ކުރީގެ ރައީސް ޔާމީން ޢަބްދުލްޤައްޔޫމް މި ސަރުކާރަށް ކޮރަޕްޝަންގެ ތުހުމަތުތައް ކުރައްވަނީ ވެރިކަމާ ހެދި މޮޔަވެފައި ހުރި ވަރުން ކަމަށާއި، ކުރީގެ ރައީސުން ވެސް މި ”ލެވެލްއަށް” ނުވެއްޓޭ ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދު ވިދާޅުވެއްޖެއެވެ.
”ރައީސް ޑރ.މުޢިއްޒުއާއެކު 1 އަހަރު” ގެ ނަމުގައި ސަންގު ޓީވީިއިން ގެނެސްދެމުންދާ ކަވަރޭޖުގެ ތެެރެއިން ދެއްވި ޚާއްސަ ބަސްދީގަތުމެއްގައި ޢަބްދުއްރަޙީމް ވިދާޅުވީ ޔާމީން މިހާރު ދައްކަވަމުން އެގެންދަވަނީ ރައީސުލްޖުމްހޫރިއްޔާކަން ކުރައްވާފައި ހުންނަވާ ބޭފުޅަކު ވާހަކަ ދައްކަވަންޖެހޭ ފެންވަރުގައެއް ނޫން ކަމަށެވެ.
އެއަށްފަހު ޢަބްދުއްރަޙީމް ވަނީ މި ސަރުކާރުގެ އެއް އަހަރުގެތެރޭގައި ހިންގީ ކޮރަޕްޝަންގެ ކޮން އަމަލެއްތޯ ސުވާލު ކުރައްވާފައެވެ.
ރައީސް ޔާމީން ވިދާޅުވާށޭ މިވެނި ކަމެކޭ، ނޫނިއްޔާ އެމަނިކުފާނު ހުށަހަޅުއްވަންވީނުންހޭ، މިވެނި ސަރުކާރެއްގެ ކޮރަޕްޝަން މައްސަލަތައް ކަމާބެހޭ އިދާރާތަކަށް. އެބަހުއްޓޭ މިނިވަން މުއައްސާސާތައް އުފައްދަވާފަ. އެ މުއައްސަސާތަކަށް ހުށަހަޅުއްވަންވީ ނޫންހޭ. %100 ޔަގީންކަމާއެކީ މި ދަންނަވަނީ ރައީސް ޑރ. މުޙައްމަދު މުޢިއްޒުގެ ކޮރަޕްޝަންގެ އެއްވެސް މައްސަލައެއް މިހާތަނަކަށް ހުށަހެޅޭކަށް ނޯންނާނެ.
އެމަނިކުފާނަކީ ކޮރަޕްޝަނާއި، ފަސާދައަށް ޖާގަދެއްވާނެ ބޭފުޅެއް ނޫންކަން އެމަނިކުފާނު ދެނެވަޑައިގަންނަވާ ހުރިހާ އެންމެންނަށް އެނގޭނެ ކަމަށް ޢަބްދުއްރަޙީމް ވިދާޅުވިއެވެ.
އެހެންކަމުން ރައީސް ޔާމީންގެ ބޭނުންފުޅަކަށްވެގެން އުޅޭ ކަމަށް ގަބޫލުކުރެވެނީ ވެރިކަން މާ ބޮޑަށް ބޭނުންފުޅުވެގެން އުޅޭކަން ކަމަށާއި، ވެރިކަމަށް މާބޮޑަށް ދަހިވެތިވެވަޑައިގަންނަވަނީ ކަމަށް ޢަބްދުއްރަޙީމް ވިދާޅުވިއެވެ.
ރައީސް ޔާމީނަށް ހީފުޅުވާ ކަހަލަ ރައީސް މުޢިއްޒުގެ ވެރިކަމަކީ ތިމަންނަގެ ވެރިކަމެކޭ. އެހެނެއް ނޫން އެއްގޮތަކަށް ވެސް.
ޢަބްދުއްރަޙީމް ވިދާޅުވީ ވެރިކަމަކީ އެއްވެސް މީހަކު ދޭ އެއްޗެއް ނޫން ކަމަށާއި، އެކަން ނިންމަވަނީ މާތް ކަމަށެވެ.
ވެރިކަމަކީ ދުނިޔެ އުމުރަށް ތިމާގެ މިލްކެއް ކަމަށް ވެެރިކަން ބައްލަވައިގެން އުޅުމަށްވުރެ މޮޔަކަމެއް ނޯންނާނެ ކަމަށާއި، ޔާމީން މިވަގުތު އެ ހުންނެވީ ވެރިކަމާ ހެދި ހަމަ މޮޔަވެފައި ކަމަށް ޢަބްދުއްރަޙީމް ވިދާޅުވިއެވެ.
އޭނާ ވިދާޅުވީ ވެރިކަން ގެއްލުނު ނަމަވެސް ކުރީގެ ރައީސް މައުމޫން ޢަބްދުލްޤައްޔޫމު ވެސް، މުޙައްމަދު ނަޝީދު ވެސް ޔާމީން ވެއްޓުނު ލެވެލްއަށް ނުވެއްޓޭ ކަމަށެވެ.