ރާއްޖެއަށް މިހާރު ކުރަމުންދާ ވިއްސާރައިގައި ޅ.ކުރެންދޫއަށް ބޯކޮށް ވާރޭވެހި، އެ ރަށުގެ 104 ގެއަކަށް ފެން ވަދެ، ބޮޑެތި ގެއްލުންތަކެއް ލިބިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފިއެވެ.
ރާއްޖެއަށް މިހާރު ކުރަމުންދާ ވިއްސާރައާއި ގުޅޭ އެންމެ ފަހުގެ މައުލޫމާތު އާންމުކޮށް، އެންޑީއެމްއޭއިން ބުނީ ރާއްޖެއަށް
މިހާރު ކުރަމުންދާ ވިއްސާރައާ ގުޅިގެން ދެކުނުގެ އަތޮޅުތަކަށާއި، މެދު ރާއްޖެތެރެ އަދި އުތުރުގެ ބައެއް އަތޮޅުތަކަށް ވިއްސާރައިގެ އަސަރުކޮށް، އެކިވަރުގެ ގެއްލުންތައް ލިބިފައިވާ ކަމަށެވެ.
އެގޮތުން ހާލުގައި ޖެހޭ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި، ކެއިންބުއިމުގެ އެހީތެރިކަން ފޯރުކޮށްދިނުމުގެ މަސައްކަތްތައް ކައުންސިލް އިދާރާތަކާއި ގުޅިގެން ކުރަމުންދާ ކަމަށެވެ.
އެންޑީއެމްއޭއިން ހާމަކުރި ގޮޮތުގައި ވިއްސާރައިގައި ގެއްލުން ލިބިގެން މިހާތަނަށް އެ އޮތޯރިޓީއަށް ރިޕޯޓުކޮށްފައިވަނީ ސ.ފޭދޫ، ޅ.ކުރެންދޫ، ދ.ބަނޑިދޫ، ދ.ހުޅުދެލިންނެވެ. އަދި މިވަގުތު އެހެން އަތޮޅުތަކުގެ ހާލަތު ރަނގަޅުކަން ފާހަގަކުރެވިފައިވާ ކަމަށް އެންޑީއެމްއޭއިން ބުންޏެވެ.
އެ އޮތޯރިޓީން ބުނީ އިއްޔެ ކުރި ވިއްސާރައިގައި އެންމެ ބޮޑަށް ގެއްލުންވީ ކުރެންދުއަށް ކަމަށާއި، ފެންބޮޑުވެ ގެއްލުން ލިބުނު ގެތަކުގެ ތެރެއިން ދިރިނޫޅެވޭ ހާލަތަށް ގޮސްފައިވާ ގެތައް ދެނެގަނެ، އެ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި، ކެއިންބުއިމުގެ އެހީތެރިކަން ފޯރުކޮށްދިނުމުގެ މަސައްކަތް ކޮށްފައިވާ ކަމަށެވެ. އަދި މި ހާދިސާގައި 104 ގެއަކަށް ފެން ވަދެ، ބޮޑެތި ގެއްލުންތަކެއް ލިބިފައިވާތީ، ލިބިފައިވާ ގެއްލުންތައް ދެނެގަތުމުގެ މަސައްކަތް ކައުންސިލުން މިވަގުތު ކުރަމުންދާ ކަމަށެވެ.