މަސްތުވާތަކެތީގެ ބާވަތެއް ކަމަށްވާ ކެނަބިސް ހުރި ކަމަށް ބުނެ ކަސްޓަމުން ހިފެހެއްޓި ވޭޕް އޮއިލް ޝިޕްމެންޓުގައި ހިމެނޭ ތަކެތި މަސްތުވާތަކެއްޗަށް ނެގެޓިވްވެފައިވާ ކަމަށް ފުލުހުން މިއަދު ހާމަކޮށްފިއެވެ.
މޯލްޑިވްސް ޕޮލިސް ސަރވިސްއިން ބުނީ، މި ޝިޕްމެންޓުގައި ހުރި ތަކެތި ޓެސްޓުކޮށް ބެލިއިރު، އެއްވެސް ބާވަތެއްގެ މަސްތުވާއެއްޗެއް ނުފެނުނު ކަމަށެވެ. “މި ޝިޕްމެންޓްގައި ހުރި ތަކެތި މަސްތުވާތަކެއްޗަށް ޓެސްޓް ކުރުމަށް ހެދި ފޮރެންސިކް ލެބް ޓެސްޓުން ދައްކާފައިވަނީ ނެގެޓިވް ކަމަށް،” ފުލުހުން ވިދާޅުވިއެވެ.
މި ޝިޕްމެންޓް ކަސްޓަމުން ހިފެހެއްޓީ މިދިޔަ އޮކްޓޯބަރު މަހުގެ 14 ވަނަ ދުވަހުއެވެ. އެ ދުވަހު މި މައުލޫމާތު ހާމަކުރެއްވީ ހޯމްލޭންޑް އެންޑް ސެކިއުރިޓީ މިނިސްޓަރު އަލީ އިހުސާން އެވެ. މިނިސްޓަރު އިހުސާން ވިދާޅުވީ ވޭޕް އޮއިލް ނަމުގައި ރާއްޖެ އެތެރެކުރި މި ޝިޕްމެންޓުގައި މަސްތުވާތަކެތީގެ ބާވަތެއް ކަމަށްވާ ކެނަބިސް އަޅާފައިވާ ކަމަށް ޝައްކުކުރެވުނު ކަމަށެވެ.
ނަމަވެސް، މިހާރު ފުލުހުންގެ ތަހުލީލުތަކުން ދައްކާގޮތުގައި މި ޝިޕްމެންޓުގައި އެއްވެސް މަސްތުވާއެއްޗެއް ނެތެވެ. މި ހާދިސާއާ ގުޅިގެން އިތުރު ތަފްސީލެއް ހާމަކޮށްފައެއް ނުވެއެވެ.