މި އަންނަ އަހަރަކީ އިސްލާމީ ކަންތައްތަކާބެހޭ ދާއިރާއަށް ވަރަށް ފާގަތި، އުފާވެރި އަހަރަކަށްވާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މި ސަރުކާރަށް އެއް އަހަރު ފުރުމާ ގުޅިގެން ސަންގު ޓީވީއިން ކުރިއަށްގެންދާ ޚާއްސަ ކަވަރޭޖަށް ދެއްވި ބަސްދީގަތުމެއްގައި ޑރ. ޝަހީމް ވިދާޅުވީ މި ވޭތުވެދިޔަ އަހަރު އިސްލާމިކް މިނިސްޓްރީއަށް ގިނަ މަސައްކަތްތަކެއް ކުރެވިފައިވާ ކަމަށާއި، ކާމިޔާބީތަކެއް ހާސިލުކުރެވިފައިވާ ކަމަށެވެ. އަދި އަންނަ އަހަރަކީ އިސްލާމީ ކަންތައްތަކާބެހޭ ދާއިރާއަށް ވަރަށް ފާގަތި، އުފާވެރި އަހަރަކަށްވާނެ ކަމަށް ޔަގީންކުރައްވާ ކަމަށެވެ.
ކުރިއަށް ހުރީ އުފާވެރި ދުވަސްތަކެއް ކަމަށް އަޅުގަނޑަށް ސިފަވަނީ. ﷲ އިރާދަކުރެއްވިއްޔާމު މި އަންނަ އަހަރަކީ ﷲ ގެ ރަހުމަތުން ރާއްޖެއަށް ވެސް ރާއްޖޭގެ ހުރިހާ ދާއިރާއަކަށް ވެސް އަދި ވަކިން ޚާއްސަކޮށް އިސްލާމީ ކަންތައްތަކާބެހޭ ދާއިރާއަށް ވަރަށް ފާގަތި އުފާވެރި އަހަރަކަށްވާނެ ކަމަށް އަޅުގަނޑު މި ޔަގީން ކުރަނީ.
މީގެއިތުރުން ޑރ. ޝަހީމްގެ ވާހަކަފުޅުގައި ވަނީ އިގުތިސާދު ރަނގަޅު ކުރެއްވުމަށަާއި، އިޖުތިމާއީ ވެށި ރަނގަޅު ކުރެއްވުމަށް ރައީސް ޑރ. މުޢިއްޒު މަސައްކަތް ކުރައްވާކަމާއި، ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރަން ގިނަ މަސައްކަތްތަކެއް ކުރެއްވިކަން ފާހަގަކުރައްވާފައެވެ. އަދި ވޭޕްކުރުންފަދަ ނޭދެވޭ އަމަލުތަކުގެ ސަބަބުން ހެދިބޮޑުވަމުން އަންނަ ޒުވާނުން ހަލާކުވަމުންދާތީ ރައްޔިތުންގެ ފާޅުކުރާ ކަންބޮޑުވުންތަކަށް ހައްލު ހޯދައިދެއްވަން މަސައްކަތް ކުރައްވަމުން ގެންދަވާ ކަމަށާއި، ދުންފަތުގެ ކަންކަމަށް ހައްލު ހޯއްދަވައިދެއްވަން ވެސް މަސައްކަތް ކުރައްވަމުން ގެންދަވާ ކަމަށެވެ.
އެހެންވީމަ އަޅުގަނޑުމެން ރައްޔިތުން ވިސްނަންޖެހޭނީ އަޅުގަނޑު ދެކޭ ގޮތުގައި ހަމައެކަނި މާއްދީ ކަންކަމަކަށް ނޫނޭ. މި ގައުމުގަ ރަނގަޅު ކުރަންޖެހިފަ ހުރި ކަންތައްތައް މި ގައުމުގެ ބަހާތައް ގައުމީ ވިސްނުން އިއާދަކޮށް އިޖުތިމާއީ އަޚުލާގިއްޔާތު ދިރުވައި ޖީލު ރައްކާތެރި މާހައުލެއްގެ ތެރެއަށް ގެނައުމަށް ކުރެވޭ މަސައްކަތަކީ އެއީ ވެރިޔަކު ކޮށްދޭނެ އެންމެ ބޮޑު މަަސައްކަތް ކަމަށް އަޅުގަނޑަށް ސިފަވަނީ.
އެހެންކަމުން ރައީސް ޑރ. މުޢިއްޒު ކޮށްދެއްވަމުން އެ ގެންދަވާ މަސައްކަތްތަކާމެދު ވަރަށް ބޮޑަށް ހިތްހަމަޖެހިވަޑައިގަންނަވާ ކަމަށާއި، އެމަނިކުފާނަށް ޝުކުރު ދަންނަވާ ކަމަށް ޑރ. ޝަހީމް ވިދާޅުވިއެވެ.