ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީގައި ކުރިއަށްދިޔަ ބައްދަލުވުމުގައި، މަޖިލިސް މެންބަރުން ޕާޓީ ބަދަލުކޮށްފިނަމަ ގޮނޑި ގެއްލޭގޮތަށް ގާނޫނު އަސާސީއަށް އިސްލާހު ގެނައުމަށް ހުށަހަޅާފައިވާ ބިލަށް ހުށަހެޅި އިސްލާހުތަކަށް އަނގަބަހުން ވޯޓު ނަގަން ފަށައިފިއެވެ.
މަޖިލީހުގެ ރައީސް އަދި މުޅި މަޖިލިސް ކޮމިޓީގެ މުގައްރިރު އަބްދުއްރަހީމް އަބްދުﷲ މެންބަރުންގެ އަނގަބަހުން ވޯޓު ނަންގަވަން ނިންމެވީ، ވޯޓު ސިސްޓަމަށް ޖެހުނު މައްސަލައަކާ ގުޅިގެންނެވެ. ކޮމިޓީ ބައްދަލުވުމުގައި، ބިލަށް ހުށަހެޅި އިސްލާހުތަކަށް ވޯޓަށް އަހަމުން ދަނިކޮށް ވަކި ހިސާބަކުން ސިސްޓަމަށް މައްސަލަ ކުރިމަތިވިއެވެ.
މި މައްސަލައާ ގުޅިގެން ދެ ފަހަރެއްގެ މަތިން ސިސްޓަމް ރަނގަޅުކޮށް އަލުން ވޯޓަށް އަހަން ފެށުމުން ވެސް، ސިސްޓަމް ރަނގަޅު ނުވުމުން ކޮމިޓީ ބައްދަލުވުން މެދުކަނޑާލިއެވެ. އޭގެފަހުން މަޖިލިސް ރައީސް ނިންމެވީ ކޮންމެ މެންބަރެއްގެ ގާތުގައި އައްސަވައިގެން ވޯޓު ނެގުމަށެވެ. ބާކީ ހުރި އިސްލާހުތަކަށް ވޯޓަށް އެއްސެވުން ކުރިއަށް ގެންދިޔައީ އެގޮތަށެވެ.
މިއަދުގެ މަޖިލިސް ޖަލްސާގައި މި ބިލުގެ އިބްތިދާއީ ބަހުސް ނިމުމުން މި ބިލު މަޖިލީހަށް ބަލައިގަތީ، ޖަލްސާގައި ތިއްބެވި 82 މެންބަރުންގެ ތެރެއިން ވޯޓު ދެއްވި 69 މެންބަރުންގެ އަގުލަބިއްޔަތުންނެވެ. ބިލު ބަލައި ނުގަތުމަށް 12 މެންބަރުން ވޯޓު ދެއްވިއެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. މި ބިލުގައި ވަނީ، މެންބަރަކު މިހާރު ތަމްސީލު ކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ ނުވަތަ ވަކިކޮށްފިނަމަ ނުވަތަ އެހެން ޕާޓީއަކާ ގުޅުމުން ވެސް ގޮނޑި ގެއްލޭނެ ކަމަށެވެ. އަދި އަމިއްލަ ގޮތުން ވާދަކޮށްގެން މަޖިލީހަށް އިންތިހާބުވާ މެންބަރަކު ސިޔާސީ ޕާޓީއަކާ ގުޅިވަޑައިގަތުމަކީ ވެސް މެންބަރުގެ ގޮނޑި ގެއްލޭނެ ކަމެއް ކަމަށް ބަޔާންކޮށްފައިވެއެވެ.