާލު ދެންނެވުމުން ޞާލިޙް މިއަދު ވިދާޅުވީ އެކަމުގައި ރައީސް ޑރ. މުޢިއްޒު ހައްދަވަނީ އިތުރުފުޅެއް ކަމަށާއި، ތެދަށް ވާހަކަފުޅު ަދައްކަވަނީ ޔާމީން ކަމަށެވެ.
ސަރުކާރަށް އެއް އަހަރު ފުރުމާ ގުޅިގެން މިރޭ ބޭއްވި ރަސްމިއްޔާތުގައި ރައީސް ޑރ. މުޢިއްޒު ވަނީ ޞާލިޙްގެ ވާހަކަތައް ދޮގުކުރައްވާފައެވެ.
ރައީސް ވިދާޅުވީ އެމަނިކުފާނަކީ ވެވަޑއިގެންނެވި ވައުދެއް އެ ވެވަޑައިގެންނެވި ގޮތަށް ފުއްދަވަމުންދާ ބޭފުޅެއް ކަމަށެވެ. އެގޮތުން ރިޔާސީ އިންތިޚާބު ކާމިޔާބު ކުރެއްވި ދުވަހުގެ ރޭ ވެސް، އެރެއިން އެރެއަށް ފުއްދެވެން ހުރިކަމެއް ފުއްދެވުމުގެ މަސައްކަތް ފެށްޓެވިކަމަށް ރައީސް ވިދާޅުވިއެވެ.
"އެއީ ކޮންކަމެއްތޯ. އަޅުގަނޑު ރިޔާސީ އިންތިޚާބުގައި އެންމެ ބޮޑަށް ދެއްކި އެއް ވާހަކައަކީ ރައީސް ޔާމީން ނުހައްގުން ޖަލުގަ ހުރި ހުރުމަކީ އަޅުގަނޑުމެން ގަބޫލުކުރާ ކަމަކަށް ނުވާތީ ސަރުކާރުން ސިޔާސީ ނުފޫޒު ފޯރުވައިގެން އެމަނިކުފާނު ހައްޔަރުކޮށްފައި ހުރި ހުރުމުން ދޫކޮށްލުމަށް، އަޅުގަނޑަށް ރައްޔިތުން ޒިންމާ ހަވާލުކުރާ ހިސާބުން މަސައްކަތް ފަށާނަމޭ. ސަރުކާރުން ރައީސުލްޖުމްހޫރިއްޔާގެ އޮފީހުން ނުފޫޒު ފޯރުވައިގެން ޝަރުއީ ދާއިރާ ސަރުކާރުން ބޭނުންވާ ގޮތަކަށް ހިންގަމުންދާ ދިއުން ނިމުމަކަށް ގެންނާނަމޭ."
ރައީސް ވިދާޅުވީ މަރުހަބާ ވިދާޅުުވުމަށް އޭރުގެ ވާދަވެރި ކެންޑިޑޭޓް ޞާލިޙް އެރޭ ގުޅުއްވެވި ކަމަށާއި، އެ ފޯނު ކޯލުގައި ވެސް "އަޅުގަނޑު ފުރަތަމަ ދެންނެވީ ރައީސް ޔާމީން ގެއަށް ގެނެސް ދެއްވާށޭ" ކަމަށެވެ.
އެމަނިކުފާނަކީ ވެވަޑއިގެންނެވި ވައުދެއް އެ ވެވަޑައިގެންނެވި ގޮތަށް ފުއްދަވަމުންދާ ބޭފުޅެއް ކަމަށް ވެސް ރައީސް ވިދާޅުވިއެވެ.
ރައީސް އިތުރަށް ވިދާޅުވީ އެމަނިކުފާނަކީ ރައްޔިތުން ހަވާލު ކުރެއްވެވި ހުރިހާ ޒިންމާއެއް، ހުރިހާ މަސްއޫލިއްޔަތެއް އިޚުލާސްތެރިކަމާއި، ތެދުވެރިކަމާއި، އަމާނާތްތެރިކަމާއެކުގައި، އަދާކުރައްވާނެ ބޭފުޅެއް ކަމަށެވެ.