މިފްކޯއިން ޅ. ފެލިވަރުގައި ހުރި މަސްކާރުހާނާގެ ކެޕޭސިޓީ 100 ޓަނަށް އިތުރުކުރުމާއި ގދ. ފިޔޯރީގައި ދުވާލަކު 100 ޓަނުގެ ދަޅުމަސް ބަންދުކުރެވޭ އައު ކާރުހާނާއެއް އެޅުމުގެ މަސައްކަތް ފަށައިފިއެވެ.
ޅ. ފެލިވަރުގައި މިހާރު ހުރި މިފްކޯގެ މަސްކާރުހާނާއަކީ 1978 ވަނަ އަހަރު ޖަޕާނުގެ މިޓްސުބިޝީ ކުންފުނިން ހިންގިއިރު ބިނާކޮށްފައިވާ ކާރުހާނާއެކެވެ. މިހާތަނަށް އިތުރު ޕައުޗު ލައިނެއް އެޅުން ފިޔަވައި އެއްވެސް އަޕްގްރޭޑެއް ގެނެވިފައިނުވާ މި ކާރުހާނާގެ މިހާރުގެ ކެޕޭސިޓީއަކީ ދުވާލަކު 50 ޓަނެވެ. ނަމަވެސް އެވްރެޖްކޮށް ބޭނުންކުރަމުންދަނީ 35 ޓަނުގެ ކެޕޭސިޓީއެކެވެ.
މިހާރުގެ ސަރުކާރުން ފެލިވަރުގެ ކާރުހާނާ އަޕްގްރޭޑްކުރުމުގެ މަސައްކަތް ފަށާފައިވާއިރު، އެތަނުގައި ދުވާލަކު 100 ޓަނުގެ މަސް ޕްރޮސެސްކުރެވޭ މުޅިން އައު ކާރުހާނާއެއް ގާއިމުކުރުމަށް ވަނީ ރޭވިފައެވެ.
މީގެ އިތުރުން، ގދ. ފިޔޯރީގައި ދުވާލަކު 100 ޓަނުގެ ދަޅުމަސް ބަންދުކުރާ ކާރުހާނާއެއް އެޅުމުގެ މަސައްކަތެ މަސައްކަތްވެސް ވަނީ ފެށިފައެވެ. މި ޕްރޮޖެކްޓުގެ ދަށުން 3000 ޓަނުގެ މަސް ފިނިކޮށް ރައްކާކުރެވޭނެ ކޯލްޑް ސްޓޯރޭޖަކާއި، 100 ޓަނުގެ ފިޝް މީލް ޕްލާންޓަކާއި، 100 ޓަނުގެ އައިސް ޕްލާންޓެއް ގާއިމުކުރުމަށްވެސް ވަނީ ހަމަޖެހިފައެވެ.
މި ޕްރޮޖެކްޓްތައް ކުރިއަށް ގެންދަނީ ކޮންޓްރެކްޓަރ ފައިނޭންސްގެ ދަށުން ޗައިނާގެ ދޮންގފަންގ އިލެކްޓްރިކް އިންޓަނޭޝަނަލް އިންކަން ފާހަގަކޮށްލެވެއެވެ.
މި މަޝްރޫޢުތައް ފުރިހަމަވުމުން، ރާއްޖޭގެ މަސްވެރިކަމުގެ ސިނާޢަތަށް ބޮޑު ކުރިއެރުމެއް ލިބި، މަސްވެރިންނަށް އިތުރު ފުރުޞަތުތަކެއް ހުޅުވިގެންދާނެކަމަށް ބެލެވެއެވެ.